ଭୁବନେଶ୍ବର: ଫନି ପ୍ରଭାବିତ ୧୪ଜିଲ୍ଲାର ୧୨ଲକ୍ଷ ୫୭ ହଜାର କ୍ଷତିଗ୍ରସ୍ତଙ୍କୁ ବାସଗୃହ ମିଳିବ । ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ଚିହ୍ନଟ ସରିଲାଣି । ଏ ନେଇ କେନ୍ଦ୍ର ସରକାରଙ୍କୁ ପ୍ରସ୍ତାବ ପଠାଯିବ ସହ ଏହାର ସମସ୍ତ ବିବରଣୀ କେନ୍ଦ୍ର ଦ୍ବାରା ପ୍ରସ୍ତୁତ ଆପ୍ରେ ଉପଲବ୍ଧ ହେବ ।
ସେହିପରି ଅବଶିଷ୍ଟ ୧୬ ଜିଲ୍ଲାରେ ୧୦ଲକ୍ଷ ପରିବାରକୁ ଚିହ୍ନଟ କରାଯାଇଛି । ହେଲେ ଏହାର ଫଟୋ କେନ୍ଦ୍ରକୁ ପଠାଯାଇପାରୁନାହିଁ । କାରଣ କେନ୍ଦ୍ର ପକ୍ଷରୁ ପ୍ରସ୍ତୁତ ଆପ ଏବେ ସୁଦ୍ଧା ବ୍ଲକ ହୋଇପଡିଛି । ଗୁରୁବାର ପଞ୍ଚାୟତ ରାଜ ମନ୍ତ୍ରୀ ପ୍ରତାପ ଜେନା କରିଥିବା ସମୀକ୍ଷା ବୈଠକରେ ଏ ସମ୍ବନ୍ଧରେ ସୂଚନା ମିଳିଛି ।
ସେହିପରି ଚଳିତ ବର୍ଷ ବିଜୁ ପକ୍କାଘର ଯୋଜନାରେ ବର୍ତ୍ତମାନ ସୁଦ୍ଧା ୭୫ ହଜାର ଘର ନିର୍ମାଣ କାମ ଶେଷ ହୋଇଛି । ଏହି ଯୋଜନା ( ବିଜୁପକ୍କା ) ରେ ୮ ଲକ୍ଷ ଗୃହ ନିର୍ମାଣ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଛି । ବିଜୁ ପକ୍କାଘର ଯୋଜନାରେ ଅଦ୍ୟାବଧି ଅସମ୍ପୂର୍ଣ୍ଣ ଥିବା ୨୧ହଜାର ଘରକୁ ତୁରନ୍ତ ସାରିବାକୁ ନିର୍ଦ୍ଦେଶ ଦିଆଯାଇଛି ।
ଏ ନେଇ ପ୍ରତି ସପ୍ତାହରେ କାର୍ଯ୍ୟର ଅଗ୍ରଗତି ସମ୍ପର୍କରେ ସମୀକ୍ଷା ହେବ । ଏଥିସହ ଏଣିକି ହିତାଧିକାରୀ ନିଜ ଘରର କାର୍ଯ୍ୟ ଶେଷ ହେଲା ପରେ ପ୍ରସ୍ତୁତ ଆପରେ ନିଜ ଘରର ଫଟୋ ସହ ଅନ୍ୟାନ୍ୟ ଘର ଅପଲୋଡ଼ କରିପାରିବେ। ଏପରିକି ହିତାଧିକାରୀ ସିଧାସଳଖ ଘର ତିଆରି ବାବଦ ଅର୍ଥ ସମ୍ବନ୍ଧରେ ଜାଣିପାରିବେ । ଏଥିସହିତ ଆପ ଜରିଆରେ ବିଲ୍ ପ୍ରଦାନର ସମସ୍ତ ସୂଚନା ପ୍ରଦାନ କରାଯିବ । ରାଜ୍ୟ ସରକାରଙ୍କ ‘5T’ ଯୋଜନାରେ ଖୁବଶୀଘ୍ର ଏହା କାର୍ଯ୍ୟକାରୀ ହେବାକୁ ଯାଉଥିବା ନେଇ ମନ୍ତ୍ରୀ ସୂଚନା ଦେଇଛନ୍ତି ।
ଏହା ସହ ମନ୍ତ୍ରୀଙ୍କ ଏହି ବୈଠକରେ ‘ଆମ ଗାଁ ଆମ ବିକାଶ’ରେ ଗ୍ରାମୀଣ ସଡକ ଓ ସେତୁ ନିର୍ମାଣ , ରୋଜଗାର ଗ୍ରାମାଞ୍ଚଳରେ ଷ୍ଟ୍ରିଟ୍ ଲାଇଟ୍, ବିଜୁ ପକ୍କାଘର ଯୋଜନା ଆଦି ନେଇ ୨୦୧୯-୨୦ ବର୍ଷର ବର୍ତ୍ତମାନ ସ୍ଥିତି ସମ୍ପର୍କରେ ସମୀକ୍ଷା ହୋଇଛି ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
