ଭୁବନେଶ୍ବର: କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରାଙ୍କୁ ଭୁବନେଶ୍ବରରେ ଛାତ୍ର କଂଗ୍ରେସର ବିରୋଧ ପରେ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ପ୍ରତିକ୍ରିୟା । ୟୁପିର ଲକ୍ଷ୍ମୀପୁର ଖେରିରେ ଯେଉଁ ଘଟଣା ଘଟିଲା କଂଗ୍ରେସ ତାହାକୁ ବିରୋଧ କରୁଛି। ମନ୍ତ୍ରୀ ପଦରୁ ଅଜୟ ମିଶ୍ରାଙ୍କ ବହିଷ୍କାର ଦାବି କରି ଆସୁଛି କଂଗ୍ରେସ ।
ସେହିପରି ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ଟାର୍ଗେଟ କରିଛନ୍ତି ପିସିସି ସଭାପତି । ମନ୍ତ୍ରୀଙ୍କ ରାୟପୁର ବାସଭବନରେ ମମିତା ମେହେରଙ୍କ ସହ ଗୋବିନ୍ଦଙ୍କ ମିଟିଂ ହୋଇଥିଲା କାହିଁକି ? ଦିବ୍ୟଶଙ୍କର ମିଶ୍ର ଜଣେ ମନ୍ତ୍ରୀ ହୋଇଥିବାରୁ ଡାକ ବଙ୍ଗଳା, ସର୍କିଟ ହାଉସ, ଗେଷ୍ଟ ହାଉସରେ ନରହି ସେ କାହିଁକି ରହୁଥିଲେ କଲେଜରେ? ମନ୍ତ୍ରୀ ଦିବ୍ୟଶଙ୍କର ଇସ୍ତଫା ଦିଅନ୍ତୁ ନହେଲେ ତାଙ୍କୁ ବହିଷ୍କାର କରାଯାଉ। ନଚେତ ଆଗକୁ ଛାତ୍ର, ଯୁବ ଓ ମହିଳା କଂଗ୍ରେସ ଏହିଭଳି ପ୍ରତିବାଦ ଜାରି ରଖିବ ବୋଲି କହିଛି ନିରଞ୍ଜନ ପଟ୍ଟନାୟକ।
ଅନ୍ୟପଟେ ମନ୍ତ୍ରୀ ଅଜୟ ମିଶ୍ରାଙ୍କୁ ଅଣ୍ଡାମାଡକୁ ନିନ୍ଦନୀୟ କହିଛି ବିଜେପି । ବିଜେପି ମୁଖପାତ୍ର ଦିଲ୍ଲୀପ ମହାନ୍ତି କହିଛନ୍ତି ଯେ, ଏହା କଂଗ୍ରେସର ପୁରୁଣା ପରମ୍ପରା, ସେଥିପାଇଁ ଆଜି ଦେଶରୁ ପୋଛିଯିବାକୁ ବସିଛି କଂଗ୍ରେସ ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
