ଭୁବନେଶ୍ବର: ରାଜ୍ୟ ସରକାର, କୃଷି ବିଭାଗ ଓ ବିଭାଗୀୟ ମନ୍ତ୍ରୀଙ୍କ ବିରୋଧରେ ରାଜ୍ୟ କଂଗ୍ରେସ ଆଜି ସାଂଘାତିକ ଅଭିଯୋଗ ଆଣିଛି । ରାଜ୍ୟ ସରକାରଙ୍କ ଚର୍ଚ୍ଚିତ ‘କାଳିଆ’ ଯୋଜନାକୁ ଟାର୍ଗେଟ କରିଛି କଂଗ୍ରେସ । କଂଗ୍ରେସ ଗଣମାଧ୍ୟମ ବ୍ୟାପାର ମୁଖ୍ୟ ସତ୍ୟ ପ୍ରକାଶ ନାୟକ ସରକାରୀ ତଥ୍ୟ ଆଧାରରେ କଳିଆ ଯୋଜନାରେ ହୋଇଥିବା ବ୍ୟାପକ ଅନିୟମିତତାର ପର୍ଦାଫାଶ କରିଛନ୍ତି ।
ଅଭିଯୋଗ କରି କହିଛନ୍ତି ବିଧାନସଭାର ପବିତ୍ର ଗୃହରେ କୃଷିମନ୍ତ୍ରୀ ଅରୁଣ ସାହୁ ମିଛ କହିଛନ୍ତି । ଚଳିତ ବିଧାନସଭାର ପ୍ରଥମ ଦିନର ତଥ୍ୟକୁ ଆଧାର କରି କଂଗ୍ରେସ ଅଭିଯୋଗ କରିଛି ବିଧାୟକ ଅଶ୍ବିନୀ ପାତ୍ର ପଚାରିଥିବା ପ୍ରଶ୍ନର ଉତ୍ତର ଦେବାକୁ ଯାଇ ମନ୍ତ୍ରୀ କହିଥିଲେ କାଳିଆ ଯୋଜନାରେ ପ୍ରଥମ କିସ୍ତି ପାଇଥିବା ହିତାଧିକାରୀଙ୍କ ସଂଖ୍ୟା ହେଉଛି ୫୧ଲକ୍ଷ ୫ ହଜାର ୨୯୦ । ପ୍ରଥମ କିସ୍ତି ଟଙ୍କା ବଣ୍ଟନ ପରେ ଯୋଗ୍ୟ ଅଯୋଗ୍ୟଙ୍କୁ ନେଇ ଅଭିଯୋଗ ହେବାପରେ କୃଷି ବିଭାଗ ଯାଞ୍ଚ କରି 45 ହଜାର 965 ଜଣ ଅଯୋଗ୍ୟ ହିତାଧିକାରୀଙ୍କୁ ବାଦ ଦେଇଛି ବୋଲି ମନ୍ତ୍ରୀ ଗୃହରେ ଉତ୍ତର ରଖିଥିଲେ । କିନ୍ତୁ ମନ୍ତ୍ରୀଙ୍କ ଏହି ଉତ୍ତରକୁ ଆଜି କଂଗ୍ରେସ ମିଛ ବୋଲି ପ୍ରମାଣିତ କରିବା ସହ ସାଂଘାତିକ ଅଭିଯୋଗ ଆଣିଛି ।
ସଦ୍ୟତମ ସରକାରୀ ଚିଠି ଓ ସୂଚନା ଅଧିକାରରେ ମିଳିଥିବା ତଥ୍ୟକୁ ନେଇ ଦଳ ଅଭିଯୋଗ କରିଛି କେବଳ 10 ଟି ଜିଲ୍ଲାରେ ଅଯୋଗ୍ୟ ହିତାଧିକାରୀ ହେଉଛନ୍ତି ୧ଲକ୍ଷ ୭୨ ହଜାର । କେବଳ ସୁବର୍ଣ୍ଣପୁର ଜିଲ୍ଲାରେ 37 ହଜାର ଅଯୋଗ୍ୟ ହିତାଧିକାରୀ ରହିଛନ୍ତି ବୋଲି ସତ୍ୟ ପ୍ରକାଶ ନାୟକ କହିଛନ୍ତି । ଏହାସହ ସେ କହିଛନ୍ତି ମନ୍ତ୍ରୀ ଗୃହରେ ଯେଉଁ ତଥ୍ୟଦେଇ କହିଛନ୍ତି 45 ହଜାର ହିତାଧିକାରୀଙ୍କ ମଧ୍ୟରେ 22କୋଟି ଟଙ୍କା ବଣ୍ଟନ ହୋଇଛି ତାହା 22 କୋଟି ନୁହେଁ 86 କୋଟି ବୋଲି ସତ୍ୟ ପ୍ରକାଶ କହିଛନ୍ତି ।
