ହାଇଦ୍ରାବାଦ: ଗାଡି ଧରି ଘରୁ ବାହାରିଲେ ଛାତି ଧଡ ଧଡ । ରାସ୍ତାରେ ପୋଲିସ ଦେଖିଲେ ହାତ ଗୋଡ ଥରୁଛି । କାଳେ କେଉଁ ନିୟମରେ ଧରାପଡିଯିବୁ କି ? ଏଭଳି ଭୟରେ ଚାଳକ ଛାନିଆ । କାହିଁକି ବା ନ ହେବେ । ପହିଲାରୁ ନୂଆ ମୋଟର ଯାନ ଆଇନ ଲାଗୁ ନାଁରେ ଯେପରି ଜୋରିମାନା କଷୁଛନ୍ତି ଶୁଣିଲାବେଳକୁ କାନ ତାବଜା । କେବଳ ମେଟ୍ରୋସିଟି ନୁହେଁ ଓଡିଶା, ଉତ୍ତରପ୍ରଦେଶ , ହରିଆନା ଭଳି ରାଜ ରାସ୍ତାରେ ଗାଡି ଚଲାଇବା ଭାରୀ କାଠିକର ପାଠ । ଟ୍ରାଫିକ ନିୟମ ଉଲଙ୍ଘନ ଅଭିଯୋଗରେ କେଉଁଠି 25ହଜାର ଟଙ୍କାରେ ଅଟୋ କିଣି 47 ହଜାରର ଚାଲାଣ ଦେଉଛନ୍ତି ଚାଳକ ତ ପୁଣି କେଉଁଠି 15 ହଜାର ସ୍କୁଟିକୁ ଦେବାକୁ ପଡୁଛି 23 ହଜାର ଟଙ୍କାର ଫାଇନ। ଆଉ ଟ୍ରକ କଥା ତ ଛାଡ । ଓଭର ଲୋଡିଂ ଓ ଗାଡି ଫିଟନେସ ବାବଦକୁ କିଏ 2 ଲକ୍ଷ 500 ଟଙ୍କା ଦେଉଥିବା ବେଳେ କିଏ 1,41700 ଟଙ୍କା ଚାଲାଣ ଭରୁଛି ।
ସେହିପରି କିଛିଦିନ ତଳେ ଓଡିଶାରେ ମଧ୍ୟ 15ଟି ନିୟମ ଭାଙ୍ଗିଥିବା ଜଣେ ଅଟୋ ଚାଳକଙ୍କୁ 47500 ଟଙ୍କାର ଲମ୍ବା ଚଉଡା ଚାଲାଣ ଚିଠା ଧରାଇଦିଆଯାଇଥିଲା । ସମ୍ବଲପୁରରେ ଜଣେ ଟ୍ରକ ଚାଳକ ମଧ୍ୟ 86 ହଜାର ଟଙ୍କା ଜୋରିମାନା ଗଣିଥିଲେ । ସମାନଭାବେ ଯାହାକି ପୂରା ରାଜ୍ୟକୁ ହତବାକ କରିରଖିଦେଇଛି।
ନୂଆ ଟ୍ରାଫିକ ନିୟମ ଲାଗୁ ପରେ ଧରପଗଡ ଜୋର ହୋଇଛି । ପୋଲିସ, ଗାଡି ଚାଳକ ଓ ମାଲିକ ସମସ୍ତେ ସାବାଡ । ଚେକିଂକୁ କଡାକଡି ଯୋଗୁଁ ଚାଳକ 6 ଟଙ୍କା ଘୋଡାକୁ ଦାନା 9 ଟଙ୍କା ଭରୁଛନ୍ତି । ବହୁ ରାଜ୍ୟ ଏହି ନିୟମକୁ ଗ୍ରହଣ କରିନଥିବା ବେଳେ 10ଗୁଣା ଜୋରିମାନାକୁ ବିରୋଧ କରି ଭୁବନେଶ୍ବର ରାଜମହଲ ଛକରେ ତୁମ୍ବିତୋଫାନ ମଚିଯାଇଛିଲା । ଏପଟେ ନୂଆ ନିୟମ ଯୋଗୁଁ ପରେ ରାଜସ୍ବ ମଧ୍ୟ ଖସିବାକୁ ଲାଗିଲା । ଶେଷରେ ଓଡିଶା ସରକାର ନିୟମକୁ 3 ମାସ କୋହଳ କରି ପରିସ୍ଥତିକୁ ନିୟନ୍ତ୍ରଣ କରିଛନ୍ତି ।
ତେବେ ଆଗାମୀ ଦିନରେ କେନ୍ଦ୍ର ସରକାରଙ୍କ ଏଭଳି ନିଷ୍ପତ୍ତି ଦେଶର ସୁରକ୍ଷା ଓ ଅର୍ଥନୀତିକୁ କେତେ ଲାଭପ୍ରଦ ହେବ ତାହା ସମୟ ସାପେକ୍ଷ ।
ବ୍ୟୁରୋ ରିପୋର୍ଟ ଇଟିଭି ଭାରତ
