ଭୁବନେଶ୍ବର: ଚଳିତ ବର୍ଷ ଦେଶ ପାଳନ କରିବାକୁ ଯାଉଛି 150ତମ ଗାନ୍ଧୀ ଜୟନ୍ତୀ । ଏଥିପାଇଁ ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ବାପୁଙ୍କ ଜନ୍ମଦିନ ପାଳନ କରିବା ପାଇଁ ଚାଲିଛି ସ୍ବତନ୍ତ୍ର ପ୍ରସ୍ତୁତି । ଚଳିତ ବର୍ଷ ଓଟିଡିସି ପକ୍ଷରୁ ଲୋୟର ପିଏମଜି ଠାରେ ଏକ ସ୍ୟାଣ୍ଡ ଆନିମେସନ ଶୋ' ର ଆୟୋଜନ କରାଯାଉଛି । ଏଥିସହିତ ଆସନ୍ତା ଦଶହରାକୁ ଓଡିଶା ଆସୁଥିବା ପର୍ଯ୍ୟଟକଙ୍କ ମନୋରଞ୍ଜନ ନିମନ୍ତେ 3 ଦିନିଆ ଦାଣ୍ଡିଆ ନୃତ୍ୟ ପାଇଁ ଆୟୋଜନ ହୋଇଛି ।
ଶନିବାର ପାନ୍ଥ ନିବାସ ଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଓଡିଶା ପର୍ଯ୍ୟଟନ ବିଭାଗ ନିର୍ଦ୍ଦେଶକ, ପାନ୍ଥ ନିବାସ ଏମଡି ନିର୍ମଳ ଚନ୍ଦ୍ର ମିଶ୍ର ଏବଂ ଓଟିଡିସି ଅଧ୍ୟକ୍ଷ ଶ୍ରୀମୟୀ ମିଶ୍ର ଏନେଇ ସୂଚନା ଦେଇଛନ୍ତି । ଆସନ୍ତା ସପ୍ତମୀ, ଅଷ୍ଟମୀ ଓ ନବମୀ ତିନି ଦିନ ଧରି ଭୁବନେଶ୍ବର ପାନ୍ଥ ନିବାସରେ ସନ୍ଧ୍ୟା 6ଟା 30ରୁ ରାତି 10ଟା ପର୍ଯ୍ୟନ୍ତ ଏହି ନୃତ୍ୟ ଆୟୋଜିତ ହେବ ।
ଏହି କାର୍ଯ୍ୟକ୍ରମ ଅବସରରେ ପର୍ଯ୍ୟଟକଙ୍କ ପାଇଁ ସ୍ବତନ୍ତ୍ର ଖାଦ୍ୟର ବ୍ୟବସ୍ଥା କରାଯାଇଛି । ଦାଣ୍ଡିଆରେ ଅଂଶଗ୍ରହଣ କରିବାକୁ ଥିବା ଟିକେଟର ମୂଲ୍ୟ ଜଣକ ପିଛା 699 ଓ ଦୁଇ ଜଣଙ୍କ ପିଛା 1299 ଟଙ୍କା ରହିଛି । ତେବେ ଏହି ଟଙ୍କା ପ୍ରତି ସନ୍ଧ୍ୟା ପାଇଁ ଦେବାକୁ ପଡିବ । ଏତଦବ୍ୟତୀତ ପର୍ଯ୍ୟଟକଙ୍କ ମନୋରଞ୍ଜନ ପାଇଁ କୌତୁକିଆ ଖେଳ ସହିତ ଲକି ଡ୍ର'ର ବ୍ୟବସ୍ଥା ରହିଛି । ପ୍ରତି ସନ୍ଧ୍ୟାରେ ଲକି ଡ୍ର' ବିଜେତାଙ୍କୁ ଦୁଇ ଦିନ ଓଡ଼ିଶାର ଯେକୌଣସି ପାନ୍ଥ ନିବାସରେ ମାଗଣାରେ ରହିବାର ସୁଯୋଗ ପାଇବେ ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
