ଭୁବନେଶ୍ବର: ଖରିପ ଋତୁ ଶେଷ ହୋଇ ରବିଚାଷ ପାଇଁ ଚାଷୀ ପ୍ରସ୍ତୁତ ହେଲାଣୀ । କିନ୍ତୁ ଖରିପ ଋତୁରେ ଚାଷୀ କରିଥିବା ଧାନ ଅମଳ ବର୍ତ୍ତମାନ ଯାଏଁ ସରକାର କିଣି ପାରିନାହାଁନ୍ତି । ଯଦିଓ ସରକାର ପୂର୍ବରୁ କହିଛନ୍ତି ମାର୍ଚ୍ଚ 31 ସୁଦ୍ଧା ସମସ୍ତ ଧାନ କ୍ରୟ କରିବେ ହେଲେ ସରକାରଙ୍କ ଭୁଲ ନିଷ୍ପତ୍ତି ଯୋଗୁଁ ଚାଷୀ ତଳିତଳାନ୍ତ ହେଲେଣି ।
ଚାଷୀ ଧାନ ଅମଳ କରିଛି । କିନ୍ତୁ ବିକ୍ରି କରିପାରୁନାହିଁ । ଯୋଗାଣ ବିଭାଗର ଟୋକନ ବ୍ୟବସ୍ଥା କୁ ଚାଷୀ ବିରୋଧ କରିଆସୁଛନ୍ତି । ହେଲେ ସରକାର ଚାଷୀଙ୍କ ଉପରେ ବଳପୂର୍ବକୁ ଟୋକନ ବ୍ୟବସ୍ଥା ଲଦି ଦେଇଛନ୍ତି । ଯଦ୍ବାରା ଚାଷୀ ବଳଶାଳୀ ହେବା ପରିବର୍ତ୍ତେ ଏବେ ଚିନ୍ତାରେ । ସେଥିରେ ପୁଣି ଅଦିନିଆ ବର୍ଷା ଚାଷୀଙ୍କ ଚିନ୍ତା ବଢାଇ ଦେଇଛି । ସରକାର ଚାଷୀଙ୍କ ସହ ଆଉ ଖେଳନ୍ତୁ ନାହିଁ । ନଚେତ ସ୍ଥିତ ସଂଗୀନ ହୋଇପଡିବ । ଏଭଳି ଭାବେ ଗୁରୁବାର ଶୁନ୍ୟକାଳରେ ବିରୋଧୀ ଦଳ ନେତା ପ୍ରଦୀପ୍ତ ନାୟକ ସରକାରଙ୍କୁ ଆକ୍ରମଣ କରିଥିଲେ ।
ବିରୋଧୀ ଦଳନେତାଙ୍କ ପ୍ରସଙ୍ଗକୁ ସମର୍ଥନ କରି କଂଗ୍ରେସ ବିଧାୟକ ଦଳନେତା ନରସିଂହ ମିଶ୍ର ମଧ୍ୟ ସରକାରଙ୍କୁ କଟୁ ସମାଲୋଚନା କରିଥିଲେ । ନରସିଂହ କହିଥିଲେ ବଲାଙ୍ଗୀର ଜିଲ୍ଲାରେ ଅଣଜଳସେଚିତ ଜମିରେ ଏକର ପିଛା ଚାଷୀ 13 କୁଇଣ୍ଟାଲ ଲେଖାଏଁ ଧାନ ସଂଗ୍ରହ କରୁଛନ୍ତି । ଜଳସେଚିତ ଅଞ୍ଚଳରୁ ଏକର ପିଛା 19 କୁଇଣ୍ଟାଲ ଲେଖାଏଁ ଧାନ ସଂଗ୍ରହ ହେବା କଥା। କିନ୍ତୁ ବଲାଙ୍ଗୀର ଜିଲ୍ଲାରେ ତାହା ହେଉନାହିଁ ବୋଲି ନରସିଂହ ଅଭିଯୋଗ କରିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
