ଭୁବନେଶ୍ବର: କୋରୋନା କାଳରେ ଚଳିତ ବର୍ଷ ରବି ଧାନ ଫସଲ ଫଳେଇବା ପାଇଁ ଚାଷୀ କମ କଷ୍ଟ କରିନାହିଁ । ଚାଷୀକୁ ବହୁ କଷ୍ଟ କରିବାକୁ ପଡିଛି । କୋରୋନାର ଭୟକୁ ବେଖାତିର କରି ସେ ଫସଲ ଫଳେଇଲା । ଧାନ ଅମଳ ବେଳକୁ ମାଡିଆସିଲା କାଳ ବୈଶାଖୀ । ପାଚିଲା ଧାନକୁ ପାଣିରୁ ଛାଣି ଆଣି ଅମଳ କରିବା ଓ ତାକୁ ଶୁଖେଇବା ପାଇଁ ନୟାନ୍ତ ହେଲା ଚାଷୀ । ତା ପରେ ପରେ ଆସିଲା ୟସ ବାତ୍ୟା । ଅମଳ ହୋଇଥିବା ଧାନକୁ ସୁରକ୍ଷିତ ରଖିବା ପାଇଁ ଝାଳ ନାଳ ହୋଇଗଲେ ଚାଷୀ । ମାତ୍ର ଏତିକିରେ ସେମାନଙ୍କ ଦୁର୍ଦଶାର ଅନ୍ତ ହେଲା ନାହିଁ । ଏବେ ଧାନ ବିକିବା ପାଇଁ ଦୁର୍ଦ୍ଦଶାର ସାମ୍ନା କରୁଛି ଚାଷୀ । ଆଗର ଦୁର୍ଦ୍ଦଶାର କାରଣ ଥିଲା ମହାମାରୀ କୋରୋନା ଏବଂ ପ୍ରକୃତି । ମାତ୍ର ଏବେ ସେମାନଙ୍କ ଦୁର୍ଦ୍ଦଶାର କାରଣ ହେଉଛନ୍ତି ସରକାର । ଆଜି ଏ ନେଇ ଏକ ବିଜ୍ଞପ୍ତି ଜରିଆରେ ନିଜର ଅସନ୍ତୋଷ ବ୍ୟକ୍ତ କରିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ ।
ନିରଞ୍ଜନ କହିଛନ୍ତି, ଚାଷୀଙ୍କ ଠାରୁ ଧାନ କିଣିବା କ୍ଷେତ୍ରରେ ଅଦ୍ଭୁତ ନୀତି ସରକାରଙ୍କର । ଚାଷୀ ଯାହା ଧାନ ଅମଳ କଲା, ସେଥିରୁ କେତେ ସରକାର କିଣିବେ ତାର ଠିକଣା ନାହିଁ । କାହାର କେତେ ଧାନ ଅମଳ ହେବ ତା ପାଇଁ ସରକାର ଆରଆଇ ମାନଙ୍କ ଦେଇ ଏକ ଆକଳନ କରିଥିଲେ । ରେଜିଷ୍ଟ୍ରସନ ପାଇଁ ପଟ୍ଟା ଏବଂ ଜମିର କାଗଜ ପତ୍ର ମାଗିଲେ । ସେଥିପାଇଁ ଚାଷୀ ମଧ୍ୟ କମ ଧାଁ ଧପଡ଼ କରିନାହିଁ । କିନ୍ତୁ ସେସବୁ ଚୁଲିକି ଗଲା । ଆକଳନ ମୁତାବକ ଟାର୍ଗେଟ ଆସିଲା ନାହିଁ । ସବୁ ଧାନ କିଣାଯିବ ନାହିଁ ବୋଲି ସରକାର ନିଷ୍ପତି କରି ଚାଷୀଙ୍କୁ ଶୁଣାଇଦେଲେ । କିନ୍ତୁ କେତେ କିଣାଯିବ କହିଲେ ନାହିଁ । କହିଲେ ଚାଷୀଙ୍କ ପାଖରେ ଟୋକନ ପହଞ୍ଚିବ । ଟୋକନ ପହଞ୍ଚିଲା । ମାତ୍ର ସେଥିରେ ଚାଷୀ ଅମଳ କରିଥିବା ଧାନର ଏକ ତୃତୀୟାଂଶ ମାତ୍ର ଦର୍ଶାଯାଇଥିଲା । ହେଲେ ତା ମଧ୍ୟ କିଣା ଗଲାନାହିଁ । ଟୋକନ ନେଇ ମଣ୍ଡିକୁ ଗଲାବେଳକୁ ମିଲ ବାଲା ଆସିଲା ନାହିଁ । ଫଳରେ ଅନେକ ଚାଷୀଙ୍କ ଟୋକନ ଅକାମି ହୋଇଗଲା । ଟୋକନ ବ୍ୟବସ୍ଥା ମଧ୍ୟ ଚାଷୀ ପାଇଁ ଏକ ପେଁଚ । ଆଗରୁ ଟୋକନ ବ୍ୟବସ୍ଥା ମାସେ ପର୍ଯ୍ୟନ୍ତ କାର୍ଯ୍ୟକ୍ଷମ ରହୁଥିଲା । ମାତ୍ର ଏବେ ତାକୁ ପନ୍ଦର ଦିନରେ ଅକାମି କରି ଦିଆଯାଉଛି । ଫଳରେ ସେହି ସମୟ ଭିତରେ ଚାଷୀ ମଣ୍ଡିରେ ଧାନ ବିକ୍ରି କରି ପାରିଲା ନାହିଁ । ତାହା ହିଁ ଅନେକ ଚାଷୀଙ୍କ କ୍ଷେତ୍ରରେ ହୋଇଛି ।
