ଭୁବନେଶ୍ବର: ଗତ ପାଞ୍ଚ ବର୍ଷରେ ରାଜ୍ୟରେ 1841 ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟ ବନ୍ଦ ହୋଇଛି। 10 କିମ୍ବା 10ରୁ କମ ଛାତ୍ରଛାତ୍ରୀ ଥିବା କାରଣରୁ ଏହି ବିଦ୍ୟାଳୟ ଗୁଡିକୁ ବନ୍ଦ କରାଯାଇଛି।
ବିଧାୟକ ସୁଶାନ୍ତ କୁମାର ବେହେରାଙ୍କ ପ୍ରଶ୍ନର ଉତ୍ତର ଦେଇ ଏହା କହିଛନ୍ତି ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ । ମନ୍ତ୍ରୀଙ୍କ ଉତ୍ତର ଅନୁସାରେ ୨୦୧୧-୧୨ ବର୍ଷ ବେଳକୁ ରାଜ୍ୟରେ ୩୭,୦୧୨ଟି ପ୍ରାଥମିକ ବିଦ୍ୟାଳୟ ଥିବାବେଳେ ବର୍ଷକୁ ବର୍ଷ ଏହା ହ୍ରାସ ପାଇ ୨୦୧୮-୧୯ ରେ ଏହା ୩୪,୯୨୩ ରେ ପହଞ୍ଚିଛି । କେବଳ ବିଦ୍ୟାଳୟ ନୁହେଁ ଏଠାରେ ପାଠ ପଢାଇବାକୁ ଥିବା ଶିକ୍ଷକଙ୍କ ସଂଖ୍ୟା ବି କମିବାରେ ଲାଗିଛି । ୨୦୧୧-୧୨ ମସିହାରେ ରାଜ୍ୟର ପ୍ରାଥମିକ ବିଦ୍ୟାଳୟ ଗୁଡିକରେ ୧ ଲକ୍ଷ ୩୩ ହଜାର ୨୬୨ ଜଣ ଶିକ୍ଷକ ଶିକ୍ଷୟତ୍ରୀ ଥିବାବେଳେ ସେତେବେଳେ ଛାତ୍ର ଓ ଶିକ୍ଷକଙ୍କ ଅନୁପାତ ୩୦:୧ ରହିଥିଲା । ତେବେ ୨୦୧୮-୧୯ ବର୍ଷ ବେଳକୁ ଶିକ୍ଷକଙ୍କ ସଂଖ୍ୟା ହ୍ରାସ ପାଇ ୧, ୨୯, ୮୪୧ ରେ ପହଞ୍ଚି ଥିବାବେଳେ ଏବେ ଛାତ୍ର ଓ ଶିକ୍ଷକଙ୍କ ଅନୁପାତ ୨୦:୧ ରହିଥିବା ସରକାରୀ ଭାବେ ଦର୍ଶାଯାଉଛି ।
ତେବେ ଛାତ୍ରଛାତ୍ରୀଙ୍କ ସଂଖ୍ୟା ହ୍ରାସ ପାଉଥିବାରୁ ଶିକ୍ଷକ-ଛାତ୍ରଛାତ୍ରୀଙ୍କ ଅନୁପାତ ଏଭଳି ସ୍ଥିତିରେ ପହଞ୍ଚିଥିବା କୁହାଯାଉଛି । କେବଳ ପ୍ରାଥମିକ ବିଦ୍ୟାଳୟ ନୁହେଁ, ଉଚ୍ଚ ପ୍ରାଥମିକ ବିଦ୍ୟାଳୟ କ୍ଷେତ୍ରରେ ମଧ୍ୟ ଅନୁରୂପ ସ୍ଥିତି ରହିଛି । ୨୦୧୪-୧୫ ମସିହା ଠାରୁ ରାଜ୍ୟରେ ଏହି ଧରଣର ବିଦ୍ୟାଳୟ ସଂଖ୍ୟା ହ୍ରାସ ପାଇବାରେ ଲାଗିଛି । ୨୦୧୪-୧୫ ବର୍ଷରେ ରାଜ୍ୟରେ ୨୨ ହଜାର ୪୯୭ ଟି ଉଚ୍ଚ ପ୍ରାଥମିକ ବିଦ୍ୟାଳୟ ଥିବାବେଳେ ୨୦୧୬-୧୭ ରେ ତାହା ୨୩ ହଜାର ୦୯୬ ରେ ପହଞ୍ଚିଥିଲା । ତେବେ ୨୦୧୮-୧୯ ବର୍ଷରେ ଏହା 21 ହଜାର ୭୮୧ ରେ ପହଞ୍ଚିଛି ।
ଆଶ୍ବସ୍ତିକର କଥା ହେଉଛି ଉଚ୍ଚ ମାଧ୍ୟମିକ ବିଦ୍ୟାଳୟ ଗୁଡିକରେ ଶିକ୍ଷକଙ୍କ ସଂଖ୍ୟା ବଢିବାରେ ଲାଗିଛି । ୨୦୧୧-୧୨ ବର୍ଷରେ ରାଜ୍ୟରେ ଉଚ୍ଚ ପ୍ରାଥମିକ ବିଦ୍ୟାଳୟରେ ୫୩, ୨୬୪ ଜଣ ଶିକ୍ଷକ ଶିକ୍ଷୟତ୍ରୀ ଥିବାବେଳେ ୨୦୧୮-୧୯ ବର୍ଷରେ ଏହି ସଂଖ୍ୟା ୭୫,୦୧୨ ରେ ପହଞ୍ଚିଛି ବୋଲି ମନ୍ତ୍ରୀ ବିଧାନସଭାରେ ସୂଚନା ଦେଇଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
