ଭୁବନେଶ୍ବର: ରାଜଧାନୀରେ ସେଣ୍ଟ୍ରାଲ ସ୍କୁଲ ଛାତ୍ରଛାତ୍ରୀଙ୍କ କୋଭିଡ ଟେଷ୍ଟ କରାଯାଇଛି । ଆଜି(ଗୁରୁବାର) ପ୍ରଥମ ଦିନରେ ଭୁବନେଶ୍ୱରର 4ଟି ଶିକ୍ଷାନୁଷ୍ଠାନ ଯଥା ଟ୍ରାଇଡେଣ୍ଟ, ଏଲିନ, ଓଡିଏମ ଓ ୟୁନିଟ-୧ ସ୍ଥିତ କେନ୍ଦ୍ରୀୟ ବିଦ୍ୟାଳୟରେ ଛାତ୍ରଛାତ୍ରୀଙ୍କ RTPCR ଟେଷ୍ଟ କରାଯାଇଛି । ୟୁନିଟ-୧ କେନ୍ଦ୍ରୀୟ ବିଦ୍ୟାଳୟର ଏକାଦଶ ଶ୍ରେଣୀର ଜଣେ ଛାତ୍ର ପଜିଟିଭ ଚିହ୍ନଟ ହେବାପରେ ସେଠାରେ ଟେଷ୍ଟିଂ କରାଯାଉଥିବା ଜଣାପଡିଛି ।
ତେବେ ଗୋଟିଏ ଦିନରେ ଏକ ହଜାର ଟେଷ୍ଟିଂ କରାଯିବାର ଲକ୍ଷ୍ୟ ରଖିଛି ବିଏମସି । ଆଗାମୀ ଦିନରେ ଏଭଳି ଟେଷ୍ଟିଂ ବିଭିନ୍ନ ମଲ ଓ ଅପାର୍ଟମେଣ୍ଟରେ ମଧ୍ୟ କରାଯିବ । କରୋନାର ଦ୍ୱିତୀୟ ଲହରୀକୁ ନେଇ ସତର୍କତାମୂଳକ ପଦକ୍ଷେପ ଭାବେ ଏହି ବ୍ୟବସ୍ଥା କରାଯାଉଛି ।
ଅନ୍ୟପଟେ ଭୁବନେଶ୍ୱରରେ ଆଜି ଠାରୁ ଆରମ୍ଭ ହୋଇଛି ରାଣ୍ଡମ୍ ଟେଷ୍ଟିଂ । ସବୁ ଜୋନରେ ଦୁଇ ଦୁଇଟି ସ୍ଥାନରେ ଆମେ ରାଣ୍ଡମ୍ ଟେଷ୍ଟିଂ କରୁଛୁ ବୋଲି ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀ କହିଛନ୍ତି । ସମସ୍ତ ଶିକ୍ଷାନୁଷ୍ଠାନକୁ କୋଭିଡ୍ ଗାଇଡଲାଇନ ମାନିବାକୁ ସେ ଅନୁରୋଧ କରିଛନ୍ତି । ବିଏମସିର ଦିନକୁ ଟେଷ୍ଟିଂ କ୍ଷମତା ୨୦୦୦ ମାତ୍ର ବର୍ତ୍ତମାନ ଆମେ ଦିନକୁ ୬୦୦ ଆରଟିପିସିଆର ଏବଂ ୧୦୦୦ ଆଣ୍ଟିଜେନ୍ ଟେଷ୍ଟିଂ କରିବାର ଟାର୍ଗେଟ ରଖିଛୁ । କିନ୍ତୁ ଆଗକୁ ଏହି ସଂଖ୍ୟା ବଢାଯିବା । ଖାଲି ସେତିକି ନୁହଁ, ଆଗାମୀ ଦିନରେ ମଲ୍ ଏବଂ ମାର୍କେଟରେ ମଧ୍ୟ ଟେଷ୍ଟିଂ କରାଯିବ ବୋଲି ବିଏମସି କମିଶନର କହିଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
