ଭୁବନେଶ୍ବର: ରାଜ୍ୟରେ ବେଲଗାମ ପିଆଜ ଦର । ପ୍ରତିଦିନ ରାଜ୍ୟରେ ହୁ ହୁ ହୋଇ ବଢିଚାଲିଛି ପିଆଜର ଦର । ସେପଟେ ନିୟନ୍ତ୍ରଣ କରିବା ପରିବର୍ତ୍ତେ ହାତ ଟେକିଦେଲେ ରାଜ୍ୟ ସରକାର । ଏବେ ପିଆଜ କିଲୋ ପ୍ରତି 60 ଛୁଇଁଥିବା ବେଳେ ଆଗକୁ ଆହୁରି କିଛିଦିନ ଦର ବୃଦ୍ଧି ହେବ ବୋଲି କହିଛନ୍ତି ଖୋଦ ବିଭାଗୀୟ ମନ୍ତ୍ରୀ ।
ପିଆଜ ଦରବୃଦ୍ଧି ପ୍ରସଙ୍ଗରେ ନିଜ ପ୍ରତିକ୍ରିୟା ରଖି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ଵାଇଁ କହିଛନ୍ତି ଯେ, 'ପିଆଜ ପାଇଁ ବାହାର ରାଜ୍ୟ ଉପରେ ନିର୍ଭର କରିବାକୁ ପଡୁଛି । କିନ୍ତୁ ମଣ୍ଡିରେ ଚଢା ଦର ଥିବା ଯୋଗୁଁ ଖାଉଟିଙ୍କ ଉପରେ ଏହାର ପ୍ରଭାବ ପଡୁଛି ।
ଓଡ଼ିଶାର ପିଆଜ ଉତ୍ପାଦନ ଆହୁରି କିଛିଦିନ ସମୟ ଲାଗିବ । ଏଭଳି ସ୍ଥିତିରେ ପିଆଜ ଦର ଆହୁରି ୬ ରୁ ୧୦ଟଙ୍କା ପର୍ଯ୍ୟନ୍ତ ବୃଦ୍ଧି ପାଇବାର ସମ୍ଭାବନା ରହିଛି । ତେବେ ଲୋକେ କିଭଳି କମ୍ ଦରରେ ପାଇବେ ସେନେଇ ଚିନ୍ତା କରାଯାଉଛି '।
ପାଇକାରୀ ଭଣ୍ଡାରରେ ଖାଉଟିଙ୍କୁ ସୁଲଭ ଦରରେ ପିଆଜ ଯୋଗାଇବାପାଇଁ ଚିନ୍ତା କରାଯାଇଛି ବୋଲି ମନ୍ତ୍ରୀ କହିଛନ୍ତି । ଏହାସହ ସାମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଛି । ଦରଦାମ ବୃଦ୍ଧିକୁ ନିୟନ୍ତ୍ରଣ ରଖିବା ପାଇଁ ସମସ୍ତ ଜିଲ୍ଲାପାଳ ମାନଙ୍କୁ ନିର୍ଦ୍ଦେଶ ଦିଆଯାଇଛି । ସେହିଭଳି ପନିପରିବା ଓ ଅତ୍ୟାବଶ୍ୟକୀୟ ଜିନିଷ ଉପରେ କଳାବଜାରୀ ରୋକିବା ପାଇଁ ବିଭାଗ ପକ୍ଷରୁ ପଦକ୍ଷେପ ନିଆଯାଉଛି ବୋଲି ମନ୍ତ୍ରୀ କହିଛନ୍ତି ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