ଏମିତି ବି ଚାଷୀ ଅଛନ୍ତି ଯେଉଁ ମାନଙ୍କ ପାଖରେ ଏବେ ସୁଦ୍ଧା ମେସେଜ ପହଞ୍ଚି ନାହିଁ କି ଟୋକନ ବି ପହଞ୍ଚିନି । ସେମାନେ ସମସ୍ତେ ଧାନ ବିକିବା ପାଇଁ ଡହଳ ବିକଳ ହେଉଛନ୍ତି । ଏହା ସାଙ୍ଗକୁ ମିଲର ମାନଙ୍କ ମନମାନି । କେବେ ଧାନ ସେମାନେ ମଣ୍ଡିରୁ ନେବେ ତାର କୌଣସି ଠିକ ଠିକଣା ନାହିଁ । ଫଳରେ କେବେ ଧାନ ମପା ହେବ ସେ ବିଷୟରେ ଜାଣିବା ପାଇଁ ଚାଷୀ ମଣ୍ଡିକୁ ଦୌଡ଼ି ଦୌଡ଼ି ନୟାନ୍ତ ହେଉଛି । ଧାନ ବିକିଲା ବେଳେ ଚାଷୀଙ୍କ ଉପରେ ଜୁଲୁମ । ସେମାନେ କଟଣୀ ଓ ଛଟଣିର ଶିକାର ହେଉଛନ୍ତି । ଠାଏ ଠାଏ ୭/ ୮ କିଲୋ ଧାନ କଟା ଯାଉଛି । ସେମାନଙ୍କ ଧାନର ଗୁଣବତ୍ତା କୁଆଡେ ନାହିଁ । ସେଥିରେ ଆଦ୍ରତା ଅଛି ବୋଲି କୁହାଯାଉଛି । ସବୁ ଦୋଷ ଓ ବୋଝ ଚାଷୀଙ୍କ ଉପରେ ନଦି ଦେଉଛନ୍ତି ସରକାର । ଧାନ କିଣିଲା ବେଳେ ଅଖା ମିଲ ମାଲିକ ଦେବା କଥା କୁହାଯାଇଛି । ମାତ୍ର ତାହା ହେଉନାହିଁ । ଚାଷୀକୁ ଅଖା ସହ ଧାନ ଦେବାକୁ ପଡୁଛି । ଅଖା ପିଛା ୨୫ ଟଙ୍କା ଚାଷୀକୁ ଭରଣା କରିବାକୁ ପଡୁଛି । ଅଫିସର, ମିଲ ମାଲିକ ଆଉ ନେତା ଏକାଠି ହୋଇ ଚାଷୀଙ୍କୁ ଲୁଟ କରିବାରେ ଲାଗିଛନ୍ତି । ପ୍ରଦେଶ କଂଗ୍ରେସ ଚାଷୀଙ୍କ ଏହି ଦୁର୍ଦଶାକୁ ଅତ୍ୟନ୍ତ ଗୁରୁତ୍ୱର ସହିତ ନେଇଛି । ସରକାର ଯଦି ଏହାର ତୁରନ୍ତ ପ୍ରତିକାର ନ ନିଅନ୍ତି, ତେବେ ରାଜ୍ୟର ସମସ୍ତ ମଣ୍ଡି ଏବଂ ବ୍ଲକ ଅଫିସ ସାମ୍ନାରେ ଚାଷୀ ମାନେ ଶାନ୍ତିପୂର୍ଣ ଭାବରେ ଆନ୍ଦୋଳନ କରିବାକୁ ବାଧ୍ୟ ହେବେ । ଏ ନେଇ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ ଚେତାବନୀ ଦେଇଛନ୍ତି ।
ଅକାମି ହୋଇଥିବା ଟୋକନ ଗୁଡିକୁ ସଚଳ କରିବା, ଟୋକନ ପାଇନଥିବା ଚାଷୀଙ୍କୁ ଟୋକନ ଦେବା, ଚାଷୀ ଯେଉଁ ଧାନ ଉତ୍ପାଦନ କରିଛି ସେ ସମସ୍ତ ଧାନକୁ କିଣିବା, କଟଣୀ ଛଟଣୀ ବନ୍ଦ କରିବା, ଅଖାର ବୋଝ ଚାଷୀଙ୍କୁ ନଦେଇ ମିଲରକୁ ଭରଣା କରିବାକୁ ବାଧ୍ୟ କରିବା ଦାବୀ ଗୁଡିକ ପ୍ରତି ସରକାର ତୁରନ୍ତ ଦୃଷ୍ଟି ଦେଇ ପୂରଣ କରିବାକୁ ସେ ଦାବୀ କରିଛନ୍ତି । ଏବେ ମଣ୍ଡିରେ ଧାନ କିଣା ପ୍ରକ୍ରିୟାକୁ ସରକାର କେନ୍ଦ୍ରୀଭୂତ କରି ଭୁବନେଶ୍ୱରରୁ ନିୟନ୍ତ୍ରଣ କରୁଛନ୍ତି । ଫଳରେ ନାନା ପ୍ରକାରର ଅବ୍ୟବସ୍ଥା ଦେଖା ଦେଉଛି । ତେଣୁ ପୂର୍ବଭଳି ବିକେନ୍ଦ୍ରିତ ଢାଞ୍ଚାରେ ଧାନ କିଣା ପ୍ରକ୍ରିୟାକୁ ଚାଲୁ କରିବାକୁ ନିରଞ୍ଜନ ଦାବୀ କରିଛନ୍ତି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
