ଭୁବନେଶ୍ବର: କୋରୋନା ଆକ୍ରାନ୍ତ ଅଭିଷେକ ମହାପାତ୍ରଙ୍କ ପାଇଁ ସାହାଯ୍ୟ ମାଗିଲେ ଅଭିନେତ୍ରୀ ଝିଲିକ ଭଟ୍ଟାଚାର୍ଯ୍ୟ । ତାଙ୍କ ପାଇଁ ସାରା ଓଡିଶାବାସୀ ପ୍ରାର୍ଥନା କରୁଥିବା ବେଳେ ସହାୟତାର ହାତ ବଢ଼ାଇଛନ୍ତି ଝିଲିକ।
ଜାଣନ୍ତୁ ଅଭିଷେକଙ୍କ ପୁରା କାହାଣୀ:-
କିଛି ମାସ ତଳେ ଅଭିଷେକ ବିବାହ କରିଥିଲେ । ବିବାହର କିଛି ଦିନ ପରେ ସେ କୋରୋନାରେ ଆକ୍ରାନ୍ତ ହୋଇଥିଲେ । କୋରୋନାରେ ଆକ୍ରାନ୍ତ ହେବା ସହିତ ସେ ନିମୋନିଆରେ ମଧ୍ୟ ପୀଡ଼ିତ ଅଛନ୍ତି । ତାଙ୍କ ସ୍ବାସ୍ଥ୍ୟବସ୍ଥା ଗୁରୁତର ହେବା ପରେ ଇକମୋ ଚିକିତ୍ସା ପାଇଁ ଡାକ୍ତର କହିଥିଲେ । କିନ୍ତୁ ଏଥିଲାଗି ଆବଶ୍ୟକ କୋଟିଏରୁ ଅଧିକ ଟଙ୍କା । ସେଥିପାଇଁ ତାଙ୍କ ପତ୍ନୀ ସୋସିଆଲ ମିଡିଆରେ ସ୍ବାମୀଙ୍କ ପାଇଁ ସହାୟତା ଲୋଡିଥିଲେ ।
ଓଡିଶାବାସୀଙ୍କ ସହାୟତାରେ ସେ କୋଲକାତା ଟ୍ରିଟମେଣ୍ଟ ପାଇଁ ଯାଇ ପାରିଥିଲେ । ତାଙ୍କର ବର୍ତ୍ତମାନ କୋଲକାତାରେ ଇକମୋ ଚିକିତ୍ସା ଚାଲିଛି । ଆଉ ଏହି ସମୟରେ ଓଲିଉଡ ଅଭିନେତ୍ରୀ ଝିଲିକ ମହାପାତ୍ର ମଧ୍ୟ ତାଙ୍କ ପାଇଁ ସହାୟତାର ହାତ ବଢାଇଛନ୍ତି । ସେ ଏକ ଭିଡିଓ ପୋଷ୍ଟ କରିଛନ୍ତି । ଝିଲିକ ନିଜ ସକ୍ଷମ ଅନୁସାରେ ତାଙ୍କୁ ସାହାଯ୍ୟ କରିଥିବାର ସେ କହିଛନ୍ତି । ଏହା ସହିତ ସମସ୍ତଙ୍କୁ ଅଭିଷେକଙ୍କୁ ସହାୟତା ଯୋଗାଇବା ପାଇଁ ସେ ଅନୁରୋଧ କରିଛନ୍ତି ।
ଏହା ସହିତ ସେ ଜଗନ୍ନାଥଙ୍କ ପାଖରେ ଅଭିଷେକଙ୍କ ପାଇଁ ପ୍ରାର୍ଥନା କରିବାକୁ ସମସ୍ତଙ୍କୁ କହିଛନ୍ତି । ମହାମାରୀ ସମୟରେ ଆମେ ସମସ୍ତଙ୍କ ପାଖରେ ବିପଦରେ ଠିଆ ହେବା କଥା । ଆଜି ଯଦି ଆମେ କାହାକୁ ସାହାଯ୍ୟ କରିବା କାଲି ଆମେ କୌଣସି ଅସୁବିଧାରେ ପଡିଲେ ଉପରବାଲା ନିହାତି କାହାକୁ ନା କାହାକୁ ଆମ ସହାୟତା ପାଇଁ ପଠେଇବ । ଏହା ସହିତ ଅଭିଷେକଙ୍କ ପତ୍ନୀଙ୍କୁ ସାହାଯ୍ୟ କରିବା ପାଇଁ ଝିଲିକ ସମସ୍ତଙ୍କୁ ଅନୁରୋଧ କରିଛନ୍ତି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
