ଭୁବନେଶ୍ବର: ସାରା ଦେଶରେ ଜେଏନୟୁ ଘଟଣାକୁ ନିନ୍ଦା । ଆକ୍ରମଣକାରୀଙ୍କୁ ଗିରଫ କରିବାକୁ ଜୋର ଧରୁଛି ଦାବି । ଆକ୍ରମଣକାରୀଙ୍କ ଉପରେ କଡା କାର୍ଯ୍ୟାନୁଷ୍ଠାନ ହେଉ ବୋଲି ସାଧାରଣରେ ଦାବି ହେଉଛି । ଏନେଇ ଭୁବନେଶ୍ବର ମାଷ୍ଟର କ୍ୟାଣ୍ଟିନ ଛକ ନିକଟରେ ସିପିଆଇ ଓ ବାମପନ୍ଥୀ ଦଳ ବିରୋଧ କରିଛନ୍ତି ।
ରବିବାର ଦିଲ୍ଲୀର ଜବହାର ଲାଲ ନେହେରୁ ବିଶ୍ବବିଦ୍ୟାଳୟରେ ଅତର୍କିତ ଭାବରେ କିଛି ଛାତ୍ରଛାତ୍ରୀଙ୍କ ଉପରେ ଆକ୍ରମଣ ହୋଇଥିବା ନେଇ ଏବେ ସାରା ଦେଶରେ ଜାରି ରହିଛି ବିକ୍ଷୋଭ ପ୍ରଦର୍ଶନ । ଏହାର ପ୍ରଭାବ ଓଡ଼ିଶାରେ ମଧ୍ୟ ପଡିଛି । ଏହାକୁ ଦୃଢ ଭାବରେ ନିନ୍ଦା କରିବା ସହ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ ଓ ନରେନ୍ଦ୍ର ମୋଦିଙ୍କ ଇସ୍ତାଫା ଦାବି କରିଛନ୍ତି ବାମପନ୍ଥୀ ଦଳ ।
ଜେଏନୟୁରେ ଏଭଳି ଘଟଣାକୁ ନେଇ ପୋଲିସ ଓ ରାଜନେତାଙ୍କ ହାତ ରହିଛି । ଯାହା ଫଳରେ ମୁଖାଧାରୀମାନେ ଜେଏନୟୁ ପରିସରକୁ ଯାଇ ଆକ୍ରମଣ କରିଛନ୍ତି । ଏଥିରେ ବାଦ ପଡିନାହାଁନ୍ତି ପ୍ରଫେସର। ବାରମ୍ବାର ଜେଏନୟୁରେ ଏଭଳି ଘଟଣା ଘଟୁଥିବାରୁ ଏହାକୁ ନିନ୍ଦା କରିଛନ୍ତି ବିଭିନ୍ନ ଦଳ। ଏହାକୁ ନେଇ ଛାତ୍ରଛାତ୍ରୀ, ବୁଦ୍ଧିଜୀବୀ ଓ କିଛି ତୁଙ୍ଗ ନେତା ଏକତ୍ରିତ ହୋଇ ଭୁବନେଶ୍ବରର ମାଷ୍ଟର କ୍ୟାଣ୍ଟିନ ଛକ ନିକଟରେ ପ୍ରତିବାଦ କରିଛନ୍ତି।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
