ଭୁବନେଶ୍ବର: ରିସ୍କ ଦେଶରୁ ଆସିଥିବା 4 କୋଭିଡ ସଂକ୍ରମିତଙ୍କ ଓମିକ୍ରନ ଲକ୍ଷଣ(Omicron Symptoms) ନଥିବା ସ୍ପଷ୍ଟ କଲେ ସ୍ବାସ୍ଥ୍ୟ ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର(Odisha Health Director Bijay Mohapatra) । ଭୟଭୀତ ନ ହୋଇ ସତର୍କ ରହିବାକୁ ପରାମର୍ଶ ଦେଲେ ।
ସେ କହିଛନ୍ତି ଯେ, ଯେମିତି କୋଭିଡ ପାଇଁ ସତର୍କତା ଅବଲମ୍ବନ କରାଯାଉଛି, ସେହିପରି ଓମିକ୍ରନ ଭାରିଆଣ୍ଟ(Omicron Variant) ପାଇଁ ସତର୍କ ରହିବା ଆବଶ୍ୟକ । ଗୋଷ୍ଠୀ ସଂକ୍ରମଣ କ୍ଷେତ୍ରରେ ସତର୍କ ରହିବାକୁ ପଡ଼ିବ । WHO କହିବା ଅନୁସାରେ, ଯେଉଁମାନେ ଭ୍ୟାକ୍ସିନ ନେଇ ନାହାନ୍ତି, ଇମ୍ୟୁନିଟି କମି ଥିବା ବ୍ୟକ୍ତିଙ୍କ ପାଇଁ ଅଧିକ ରିସ୍କ ରହିଛି । ଏହାସହ ଶିଶୁମାନେ ମଧ୍ୟ ରିସ୍କ ଜୋନରେ ଅଛନ୍ତି । ସେଥିପାଇଁ ସିଏଚସି ଏବଂ ପିଏଚସିରେ ପେଡିଆଟ୍ରିକ ମ୍ୟାନେଜମେଣ୍ଟ କରିବାକୁ ବ୍ୟବସ୍ଥା କରାଯାଇଛି ।
ଏହା ମଧ୍ୟ ପଢନ୍ତୁ:- Omicron Tension: ବିଦେଶରୁ ଓଡିଶା ଆସିଥିବା 4 ଜଣ କୋରୋନା ସଂକ୍ରମିତ
HDU ଏବଂ ICU ବ୍ୟବସ୍ଥା କରାଯାଉଛି । ଶିଶୁମାନଙ୍କ ଚିକିତ୍ସା ପାଇଁ ଭିନ୍ନ ଗାଇଡ଼ଲାଇନ ରହିଛି । ତେଣୁ ସ୍ବାସ୍ଥ୍ଯକର୍ମୀମାନଙ୍କୁ ତାଲିମ ଦିଆଯାଉଛି । WHO ଏବଂ ଅନ୍ୟ ଗବେଷକମାନଙ୍କ ତଥ୍ୟ ଅନୁସାରେ, ଓମିକ୍ରନ ଭାରିଆଣ୍ଟର ସଂକ୍ରାମକ କ୍ଷମତା ଅନ୍ୟ ଭାରିଆଣ୍ଟ ଠାରୁ ଅଧିକ । କିନ୍ତୁ ଓମିକ୍ରନ ସଂକ୍ରମଣର ଲକ୍ଷଣ କମ, ବର୍ତ୍ତମାନ ସୁଦ୍ଧା ଗୁରୁତର କିମ୍ବା ମୃତ୍ୟୁ ଖବର ନାହିଁ । ପଜିଟିଭ୍ ହୋଇଥିବା 4 ବିଦେଶ ଫେରନ୍ତା ଲକ୍ଷଣ ବିହୀନ । ତେଣୁ ଭୟଭୀତ ହେବାର କିଛି ନାହିଁ, ସତର୍କ ରହିବାକୁ ପରାମର୍ଶ ଦେଇଛନ୍ତି ସ୍ବାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
