ଭୁବନେଶ୍ବର: ପ୍ରାର୍ଥୀ ଏକ ହେଲେ ପିତା ଅନେକ । ବିଏମସି ନିର୍ବାଚନ ପାଇଁ ୪୫ ନମ୍ବର ୱାର୍ଡରୁ ବିଜେଡି କର୍ପୋରେଟର ପ୍ରାର୍ଥୀଙ୍କ ପ୍ରାଥିତ୍ବ ଉପରେ ଏପରି ସାଂଘାତିକ ଅଭିଯୋଗ ଆଣିଛନ୍ତି ପ୍ରତିଦ୍ବନ୍ଦୀ ବିଜେପି ପ୍ରାର୍ଥୀ ଜ୍ୟୋତିରେଖା ନାୟକ ଓ ସ୍ୱାଧୀନ ପ୍ରାର୍ଥୀ ପ୍ରଶାନ୍ତ ନାୟକ । ୪୫ ନମ୍ବର ୱାର୍ଡ ପାଇଁ ବିଜୁ ଜନତା ଦଳ ପକ୍ଷରୁ କର୍ପୋରେଟର ପ୍ରାର୍ଥୀ ହୋଇଥିବା ଅମରେଶ ଜେନା ତାଙ୍କର ନାମାଙ୍କନ ପତ୍ରରେ ପିତା ସ୍ବର୍ଗତ ଉଲ୍ଲାସ ଜେନା ବୋଲି ସତ୍ୟପାଠ ଦାଖଲ କରିଛନ୍ତି ।
ଅନ୍ୟପକ୍ଷରେ ସେହି ସତ୍ୟପାଠରେ ତାଙ୍କ ନାମରେ ଥିବା ସ୍ଥାବର ସମ୍ପତ୍ତି ବିବରଣୀରେ ତାଙ୍କ ପିତାଙ୍କ ନାମ ହେମନ୍ତ କୁମାର ଜେନା ବୋଲି ଉଲ୍ଲେଖ ରହିଛି । ଏଣୁ ଜଣେ ବ୍ୟକ୍ତିର କିପରି ଦୁଇଟି ପିତା ରହିବେ ତାକୁ ନେଇ ପ୍ରଶ୍ନ ସ୍ବାଧୀନ ପ୍ରାର୍ଥୀ ପ୍ରଶାନ୍ତ ନାୟକ ।ନାମାଙ୍କନ ପତ୍ର ଯାଞ୍ଚ ସମୟରେ ଏହା ସାମ୍ନାକୁ ଆସିବା ପରେ ନିର୍ବାଚନ ଅଧିକାରୀ ଓ ବିରୋଧୀ କର୍ପୋରେଟର ପ୍ରାର୍ଥୀଙ୍କ ପକ୍ଷରୁ ନିଯୁକ୍ତି ହୋଇଥିବା ବରିଷ୍ଠ ଆଇନଜୀବୀ ଅରବିନ୍ଦ ମହାନ୍ତିଙ୍କ ସହ ମଧ୍ୟ ତର୍କ ହୋଇଥିଲା ।
ଖାଲି କେବଳ ସେତିକି ନୁହେଁ ଅମରେଶ ଜେନାଙ୍କ ନାମରେ ଥିବା ଜମି ପଟ୍ଟା ଓ ରେଜିଷ୍ଟ୍ରି ଦଲିଲର ସାର୍ଟିଫାଏଡ କପି ସହ ତାଙ୍କ ବିରୁଦ୍ଧରେ ରୁଜୁ ହୋଇଥିବା ୧୨ଟି କ୍ରିମିନାଲ କେସ ଗୁଡ଼ିକର କପି ଲିଖିତ ଭାବେ ନିର୍ବାଚନ ଅଧିକାରୀଙ୍କ ପାଖରେ ଓକିଲ ଦାଖଲ କରିଥିଲେ । ଜଣେ ବ୍ୟକ୍ତିଙ୍କ ସତ୍ୟପାଠରେ ଏପରି ଦୁଇ ଜଣ ପିତାଙ୍କ ନାମ ରହିବା ଓ ଏହାକୁ ନେଇ ନାମାଙ୍କନ ପତ୍ରରେ ସତ୍ୟ ପାଠ କରିବା ସଂପୂର୍ଣ୍ଣ ଆଇନ ବିରୋଧୀ ।
ଏଣୁ ସେ କରିଥିବା ନାମାଙ୍କନ ପତ୍ରକୁ ରଦ୍ଦ କରାଯାଉ ବୋଲି ଆଇନଜୀବୀ ଦୃଢ ଦାବି ଉପସ୍ଥାପନ କରିବା ପରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିର୍ବାଚନ ଅଧିକାରୀ ଜଣାଇଥିଲେ ବିଜେପି ପ୍ରାର୍ଥୀ । ଏପଟେ ଏସବୁ ଅଭିଯୋଗକୁ ଖଣ୍ଡନ କରିଛନ୍ତି ବିଜେଡି ପ୍ରାର୍ଥୀ ଅମରେଶ ଜେନା । ଉଭୟ ପ୍ରାର୍ଥୀଙ୍କ ପରାଜୟ ହେବା ଜାଣିବା ପରେ ଏହାକୁ ନେଇ ବିଭ୍ରାନ୍ତିକାରୀ ମନ୍ତବ୍ୟ ଦେଉଛନ୍ତି ବୋଲି ସେ କହିଛନ୍ତି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
