ଭୁବନେଶ୍ବର: ରାଜଧାନୀର ଔଷଧ ଦୋକାନମାନଙ୍କରେ ଲୁଟ୍ ଘଟଣାର ପର୍ଦ୍ଦାଫାଶ କରିଛି କମିଶନରେଟ ପୋଲିସ । ଘଟଣାରେ ଜଡ଼ିତ ୪ ଜଣ ଆନ୍ତଃରାଜ୍ୟ ଅଭିଯୁକ୍ତଙ୍କୁ ଗୁରୁବାର ଗିରଫ କରାଯାଇଛି । ଅଭିଯୁକ୍ତଙ୍କ ନିକଟରୁ ନଗଦ ୩୯ ହଜାର ଟଙ୍କା, ଆଧାର କାର୍ଡ, ୨ଟି ଭୋଟର କାର୍ଡ, ୪ଟି ମୋବାଇଲ୍ ଜବତ ହୋଇଛି । ଆଜି ସେମାନଙ୍କୁ କୋର୍ଟ ଚାଲାଣ କରାଯିବା ନେଇ ସୂଚନା ଦେଇଛି କମିଶନରେଟ ପୋଲିସ ।
ଭୁବନେଶ୍ବର ରେଳ ଷ୍ଟେସନ ପାଖ ଏକ ଗେଷ୍ଟ ହାଉସ୍ ରେ ୨ଟି ରୁମ୍ ନେଇ ୩ଦିନ ରହିଥିଲେ । ପରେ ୨୦ ତାରିଖରେ ବଡ଼ଗଡ, ୨୧ ତାରିଖରେ ନୟାପଲ୍ଲୀ, ୨୨ ତାରିଖରେ ଶ୍ରୀଲିଙ୍ଗରାଜ ଏବଂ ୨୪ ତାରିଖରେ ଖାରବେଳ ନଗର ଥାନା ଅଞ୍ଚଳର ବିଭିନ୍ନ ଔଷଧ ଦୋକାନରୁ ଠକାମୀ କରି ଲୁଟ୍ କରିଥିଲେ । ସ୍ପେଶାଲ୍ ସ୍କ୍ବାଡ୍ ସହାୟତାରେ ଏହି ଅଭିଯୁକ୍ତମାନେ ଧରାପଡ଼ିବା ପରେ ଏହି ଘଟଣାର ପର୍ଦ୍ଦାଫାଶ ହୋଇଛି ।
ଏହି ଲୁଟେରାମାନେ ଗ୍ରାହକଭାବେ ଆସି ଲୁଟ୍ କରୁଥିଲେ । ପ୍ରଥମେ ଏକ ନିର୍ଦ୍ଦିଷ୍ଟ ଦୋକାନକୁ ଅନୁଧ୍ୟାନ କରନ୍ତି । ପରେ ୩ ଲୁଟେରାଙ୍କ ମଧ୍ୟରେ ପୂର୍ବ ଯୋଜନା ମୁତାବକ ଔଷଧ କିଣିବା ଆଳରେ ଦରଦାମ ଅଧିକ କମ୍ ମୂଲ୍ୟ ନେଇ ପାଟିତୁଣ୍ଡ କରିବା ସହିତ ଖସି ପଳାଉଥିଲେ । ଟଙ୍କା ଦେବାପରେ ଦୋକାନୀ ବଳକା ଟଙ୍କା ଫେରାବାକୁ ଅନ୍ୟମନସ୍କତାର ଫାଇଦା ଉଠାଇ ପୂର୍ବରୁ ଛକି ରହିଥିବା ଜଣେ ଲୁଟେରା ଦୋକାନରେ ପଶି କ୍ୟାଶ୍ କାଉଣ୍ଟରରୁ ଟଙ୍କା ନେଇ ଘଟଣାସ୍ଥଳରୁ ଫେରାର ହୋଇ ଯାଉଥିଲେ । ସମାନ ଢଙ୍ଗରେ ଅନ୍ୟ ଦୋକାନ ଗୁଡିକୁ ମଧ୍ୟ ଏହି ଗ୍ୟାଙ୍ଗ୍ ଲୁଟ କରିଛନ୍ତି ।
ଘଟଣାର ମାଷ୍ଟର ମାଇଣ୍ଡ ରାଜୁ ସିଂ ୧୪ ବର୍ଷ ହେଲା ବିବାହିତ । ବିବାହ ପୂର୍ବରୁ ସେ ପଶ୍ଚିମବଙ୍ଗର ଚବିଶପ୍ରଗଣା ଜିଲ୍ଲାର ବେଲଘରିଆ ଏବଂ ଥାକୁଡ଼ିଆ ଥାନାରେ ଏହିପରି ସମାନ ୪ଟି ମାମଲାରେ ଜେଲ୍ ଯାଇଥିଲା । ଲୁଟ୍ କରିଥିବା ସମସ୍ତ ଟଙ୍କା ନିଜ ଆକାଉଣ୍ଟରେ ଜମା କରନ୍ତି । ସହଯୋଗୀମାନେ ରାଜୁ ଘରକୁ ଯାଇ ସେମାନଙ୍କର ଭାଗ ଟଙ୍କା ଆଣିଥାନ୍ତି । ଗ୍ୟାଙ୍ଗ୍ ସମସ୍ତ ସଦସ୍ୟଙ୍କ ଶିକ୍ଷାଗତ ଯୋଗ୍ୟତା ସପ୍ତମ ଫେଲ୍ । ସମସ୍ତେ ଦିନ ମଜୁରିଆ ଏବଂ ରଙ୍ଗ ମିସ୍ତ୍ରୀ କାମ କରନ୍ତି । ଏହି ମାମଲା ତଦନ୍ତ ଜାରି ରହିଥିବା ବେଳେ ଅନ୍ୟ ସହଯୋଗୀଙ୍କୁ ଧରିବା ପାଇଁ ଉଦ୍ୟମ କରୁଛି ପୋଲିସ ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
