ଭୁବନେଶ୍ବର: ରାତି ପାହିଲେ ପାଟକୁରା ନିର୍ବାଚନ ପାଇଁ ପଡିବ ଭୋଟ । ଏଥିପାଇଁ ଚଳଚଞ୍ଚଳ ପାଟକୁରା ନିର୍ବାଚନୀ ମଣ୍ଡଳ । ଏପଟେ ନିର୍ବାଚନ ପୂର୍ବରୁ ଶୁକ୍ରବାର ସିଇଓଙ୍କୁ ଭେଟିଛି ବିଜେଡି । ଏଥିସହ ଦଳ ଡିଜିପିଙ୍କୁ ଭେଟି ଏକ ସ୍ମାରକ ପତ୍ର ମଧ୍ୟ ପ୍ରଦାନ କରିଛି । ଦଳ ପକ୍ଷରୁ ଅଭିଯୋଗ କରାଯାଇଛି ଯେ, ବିଜେପି ପକ୍ଷରୁ ୫୬ଟି ବୁଥ୍ କ୍ୟାପଚର ହେବାର ସମ୍ଭାବନା ରହିଛି । ତେଣୁ ଏହି ବୁଥ୍ ଗୁଡିକରେ ଅଧିକ ପୋଲିସ ଫୋର୍ସ ମୁତୟନ ସହ ସିସିଟିଭି ଲଗାଇବା ପାଇଁ ଦାବି କରିଛି ଦଳ ।
ଶନିବାର ପାଟକୁରାରେ ସକାଳ ୭ଟାରେ ଭୋଟ ଗ୍ରହଣ ଆରମ୍ଭ ହୋଇ ସଂନ୍ଧ୍ୟା ୬ଟାରେ ଶେଷ ହେବ । ପାଟକୁରାରେ ମୋଟ ୩୦୯ ଟି ପୋଲିଂ ଷ୍ଟେସନ ରହିଛି । ମୋଟ ୧୦ ଜଣ ପ୍ରାର୍ଥୀ ନିର୍ବାଚନ ମୈଦାନରେ ନିଜର ଭାଗ୍ୟ ପରୀକ୍ଷା କରିବେ । ମତଦାନ ପାଇଁ ନିର୍ବାଚନ ମଣ୍ଡଳରେ ୧୭୦୦ ପୋଲିଂ ଅଧିକାରୀଙ୍କୁ ନିୟୋଜିତ କରାଯାଇଛି ।
ଏହା ସହ ୫ଜଣ ଜୋନାଲ ସେକ୍ଟର ମାଜିଷ୍ଟେଟ ନିଯୁକ୍ତ ହୋଇଛନ୍ତି । ଏହି ନିର୍ବାଚନ ମଣ୍ଡଳୀରେ ମୋଟ ୧୩୮ଟି ଅତି ସମ୍ବେଦନଶୀଳ ବୁଥ୍ ରହିଛି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
