ଭୁବନେଶ୍ବର: ଚଳିତ ବର୍ଷର ମାଟ୍ରିକ ଛାତ୍ରଛାତ୍ରୀଙ୍କୁ ପାଠପଢାରେ ସହାୟତା ପାଇଁ ପରୀକ୍ଷା ଦର୍ପଣ ଟେଷ୍ଟ ପେପର ଯୋଗାଇ ଦେବାକୁ ନିଷ୍ପତ୍ତି ରହିଛି । ଗଣଶିକ୍ଷା ବିଭାଗ ପକ୍ଷରୁ ଫେବୃୟାରୀ 15 ସୁଦ୍ଧା ରାଜ୍ୟର ସମସ୍ତ ସ୍କୁଲରେ ପହଞ୍ଚିବ ଏହି ପୁସ୍ତକ । ପଶ୍ଚିମ ଓଡିଶାରୁ ପ୍ରାଥମିକ ଭାବରେ ପରୀକ୍ଷା ଦର୍ପଣ ପୁସ୍ତକ ବଣ୍ଟନ କରାଯାଇଥିବାବେଳେ ଏ ଯାଏଁ ବି ଏହା ଅନେକ ସ୍କୁଲରେ ପହଞ୍ଚି ପାରିନାହିଁ । ତେବେ ପରୀକ୍ଷା କବଚ ସଦୃଶ ଏହି ପୁସ୍ତକ କେବେ ଛାତ୍ରଛାତ୍ରୀଙ୍କ ନିକଟରେ ପହଞ୍ଚିବ ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ଏହି ଘଟଣାରେ ୟୁନିଟ 1ର ପ୍ରଧାନ ଶିକ୍ଷୟିତ୍ରୀ କହିଛନ୍ତି, ପରୀକ୍ଷା ଦର୍ପଣ ଶୁକ୍ରବାର ତାଙ୍କ ସ୍କୁଲରେ ପହଞ୍ଚି ଥିବାବେଳେ ବିଏମସି ଅଞ୍ଚଳସ୍ଥିତ ଦୁଇଟି ସ୍କୁଲରେ ପୁସ୍ତକଗୁଡିକ ପହଞ୍ଚି ପାରିଛି । ଏହି ଠାରୁ ରାଜଧାନୀର ଅନ୍ୟ ସମସ୍ତ ସ୍କୁଲକୁ ଏହି ବହି ପ୍ରେରଣ କରାଯିବାକୁ ବ୍ୟବସ୍ଥା କରାଯାଇଛି ।
ଅନ୍ୟପଟେ ଭୁବନେଶ୍ବର ବିଇଓ ସନ୍ତୋଷ ମିଶ୍ର କହିଛନ୍ତି ଯେ ଭୁବନେଶ୍ବରରେ ସମସ୍ତ ସ୍କୁଲକୁ ପରୀକ୍ଷା ଦର୍ପଣ ଦିଆଯିବ । ଏଥିପାଇଁ ଭୁବନେଶ୍ବରରେ ଦୁଇଟି ସ୍କୁଲକୁ ଚୟନ କରାଯାଇଛି । ସେହି ସ୍କୁଲରୁ ଅନ୍ୟ ସ୍କୁଲକୁ ବହିଗୁଡିକ ପଠାଯିବ ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
