ଭୁବନେଶ୍ବର: କିଶନ ନଗର ଥାନା ସମ୍ମୁଖରେ ଜନୈକ ବ୍ୟକ୍ତିଙ୍କ ଆତ୍ମାହୁତି ଘଟଣାକୁ ନେଇ ନିଜ ଆଡୁ ମାମଲା ରୁଜୁ କରିଛନ୍ତି ରାଜ୍ୟ ମାନବାଧିକାର କମିଶନ। ଏହି ଘଟଣା ସମ୍ପର୍କରେ ରିପୋର୍ଟ ଦେବାକୁୂ ପୋଲିସ ଡିଜିଙ୍କୁ ନିର୍ଦ୍ଦେଶ ଦେଇଛନ୍ତି OHRC । ପରବର୍ତ୍ତୀ ତାରିଖ ସୁଦ୍ଧା ତଦନ୍ତ କରି ରିପୋର୍ଟ ଦେବାକୁ ଡିଜିଙ୍କୁ ନିର୍ଦ୍ଦେଶ ଦିଆଯାଇଛି ।
ଦୀର୍ଘ ଦିନ ଧରି ଲାଗି ରହିଥିବା ଜମିବାଡ଼ି ବିବାଦକୁ ନେଇ କଟକ ଇଷାଣି ବ୍ରହ୍ମପୁରର ଗୁଣନିଧି ବିଷୋୟୀ ନାମକ ବ୍ୟକ୍ତି ବାରମ୍ବାର ଥାନା ଦ୍ବାରସ୍ତ ହେଉଥିଲେ । ଏହାକୁ ନେଇ ପାରିବାରିକ କଳହ ମଧ୍ୟ ବଢ଼ି ଚାଲିଥିଲା । ହେଲେ ଥାନା ଅଧିକାରୀ ସମସ୍ୟାର ସମାଧାନ ନେଇ କୌଣସି ପଦକ୍ଷେପ ନେଉନଥିବା ଅଭିଯୋଗ ହୋଇଛି । ଏହାକୁ ସହ୍ୟ ନକରିପାରି ଥାନା ପରିସରରେ ଗୁଣନିଧି ଦେହରେ କିରୋସିିନ ଢାଳି ହୋଇ ନିଆଁ ଲଗାଇ ଦେଇଥିଲେ ।
ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି କଟକ ବଡ଼ ମେଡ଼ିକାଲରେ ଭର୍ତ୍ତି କରାଯାଇଥିଲା । ତାଙ୍କ ଶରୀରର ପ୍ରାୟ ୯୦ଭାଗ ଜଳିଯାଇଥିଲା । ପରେ ଏକ ଘରୋଇ ହସ୍ପିଟାଲ୍ରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି । ଏହି ଘଟଣା ପାଇଁ କିଶନ ନଗର ଥାନାଧିକାରୀ ସସ୍ମିତା ରଣାଙ୍କୁ ସିଧାସଳଖ ଦାୟୀ କରିଛନ୍ତି ସ୍ଥାନୀୟ ଲୋକେ ।
ବାରମ୍ବାର ଥାନାକୁ ଦୌଡିବା ପରେ ମଧ୍ୟ ଅଭିଯୋଗ ଶୁଣିବା ବଦଳରେ ଥାନରେ ତାଙ୍କୁ ମାନସିକ ନିର୍ଯାତନା ଦିଆ ଯାଇଥିବା ଅଭିଯୋଗ ହୋଇଛି । ଏହା ଏକ ଗମ୍ଭୀର ବିଷୟ ହୋଇଥିବାରୁ ରାଜ୍ୟ ମାନବାଧିକାର କମିଶନ ନିଜ ଆଡ଼ୁ ମାମଲା ଦାଖଲ କରିଛନ୍ତି ।
