ଭୁବନେଶ୍ବର: ଜମିଜମା ବିବାଦକୁ ନେଇ ଗଣ୍ଡଗୋଳ। ପରେ ବାହାଘର ଭୋଜିରେ ମାରପିଟ। ମାରପିଟରେ ଇଗୋ ହର୍ଟରୁ ପ୍ରି ପ୍ଲାନ ମର୍ଡର। ସେପ୍ଟେମ୍ବର ୧୦ ତାରିଖ ରଙ୍ଗମାଟିଆ ଦିପକ ବେହେରା ଓରଫ ଲଣ୍ତା ହତ୍ୟାକାଣ୍ଡ ଏଭଳି ନେଇଛି ରୋମାଞ୍ଚକ ମୋଡ। ପୂର୍ବଶତୃତା ଅର୍ଥାତ ଇଗୋ ହର୍ଟ କରିବାରୁ ଦିପକ ବେହେରାକୁ ହତ୍ୟା କରିଥିଲେ ଅଭିଯୁକ୍ତ।
ଖବର ଅନୁଯାୟୀ, ଜମିଜମା ବିବାଦକୁ ନେଇ ପୂର୍ବରୁ ଏକ ବାହାଘର କାର୍ଯକ୍ରମରେ ପ୍ରମୋଦ ପରିଡା ଓ ସୌମ୍ୟ ରଞ୍ଜନ ପରିଡାକୁ ମାଡ ମାରିଥିଲେ ଦୀପକ ଓରଫ ଲଣ୍ଡା। ଯାହାକୁ ନେଇ ରାଗ ରଖିଥିଲେ ଦାଦା ପୁତୁରା ପ୍ରମୋଦ ଓ ସୌମ୍ୟ। ପରେ ଯୋଜନା ବଦ୍ଧ ଭାବେ ଲଣ୍ଡାର ନିଜ ଜଳଖିଆ ଦୋକାନରୁ ଫେରୁଥିବା ବେଳେ ଗୋଡ ଓ ମୁଣ୍ଡକୁ ହାଣି ହତ୍ୟା କରିଥିଲେ ଅଭିଯୁକ୍ତ।
ଘଟଣାରେ ୫ ମୁଖ୍ୟ ଅଭିଯୁକ୍ତଙ୍କ ସହ ୭ଜଣଙ୍କୁ ଗିରଫ କରିଛି କମିସନରେଟ ପୋଲିସ। ଗିରଫ ଅଭିଯୁକ୍ତ ହେଲେ ମାଷ୍ଟରମାଇଣ୍ଡ ସୌମ୍ୟ ରଞ୍ଜନ ପରିଡା, ପ୍ରମୋଦ ପରିଡା, ପ୍ରଫୁଲ ପରିଡା, ପ୍ରତାପ ପରିଡା ଓ ସୁର ସାହୁ। ଏମାନେ ଦୀପକ ବେହେରାକୁ ଭୁଜାଲିରେ ଆକ୍ରମଣ କରି ହତ୍ୟା କରିଥିଲେ।
ତେବେ ହତ୍ୟା ପରେ ଦୁଇ ସହଯୋଗି ମଳୟ ତରାଇ ଓ ମନୋଜ ବେହେରା ଜରିଆରେ ବାଇକରେ ଖସିଯାଇଥିଲେ ଅଭିଯୁକ୍ତ ସୌମ୍ୟ। ଏହି ମାମଲାରେ ବର୍ତ୍ତମାନ ୭ଜଣକୁ ଗିରଫ କରିଯାଇଥିବା ବେଳେ ଏବେ ବି ଫେରାର ଅଛନ୍ତି ଆଉ କିଛି ଅଭିଯୁକ୍ତ। ହତ୍ୟାରେ ବ୍ୟବହୃତ ଖଣ୍ଡା ଓ ଭୁଜାଲି ସହ ମୋବାଇଲ ଫୋନ ଓ ୨ଟି ବାଇକକୁ ଜବତ କରିଛି ପୋଲିସ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
