ଭୁବନେଶ୍ବର: ମମିତା ନିଆଁ ଏବେ ପଲ୍ଲୀରୁ ବାହାରି ଦିଲ୍ଲୀ ଯାଏଁ ବ୍ୟାପିଛି । ଦିଲ୍ଲୀ ଯାଇ ମମିତାକୁ ନ୍ୟାୟ ଓ ମନ୍ତ୍ରୀ ଦିବ୍ଯଶଙ୍କର ମିଶ୍ରଙ୍କ ବହିଷ୍କାର ଓ ଗିରଫ ଦାବି କରିଛି ଓଡ଼ିଶା ଯୁବ କଂଗ୍ରେସ । ଏହି କ୍ରମରେ ଆଜି ଦିଲ୍ଲୀରେ ଆବାସିକ କମିଶନରଙ୍କ କାର୍ଯ୍ୟାଳୟ ଘେରାଉ କରିଛନ୍ତି ଯୁବ କଂଗ୍ରେସକର୍ମୀ । ଏହାକୁ ନେଇ ଆସନ୍ତା କାଲି (ନଭେମ୍ବର ୧୧ତାରିଖ) ଜନ୍ତରମନ୍ତରରେ ଗଣଧାରଣା ଦିଆଯିବ । ଏହାପରେ ମମିତା ହତ୍ୟାକାଣ୍ଡକୁ ନେଇ ରାଷ୍ଟ୍ରପତିଙ୍କୁ ସ୍ମାରକପତ୍ର ପ୍ରଦାନ କରିବ ଯୁବ କଂଗ୍ରେସ ।
ମମିତ ମେହେର ହତ୍ୟା ମାମଲାରେ ମୁଖ୍ୟ ଅଭିଯୁକ୍ତ ସହିତ ରାଜ୍ୟ ଗୃହ ରାଷ୍ଟ୍ରମନ୍ତ୍ରୀଙ୍କ ଘନିଷ୍ଠତା ରହିଛି । ଫଳରେ ପୋଲିସ ପ୍ରଶାସନ ଏହାର ନିରପେକ୍ଷ ତଦନ୍ତ ନକରିପାରେ । ରାଜ୍ୟ ସରକାର ମଧ୍ୟ ଦୋଷୀଙ୍କୁ ଘଣ୍ଟ ଘୋଡ଼ାଇବାରେ ଲାଗିଛି । ମାମଲାର ସାକ୍ଷ୍ୟ ପ୍ରମାଣ ନଷ୍ଟ କରାଯିବା ସହ ମୃତକଙ୍କ ପରିବାରକୁ ପ୍ରଭାବିତ କରାଯାଉଥିବା ଯୁବ କଂଗ୍ରେସ ଅଭିଯୋଗ କରିଛି ।
ରାଜ୍ୟରେ ମାଆ ଓ ଭଉଣୀମାନେ ଦିନକୁ ଦିନ ଅସୁରକ୍ଷିତ ହୋଇପଡ଼ିଲେଣି । ଖୋଦ୍ ରାଜ୍ୟ ସରକାର ଓ ମନ୍ତ୍ରୀଙ୍କ ଛତ୍ରଛାୟା ତଳେ ରହି ଅପରାଧୀମାନେ ହତ୍ୟା ଓ ଦୁଷ୍କର୍ମ ଭଳି ଜଘନ୍ୟ ଅପରାଧ ଘଟାଉଛନ୍ତି । ମମିତା ମେହେର ହତ୍ୟାକାଣ୍ଡରେ ମୁଖ୍ୟ ଅଭିଯୁକ୍ତ ସହିତ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ଘନିଷ୍ଠ ସମ୍ପର୍କ ରହିଛି । ପୋଲିସ ପ୍ରଶାସନ ଜାଣିଶୁଣି ଏହି ମାମଲାର ବହୁ ଗୁରୁତ୍ବପୂର୍ଣ ଦିଗକୁ ବଦଳାଉଥିବା ଅଭିଯୋଗ କରିଛନ୍ତି ଯୁବ କଂଗ୍ରେସ ସଭାପତି ସ୍ମୃତି ରଞ୍ଜନ ଲେଙ୍କା ।
ଏନେଇ ସାରା ରାଜ୍ୟରେ ଆନ୍ଦୋଳନ ଓ ଜନ ଅସନ୍ତୋଷ ପ୍ରକାଶ ପାଇଥିଲେ ମଧ୍ୟ ରାଜ୍ୟ ସରକାର କୌଣସି ଉତ୍ତର ଦାୟିତ୍ବ ନିର୍ବାହ କରୁନାହାନ୍ତି । ମନ୍ତ୍ରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ । ହେଲେ ଯୁବ କଂଗ୍ରେସ ମମିତାଙ୍କ ପରିବାରକୁ ନ୍ୟାୟ ପ୍ରଦାନ ଓ ଦୋଷୀଙ୍କୁ କଠୋର ଦଣ୍ଡ ଦେବା ପର୍ଯ୍ୟନ୍ତ ଲଢ଼େଇ ଯାଏଁ ରଖିବ । ନଭେମ୍ବର ୧୧ ତାରିଖରେ ଐତିହାସିକ ଜନ୍ତରମନ୍ତରରେ ଗଣଧାରଣା ଦିଆଯିବ । ଏହାକୁ ନେଇ ରାଷ୍ଟ୍ରପତିଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ଯୁବ କଂଗ୍ରେସ ସଭାପତି ସ୍ମୃତି ରଞ୍ଜନ ଲେଙ୍କା କହିଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
