ଭୁବନେଶ୍ବର: ରାଜ୍ୟ କଂଗ୍ରେସରେ ବିଦ୍ରୋହର ନିଆଁ । ବିଦ୍ରୋହୀ ଗୋଷ୍ଠୀ ଓ ପିସିସି ସଭାପତି ମୁହାଁମୁହିଁ । ଆଜି(ବୁଧବାର) ଏକ ନିର୍ଦ୍ଦିଷ୍ଟ ଗୋଷ୍ଠୀ କଂଗ୍ରେସରେ ନେତୃତ୍ବ ପରିବର୍ତ୍ତନ ସହିତ ନବକଳେବର ପାଇଁ ପ୍ରସ୍ତୁତ ହୋଇଥିବାବେଳେ ଏହି ପୁରୁଣା ରୋଗ ପାଇଁ ଦଳ ତିଷ୍ଠି ପାରୁନି ବୋଲି କହିଛନ୍ତି ସଭାପତି ନିରଞ୍ଜନ ପଟ୍ଟନାୟକ ।
କଂଗ୍ରେସକୁ ଫେରିଲା ପୁରୁଣା ରୋଗ । ପିସସି ସଭାପତି ବିରୋଧରେ ବିଦ୍ରୋହ । ସଭାପତି ବଦଳାଇ ନବକଳେବର ପାଇଁ ଅଣ୍ଟା ଭିଡିଛନ୍ତି ତୁଙ୍ଗ ନେତା । ସାମ୍ନାକୁ କିଛି କର୍ମୀଙ୍କୁ ଆଣି ପ୍ରଚ୍ଛଦ ପଟ୍ଟରେ ରହିଛନ୍ତି ମୁଖ୍ୟ ପୁରୋଧା । ଯାହାକୁ ନେଇ ରାଜ୍ୟ କଂଗ୍ରସରେ ଦେଖା ଦେଇଛି କମ୍ପନ । ଆଜି(ବୁଧବାର) ପାନ୍ଥ ନିବାସରେ କଂଗ୍ରେସର କିଛି ନେତା ଏକାଠି ହୋଇ ପିସିସିର ନବକଳେବର ପାଇଁ ଯୋଜନା ଚଲାଇଥିଲେ ।
ଏଠାରେ ପିସିସି ସଭାପତି ପରିବର୍ତ୍ତନ ସହ ମହମ୍ମଦ ମୋକିମ୍ଙ୍କୁ ଦଳର ସଭାପତି କରିବାକୁ ପ୍ରସ୍ତାବ ଆସିଥିବା ସୂଚନା ମିଳିଛି । ସେପଟେ ଏହା ଶୁଣି ଚମକି ଉଠିଛନ୍ତି ଖୋଦ ସଭାପତି ନିରଞ୍ଜନ ପଟ୍ଟନାୟକ । ସେ କହିଛନ୍ତି, ‘ଏହି ପୁରୁଣା ରୋଗ ପାଇଁ ଆଜି ଦଳ ତିଷ୍ଠି ପାରୁନି । ଦମ ଅଛି ତ ପରିବାରବାଦ ବନ୍ଦ କର । ପିସିସି ସଭାପତି ପାଇଁ କିଏ ଆଗ୍ରହୀ ସେ ତାଲିକା ମୋତେ ଦିଅ ମୁଁ ଏଆଇସିସିକୁ ଦେବି ।’
ତେବେ କିଛି ଦିନର ଅବ୍ୟାହତି ପରେ କଂଗ୍ରେସରେ ପୁଣି ପିସିସି ସଭାପତି ପରିବର୍ତ୍ତନ ଚର୍ଚ୍ଚା ଦଳକୁ କେତେ ସୁହାଇବ ତାହା ସମୟ କହିବ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
