ଭୁବନେଶ୍ବର: ପୁଣି ଥରେ ଗଣମାଧ୍ୟମକୁ ଲୋକସେବା ଭବନ ଓ ବିଧାନସଭା ଲବିକୁ ପ୍ରବେଶ ନେଇ ଗୃହରେ ଉଠିଲା ଦାବି । କାହିଁକି ଗଣମାଧ୍ୟମକୁ ଲୋକସେବା ଭବନ ଓ ବିଧାନସଭା ଲବିକୁ ପ୍ରବେଶ ପାଇଁ ଅନୁମତି ମିଳିବ ନାହିଁ ସେନେଇ ଆଜି ଶୂନ୍ୟକାଳରେ ଉଠାଇଥିଲେ କଂଗ୍ରେସ ବିଧାୟକ ଦଳ ନେତା ।
ଏନେଇ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି ବିଜେଡି ସରକାର ଗଣତନ୍ତ୍ରକୁ ହତ୍ୟା କରୁଛି। ସାଧାରଣ ଲୋକେ ସଚେତନ ହେବ ଦରକାର। ଗଣମାଧ୍ୟମକୁ ଜାଣିଶୁଣି ଲୋକସେବା ଭବନକୁ ପ୍ରବେଶ ପାଇଁ ଅନୁମତି ଦେଉନାହାଁନ୍ତି ।
ସେହିପରି କଂଗ୍ରେସ ବିଧାୟକ ଦଳନେତା ନରସିଂହ ମିଶ୍ର କହିଛନ୍ତି ସରକାର ବୋଧହୁଏ ଜାଣିଛନ୍ତି ସାମ୍ବାଦିକ ଲୋକସେବା ଭବନକୁ ପ୍ରବେଶ କଲେ ସରକାରଙ୍କ ମୁଖା ଖୋଲିଯିବ । ସେଇ ଭୟରେ ସରକାର ଜାଣିଶୁଣି ପ୍ରବେଶ ଉପରେ କଟକଣା ଲଗାଇଛନ୍ତି । ସାମ୍ବାଦିକଙ୍କ ସପକ୍ଷରେ ଦୃଢ ଯୁକ୍ତି ଉପସ୍ଥାପନା କରି ନରସିଂହ କହିଛନ୍ତି ସାମ୍ବାଦିକ ମାନେ ଖବର ସଂଗ୍ରହ ପାଇଁ ଲୋକସେବା ଭବନ ଓ ବିଧାନସଭା ଲବିକୁ ଆସନ୍ତି । ହେଲେ ଏହି ସରକାର ତାହାକୁ ମଧ୍ୟ କଟକଣା ଲଗାଇଛନ୍ତି । 2 ବର୍ଷ ହେଲା ଦାବି କରୁଛି । ଆଜି ମଧ୍ୟ ଦାବି କରିଛି । ବାଚସ୍ପତି କଣ ନିଷ୍ପତ୍ତି ନେଉଛନ୍ତି, ଅପେକ୍ଷା କରିଛୁ ବୋଲି କହିଛନ୍ତି ନରସିଂହ ।
ସେହିଭଳି ବିଜେପି ବିଧାୟକ ମୋହନ ମାଝୀ କହିଛନ୍ତି ବିଧାନସଭା ପ୍ରେସ ଗ୍ୟାଲେରୀକୁ ସାମ୍ବାଦିକଙ୍କୁ ପ୍ରବେଶ କରାଇ ନଦେବା ଦୁର୍ଭାଗ୍ୟ ଜନକ । ଏକଥା ଆମେ ସର୍ବଦଳୀୟ ବୈଠକରେ ମଧ୍ୟ ଉପସ୍ଥାପନା କରିଛୁ । ହେଲେ ସରକାର କୌଣସି ଚାପରେ ସାମ୍ବାଦିକଙ୍କୁ ପ୍ରବେଶ ପାଇଁ ଅନୁମତି ଦେଉନାହାଁନ୍ତି ।
ଅନ୍ୟପଟେ ସୂଚନା ଲୋକସମ୍ପର୍କ ମନ୍ତ୍ରୀ ରଘୁନନ୍ଦନ ଦାସ କହିଛନ୍ତି କୋଭିଡ ଭୟାବହତାକୁ ନଜରରେ ରଖି କଟକଣା କରାଯାଇଥିଲା । ମହାମାରୀ ଆଇନ ମଧ୍ୟ ପ୍ରତ୍ୟାହାର ହୋଇଛି । ନିଶ୍ଚିତ ଭାବରେ ସାମ୍ବାଦିକମାନେ ଗୃହ ମଧ୍ୟକୁ ଆସିବାର ଆବଶ୍ୟକତା ରହିଛି। ମୁଁ ଆଶା କରୁଛି ଖୁବଶୀଘ୍ର ଏହାର ବ୍ୟବସ୍ଥା ହେବ ବୋଲି ମନ୍ତ୍ରୀ କହିଛନ୍ତି ।
ଭୁବନେଶ୍ବରରୁ ରୁଦ୍ର ନାରାୟଣ ଦାସ ଓ ସଞ୍ଜୀବ ରାୟ, ଇଟିଭି ଭାରତ
