ଭୁବନେଶ୍ବର: ପଞ୍ଚାୟତ ନିର୍ବାଚନ ପରେ ହେବ ପୌର ନିର୍ବାଚନ । ଏ ନେଇ ଆରମ୍ଭ ହୋଇଛି ପ୍ରକ୍ରିୟା । ଆଜି(ଶନିବାର) ପ୍ରକାଶ ପାଇଛି ପୌର ପରିଷଦ ଅଧ୍ୟକ୍ଷ ପଦ ଲାଗି ଚିଠା ସଂରକ୍ଷଣ ତାଲିକା । ନଗର ଉନ୍ନୟନ ବିଭାଗ ପକ୍ଷରୁ ପ୍ରକାଶ ପାଇଛି ଏହି ଚିଠା ବିଜ୍ଞପ୍ତି । 107 ପୌର ପରିଷଦ ପାଇଁ ସଂରକ୍ଷଣ ଚିଠା ତାଲିକା ପ୍ରକାଶ ପାଇଛି । ଆପତ୍ତି ଅଭିଯୋଗ ଥିଲେ 15 ଦିନ ମଧ୍ୟରେ ଜଣାଇବାକୁ କୁହାଯାଇଛି । ପୌର ପ୍ରଶାସନ ନିର୍ଦ୍ଦେଶକଙ୍କ ନିକଟରେ ଏହି ଅଭିଯୋଗ କରିବା ପାଇଁ ରହିଛି ନିର୍ଦ୍ଦେଶ । ଏହାପରେ ପ୍ରକାଶ ପାଇବ ଚୂଡ଼ାନ୍ତ ତାଲିକା ।
ଅନୁସୂଚିତ ଜାତି(ମହିଳା)ଙ୍କ ପାଇଁ ପୌର ପରିଷଦ ଅଧ୍ୟକ୍ଷ ପଦ ଲାଗି ୯ଟି ସ୍ଥାନରେ ସଂରକ୍ଷଣ ରହିଥିବା ବେଳେ ଅନୁସୂଚିତ ଜାତିଙ୍କ ପାଇଁ ୮ଟି ସ୍ଥାନ ସଂରକ୍ଷିତ ହୋଇଛି । ସେହିପରି ଅନୁସୂଚିତ ଜନଜାତି(ମହିଳା)ଙ୍କ ପାଇଁ ନବରଙ୍ଗପୁର, ବ୍ରଜରାଜନଗର, ଉମରକୋଟ, ଗୁଡାରି, ଆନନ୍ଦପୁର, ବ୍ୟାସନଗରରେ ସ୍ଥାନ ସଂରକ୍ଷିତ ରହିଥିବା ବେଳେ ଅନୁସୂଚିତ ଜନଜାତିଙ୍କ ପାଇଁ ବାଲିଗୁଡ଼ା, ପାଟନଗଡ଼ ଓ ବିନିକାରେ ସ୍ଥାନ ସଂରକ୍ଷଣ ରଖାଯାଇଛି ।
ମହିଳାଙ୍କ ପାଇଁ ୪୦ଟି ସ୍ଥାନ ସଂରକ୍ଷିତ ହୋଇ ରହିଥିବା ବେଳେ 107 ପୌର ପରିଷଦ ୪୧ଟି ପୌର ପରିଷଦ ପାଇଁ ସ୍ଥାନ ସଂରକ୍ଷିତ ହୋଇନାହିଁ । ଏହି ସ୍ଥାନଗୁଡ଼ିକ ମଧ୍ୟରେ ଆଠଗଡ଼, ଦେବଗଡ଼, ରଣପୁର, ନୟାଗଡ଼, ଗଞ୍ଜାମ, ଢେଙ୍କାନାଳ, ଫୁଲବାଣୀ, ଖୋର୍ଦ୍ଧା, ପୁରୀ, କେନ୍ଦ୍ରାପଡ଼ା, ଚୌଦ୍ବାର, ବାଙ୍କି, ରାଇରଙ୍ଗପୁର ଆଦି ରହିଛି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
