ଭୁବନେଶ୍ବର: ଘର ସାମ୍ନାରେ ଡ୍ରଗ୍ସ ଖାଉଛନ୍ତି ଲୋକ । ଆଖି ଆଗରେ ଝାମ୍ପି ନେଉଛନ୍ତି ସୁନା ଚେନ । ଫୁଲ ତୋଳିବା ବେଳେ ଘରେ ପଶୁଛନ୍ତି ଚୋର। ବାଟରେ ଗଲାବେଳେ ରାସ୍ତାରେ ଗାଡି ପାର୍କିଂରେ ସମସ୍ୟା । ରାତିରେ ଡିଜେ ବଜାଇବାଠୁ ଆରମ୍ଭ କରି ଗଳିରେ ପିଲାଙ୍କ ଉତ୍ପାତ ଏଭଳି ଅନେକ ପ୍ରଶ୍ନ ବାଣରେ ପୋଲିସକୁ ଘେରିଲେ ବରିଷ୍ଠ ନାଗରିକ । ପୋଲିସ ସେବା ଭବନରେ ହୋଇଥିବା ୧ନମ୍ବର ଜୋନାଲ ଏସିପିଙ୍କ ଅଞ୍ଚଳର ବରିଷ୍ଠ ନାଗରିକ ମାନେ ଏକାଠି ହୋଇ ପୋଲିସ ସହ ଆଲୋଚନା କରିଥିବା ବେଳେ ଏହ ସବୁ ପ୍ରଶ୍ନ କରିଛନ୍ତି ।
ଖାରବେଳନଗର ଥାନା ଏବଂ କ୍ୟାପିଟାଲ ଥାନା ଅଞ୍ଚଳରେ ଥିବା ବରିଷ୍ଠ ନାଗରିକ ପୋଲିସ କମିଶନରଙ୍କୁ ସହରରେ ବଢୁଥିବା ଅପରାଧକୁ ନେଇ ଉଦବେଗ ପ୍ରକାଶ କରିଥିଲେ । ତେବେ ଏହି ସବୁ ଅଭିଯୋଗକୁ ଶୁଣିବା ସହ ଏ ଦିଗରେ ପୋଲିସ ଆହୁରି ଯତ୍ନଶୀଳ ହେବ ବୋଲି କହିଛନ୍ତି ପୋଲିସ କମିଶନର । ତେବେ ପାଟ୍ରୋଲିଂ ପାଇଁ ମାତ୍ର 35ଟି ପିସିଆର ଗାଡି ଭୁବନେଶ୍ୱର ରେ ଗଡୁଛି। ପୋଲିସର କମ୍ ଷ୍ଟାଫ ଅଛନ୍ତି ତେଣୁ ସୀମିତ ସାମର୍ଥ୍ୟରେ ପାଟ୍ରୋଲିଂ ହେଉଛି ବୋଲି ବରିଷ଼୍ଠ ନାଗରିକ ମାନଙ୍କୁ କହିଥିଲେ ପୋଲିସ କମିଶନର ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
