ଭୁବନେଶ୍ବର: ରାଜ୍ୟରେ ବିଭିନ୍ନ ଜଙ୍ଗଲରେ ନିଆଁ ଲାଗିବା ପ୍ରସଙ୍ଗକୁ ନେଇ ସାମ୍ନାକୁ ଆସିଛି ସାଙ୍ଘାତିକ ସତ୍ୟ । ଜଙ୍ଗଲରେ ଲାଗୁଥିବା ନିଆଁର ପ୍ରାକୃତିକ କାରଣ କମ ଥିବାବେଳେ ଅଧିକାଂଶ ମନୁଷ୍ୟକୃତ ବୋଲି ଜଣାପଡିଛି । ଏହି ସୂଚନା ଦେଇଛନ୍ତି ପିସିସିଏଫ ଶଶୀ ପଲ।
ତେବେ ଜଙ୍ଗଲରେ ଲାଗିଥିବା ନିଆଁ ଏବେ ନିୟନ୍ତ୍ରଣରେ ଅଛି । ବନ ବିଭାଗର କର୍ମଚାରୀମାନେ ଗ୍ରାଉଣ୍ଡରେ ରହିଛନ୍ତି । ଜଙ୍ଗଲରେ ନିଆଁ ଲାଗିବା ନେଇ ଖବର ଆସିଲେ, ତୁରନ୍ତ କର୍ମଚାରୀଙ୍କୁ ଘଟଣାସ୍ଥଳକୁ ପଠାଯାଉଛି ବୋଲି କହିଛନ୍ତି ପିସିସିଏଫ ଶଶୀ ପଲ ।
କିନ୍ତୁ ଏହା ଭିତରେ ଜଙ୍ଗଲ ନିଆଁ ନେଇ ସତ ସାମ୍ନାକୁ ଆସିଛି । ଯେଉଁଥିରୁ ଜଣାପଡୁଛି, ଲାଗିଥିବା ଜଙ୍ଗଲ ନିଆଁ ଅଧିକାଂଶ ମନୁଷ୍ୟକୃତ ନିଆଁ । ବିଭିନ୍ନ କାରଣରୁ ଲୋକ ନିଜେ ନିଆଁ ଲଗାଇଥିଲେ । ମହୁଲ ପାଇଁ ହେଉ ବା ଧାନ କିଆରୀରେ ନିଆଁ ଯୋଗୁଁ ଏହା ଜଙ୍ଗଲକୁ ବ୍ୟାପିଛି ।
ଏହାସହ ଶିକାର ପାଇଁ ମଧ୍ୟ ଜଙ୍ଗଲ ନିଆଁ ଲଗାଯାଇଥିବା ଜଣାପଡିଛି । ଏଥିରେ ବହୁ ଲୋକ ଗିରଫ ହୋଇଛନ୍ତି । ରାଜ୍ୟର ପ୍ରାୟ 40 ରୁ ଅଧିକ ଲୋକଙ୍କୁ ମଧ୍ୟ ଗିରଫ କରାଯାଇଛି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
