ଭୁବନେଶ୍ବର: ଉନ୍ମୋଚିତ ହୋଇଛି ତ୍ରୈମାସିକ ପତ୍ରିକା 'ଶିଶୁ ଲେଖା' । ଓଡ଼ିଆ ଭାଷା ପ୍ରତିଷ୍ଠାନ ତରଫରୁ ତ୍ରୈମାସିକ ପତ୍ରିକା 'ଶିଶୁ ଲେଖା'ର ଉନ୍ମୋଚନ ହୋଇଛି । ଜୁଲାଇ, ଅଗଷ୍ଟ ଓ ସେପ୍ଟେମ୍ବର ମାସ ସଂସ୍କରଣ ସଂସ୍କୃତି ଭବନ ସମ୍ମିଳନୀ କକ୍ଷରେ ଉନ୍ମୋଚିତ କରାଯାଇଛି ।
ଉନ୍ମୋଚନ କାର୍ଯ୍ୟକ୍ରମରେ ବିଭାଗୀୟ କମିଶନର ତଥା ଶାସନ ସଚିବ ଡ. ସୁରେଶ ଚନ୍ଦ୍ର ଦଳାଇ, ନିର୍ଦ୍ଦେଶକ ତଥା ଅତିରିକ୍ତ ଶାସନ ସଚିବ ଡ଼. ରଞ୍ଜନ ଦାସ, ଓଡ଼ିଆ ଭାଷା ପ୍ରତିଷ୍ଠାନଙ୍କ ସମେତ ଅନ୍ୟାନ୍ୟ ଅଧିକାରୀବୃନ୍ଦ ଉପସ୍ଥିତ ଥିଲେ । ଏହି ସଂସ୍କରଣଟି ବିଶିଷ୍ଟ ସାହିତ୍ୟିକ ତଥା ଗାଳ୍ପିକ ମନୋଜ ଦାସଙ୍କ ଉପରେ ସ୍ବତନ୍ନ ଭାବେ ଉଲ୍ଲେଖ ହୋଇଛି । ଏହି ପତ୍ରିକା ନିରନ୍ତର ଭାବରେ ପ୍ରତି ୩ ମାସରେ ପ୍ରକାଶିତ ହେବ ବୋଲି ବିଭାଗୀୟ ଶାସନ ସଚିବ ଉନ୍ମୋଚନ ଅବସରରେ କହିଛନ୍ତି ।
ଏଥିରେ ଶିଶୁ-ସାହିତ୍ୟିକ, ସାହିତ୍ୟିକ, ଗାଳ୍ପିକଙ୍କର ଲେଖା ସହିତ ଶିଶୁମାନଙ୍କର ଲେଖା ମଧ୍ୟ ସ୍ଥାନ ପାଇବ । ଏହାଦ୍ୱାରା ଶିଶୁମାନଙ୍କର ବୌଦ୍ଧିକତା ବୃଦ୍ଧି ସହିତ ବିଭିନ୍ନ ପାଠକଙ୍କ ଦ୍ଵାରା ଏହା ଆଦୃତ ଲାଭ କରିବ ବୋଲି ଆଶାପୋଷଣ କରାଯାଇଛି । କାର୍ଯ୍ୟକ୍ରମରେ ପ୍ରଖ୍ୟାତ ଲେଖକ ଦାସ ବେନହୁର ଓ ବହୁ ବରିଷ୍ଠ ସାହିତ୍ୟିକ ଉପସ୍ଥିତ ଥିଲେ ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
