ଭୁବନେଶ୍ବର: ରାଜଧାନୀ ରେଳଷ୍ଟେସନରେ ଆତଙ୍କରାଜ ସାଙ୍ଗକୁ ଭଙ୍ଗାରୁଜା ଓ ଠେଲାପେଲା । ଦୀର୍ଘ ସମୟ ଧରି ହନ୍ତସନ୍ତ ହେଲେ ରେଳ ଯାତ୍ରୀ । ରାତି ଅଧରେ ଭୁବନେଶ୍ବର ରେଳ ଷ୍ଟେସନରେ ଏମିତି କିଛି ଦୃଶ୍ୟ ଦେଖିବାକୁ ମିଳିଥିଲା । ରିଜର୍ଭେସନ ସିଟରେ ଜେନେରାଲ ଟିକେଟଧାରୀ ପଶିଯିବା ଫଳରେ ଯାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଥିଲା ।
ରାତି ପ୍ରାୟ ୧୨ ଟା ବେଳକୁ ପରିସ୍ଥିତି ନିୟନ୍ତ୍ରଣ ବାହାରେ । ରାତି ୧୧ଟା ରେ ଭୁବନେଶ୍ବରରୁ ଛାଡିବାକୁ ଥିବା ପୁରୀ-ଦିଲ୍ଲୀ ପୁରୁଷୋତ୍ତମ ଏକ୍ସପ୍ରେସରେ ଭୟଙ୍କର ପରିସ୍ଥିତି ଉପୁଜିଥିଲା । ଟିକେଟ କାଟିଥିବା ଯାତ୍ରୀଙ୍କ ପାଇଁ ସିଟ ନାହିଁ । ରିଜର୍ଭବେସନ ସିଟରେ ଜେନେରାଲ ଟିକେଟଧାରୀ । ଯାହାକୁ ନେଇ ଜିଆରପି ଓ ରେଳ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ ହୋଇଥିଲା । ଏହା ପରେ ଦୀର୍ଘ ଏକ ଘଣ୍ଟା ଯାଏଁ ଅଟକିଥିଲା ଟ୍ରେନ ।
ଆର୍ମି ପରୀକ୍ଷା ଦେବାକୁ ଆସିଥିବା ପରୀକ୍ଷାର୍ଥୀଙ୍କ ପାଇଁ ଘଟିଥିଲା ଏପରି କାରନାମା। ପରିସ୍ଥିତି ଅସମ୍ଭାଳନୀୟ ହେବାରୁ ଜିଆରପି, ଆରପିଏଫ ପୋଲିସ ସମସ୍ତ ବଗିରେ ପଶି ଉକ୍ତ ପରୀକ୍ଷାର୍ଥୀଙ୍କୁ ଘଉଡାଇବାକୁ ଉଦ୍ୟମ କରିଥିଲା । ଶେଷରେ ପରିସ୍ଥିତି ଏପରି ହେଲା ପରୀକ୍ଷାର୍ଥୀ ଟ୍ରେନରୁ ନ ବାହାରି ସିଟ ଚିରା ଚିରି ଆରମ୍ଭ କରିଥିଲେ। ବାଧ୍ୟ ହୋଇ ଆରପିଏଫ ଲାଠି ଚାର୍ଜ କରିବା ଆରମ୍ଭ କରିଥିଲେ । ପରେ ୧୨ ଟା ୧୫ରେ ଟ୍ରେନଟି ଗଡିଥିଲା । ତେବେ ଉତ୍ତରପ୍ରଦେଶ ଓ ବିହାରକୁ ଏହି ଟ୍ରେନଟି ଶେଷ ଟ୍ରେନ ଥିବାରୁ ଏପରି ପରିସ୍ଥିତି ଉପୁଜିଥିଲା । ସେପଟେ ସୂଚନା ମିଳିଛି ପରୀକ୍ଷାର୍ଥୀଙ୍କ ଯିବା ପାଇଁ ଅନ୍ୟ ଟ୍ରେନରେ କିଛି ବ୍ୟବସ୍ଥା କରାଯିବା ବୋଲି ଯୋଜନା କରାଉଛି।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
