ଭୁବନେଶ୍ବର: କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ‘ଓ୍ବାନ ନେସନ ଓ୍ବାନ ଲାଙ୍ଗୁଏଜ’ ବୟାନକୁ ନେଇ ଜୋର ଧରିଛି ରାଜନୀତି । ୫ଟି ରାଜ୍ୟ ଶାହାଙ୍କ ମନ୍ତବ୍ୟକୁ ବିରୋଧ କରିଛନ୍ତି । ଓଡିଶାରେ ମଧ୍ୟ ଅନୁରୂପ ବିରୋଧ ଦେଖିବାକୁ ମିଳିଛି ।
ହିନ୍ଦୀ ଭାଷା ଦେଶର ରାଷ୍ଟ୍ରୀୟ ଭାଷା । ଅନ୍ତର୍ଜାତୀୟସ୍ତରରେ ଏହାର ପରିଚୟ ହେବା ଦାରକାର । ସେଥିପାଇଁ ସମସ୍ତ ଛାତ୍ରଛାତ୍ରୀ ହିନ୍ଦୀ କହିବା ଏବଂ ଶିଖିବା ଦରକାର । କେନ୍ଦ୍ର ଗୃହମନ୍ତ୍ରୀଙ୍କ ଏହି ବକ୍ତବ୍ୟ ଏବେ ରାଜନୀତିର କେନ୍ଦ୍ର ବିନ୍ଦୁ ପାଲିଟିଛି । ଯାହାକୁ ନେଇ ଏବେ ତାମିଲନାଡୁ, କର୍ଣ୍ଣାଟକ, କେରଳ ଓ ପଶ୍ଚିମବଙ୍ଗରେ ଜୋରଦାର ବିରୋଧ ଦେଖା ଦେଇଛି । ଏପଟେ ଓଡିଶାରେ ମଧ୍ୟ ଅନୁରୂପ ପ୍ରତିକ୍ରିୟା ଦେଖିବାକୁ ମିଳିଛି ।
କେନ୍ଦ୍ର ସରକାର ଆଞ୍ଚଳିକ ଭାଷାକୁ ନ୍ୟୁନ କରିବା ସହ ଦେଶ ଭିତରେ ଅଯଥା ଅପ୍ରୀତିକର ପରିସ୍ଥିତି ସୃଷ୍ଟି କରୁଛନ୍ତି ବୋଲି କଂଗ୍ରେସ କହିଛି । ବିଜେଡି କହିଛି, ବହୁ ଭାଷାର ଦେଶ ଭାରତ । ଆମ ରାଷ୍ଟ୍ରୀୟ ଭାଷା ହିନ୍ଦୀର ବିକାଶ ହେବା ଦରକାର । କିନ୍ତୁ ଆଞ୍ଚଳିକ ଭାଷାର ସମ୍ମାନ ମଧ୍ୟ ରହିବା ଉଚିତ ।
ଦେଶରେ ୨୨ଟି ଅନୁସୂଚିତ ଭାଷା ରହିଛି । ସର୍ବାଧିକ ୫୨.୮୩ କୋଟି ଲୋକ ହିନ୍ଦୀ ଭାଷା କହୁ୍ଥିବା ବେଳେ ବଙ୍ଗଳା ୯.୭୨କୋଟି, ମରାଠୀ ୮.୩ କୋଟି, ତେଲୁଗୁ ୮.୧୧କୋଟି, ଓଡିଆ ୩.୭୫କୋଟି ଲୋକ କୁହନ୍ତି । ବିଜେପିର ଯୁକ୍ତି ହେଉଛି, ହିନ୍ଦୀ ଭାଷା ସମସ୍ତେ କହିଲେ ଦେଶ ଏକତ୍ର ହେବ । ଆଞ୍ଚଳିକ ଭାଷା ଉପରେ ଏହାର କିଛି ପ୍ରଭାବ ପଡିବ ନାହିଁ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