କଂଗ୍ରେସ ମୁଖପାତ୍ର ଆହୁରି ଅଭିଯୋଗ କରି କହିଛନ୍ତି ଏହା ମାତ୍ର 10 ଟି ଜିଲ୍ଲାର ତଥ୍ୟକୁ ଭିତ୍ତିକରି ଦଳ ଖୁଲାସା କରିଛି । ଯଦି 10 ଗୋଟି ଜିଲ୍ଲାରେ 1ଲକ୍ଷ ୭୨ ହଜାର ଅଯୋଗ୍ୟ ହିତାଧିକାରୀ 86 କୋଟି ଟଙ୍କା ନେଇଛନ୍ତି 30ଗୋଟି ଜିଲ୍ଲାରେ କେତେ ଅଯୋଗ୍ୟ ହିତାଧିକାରୀ ଅଛନ୍ତି ଆଉ କେତେ ଟଙ୍କା ନେଇଛନ୍ତି ବୋଲି ସେ ପ୍ରଶ୍ନ କରିଛନ୍ତି ? ଏହାସହ ଦାବି କରିଛନ୍ତି ବିଧାନସଭାକୁ ମିଛ କହିଥିବାରୁ ମନ୍ତ୍ରୀଙ୍କ ବିରୋଧରେ ସ୍ବାଧିକାରଭଙ୍ଗ ନୋଟିସ ଅଣାଯାଉ । 5‘ଟି’ ର ନାରା ଦେଉଥିବା ମୁଖ୍ୟମନ୍ତ୍ରୀ କୌଣସି ତଳିଆ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପରିବର୍ତ୍ତେ ଏଠି ସିଧା କୃଷିମନ୍ତ୍ରୀଙ୍କ ବିରୋଧରେ 5ଟିରେ ଥିବା ‘ଟ୍ରାନ୍ସପ୍ରେନ୍ସି’କୁ ପ୍ରୟୋଗ କରି ମନ୍ତ୍ରୀ ଅରୁଣ ସାହୁଙ୍କୁ ବହିଷ୍କାର କରନ୍ତୁ ବୋଲି ସେ ଦାବି କରିଛନ୍ତି । ସେ ଚେତାଇ ଦେଇ କହିଛନ୍ତି ଖୁବଶିଘ୍ର ଦଳ ପର୍ଯ୍ୟାୟକ୍ରମେ ଅବଶିଷ୍ଟ 20ଟି ଜିଲ୍ଲାର ତଥ୍ୟକୁ ନେଇ ଖୁଲାସା କରିବ ।
ସେପଟେ କଂଗ୍ରେସର ଅଭିଯୋଗକୁ ନେଇ କୃଷିମନ୍ତ୍ରୀ ଅରୁଣ ସାହୁ କହିଛନ୍ତି କଂଗ୍ରେସ କଣ ଅଭିଯୋଗ କରିଛି ତାହାର ତଥ୍ୟ ତାଙ୍କ ପାଖରେ ନାହିଁ । ଅଭିଯୋଗ ଦେଖିଲା ପରେ ଯାହା କିଛି କହିବେ ବୋଲି କହିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟ ଓ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
