ଭୁବନେଶ୍ବର: ଦେଶରେ କୋରୋନାର ତୃତୀୟ ଲହର ନିଶ୍ଚୟ ଆସିବ । ବ୍ରିଟେନରେ ଯେପରି ଭାବେ ସଂକ୍ରମଣ ବଢୁଛି, ତୃତୀୟ ଲହର ସମ୍ଭାବନା ନିଶ୍ଚିତ । ଓମିକ୍ରନ ଭୟାବହତା ମଧ୍ୟରେ ଏଭଳି ଚାଞ୍ଚଲ୍ୟକର କଥା କହିଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ ନିରଞ୍ଜନ ମିଶ୍ର । ଏଥିସହ ଏହି ଲହରର ମୁକାବିଲା ଲାଗି ଓଡିଶା ସମର୍ଥ ବୋଲି ଡାକ୍ତର ମିଶ୍ର ଜଣାଇଛନ୍ତି (odisha is capable of fighting third wave of covid )।
ସେ କହିଛନ୍ତି, ରାଜ୍ୟ ତୃତୀୟ ଲହର ସାମ୍ନା କରିବାକୁ ସମ୍ପୂର୍ଣ୍ଣ ପ୍ରସ୍ତୁତ । ଯେତେ ରୋଗୀ ଚିହ୍ନଟ ହେଲେ ମଧ୍ୟ ଆମେ ସମସ୍ତଙ୍କୁ ସ୍ବାସ୍ଥ୍ୟସେବା ଯୋଗାଇ ଦେବୁ । ଯାହା ସରକାରଙ୍କର ନିୟମାବଳୀ ରହିଛି, ସେହି ଅନୁଯାୟୀ ବିଦେଶ ଫେରନ୍ତାଙ୍କ ସର୍ଭେଲାନ୍ସ ଚାଲିଛି । ଓମିକ୍ରନ ଚିହ୍ନଟ ପାଇଁ ଜିନମ ସିକ୍ୟୁଏନ୍ସିଂ ଆବଶ୍ୟକ ଥିବାରୁ ସିକ୍ୱେନ୍ସିଂ ପାଇଁ ଯାଉଥିବା ନମୁନା ସଂଖ୍ୟା ବଢାଇବାକୁ କୁହାଯାଇଛି । ଏବେ ସୁଦ୍ଧା ଆଟ ରିସ୍କ ଦେଶରୁ 15 ଶହରୁ ଅଧିକ ଲୋକ ରାଜ୍ୟକୁ ଆସିଥିବା ସ୍ବାସ୍ଥ୍ୟ ନିର୍ଦ୍ଦେଶକ (Odisha Public Health Director Niranjan Mishra) କହିଛନ୍ତି ।
ଓମିକ୍ରନର ଲକ୍ଷଣ କୋରୋନା ଲକ୍ଷଣ ସହ ସମାନ । ଦ୍ବିତୀୟ ଲହରରେ ଯେଉଁ ଟ୍ରିଟମେଣ୍ଟ କରାଯାଉଥିଲା, ତାହା ଏବେ ବି ରହିଛି । ଓମିକ୍ରନ ଜନିତ ଉଦବେଗ ଜନକ ସ୍ଥିତିର ମୁକାବିଲା ପାଇଁ ସ୍ବାସ୍ଥ୍ୟ ବିଭାଗର କ୍ଷମତା ରହିଛି । ରୋଗୀ ସଂଖ୍ୟା ବଢିଲେ ତଦନୁଯାୟୀ ଭିତ୍ତିଭୂମି ପରିସରକୁ ବ୍ୟାପକ କରାଯିବ । ପ୍ରାକ୍ ପ୍ରସ୍ତୁତି ପୂର୍ବକ ବର୍ତ୍ତମାନ ହସ୍ପିଟାଲଗୁଡିକରେ ପର୍ଯ୍ୟାପ୍ତ ପରିମାଣର ଅକ୍ସିଜେନ, ଜୁରୀରେ ଔଷଧ ମହଜୁଦ ରଖାଯାଇଛି । ନିୟମିତ ଭାବେ ସ୍ଥିତିର ତର୍ଜମା କରାଯାଉଛି । ସମସ୍ତ କୋଭିଡ ହସ୍ପିଟାଲ ଏବଂ ଘରୋଇ ହସ୍ପିଟାଲରେ ସ୍ବତନ୍ତ୍ର ଓମିକ୍ରନ ବ୍ଲକ ରଖିବାକୁ ନିର୍ଦ୍ଦେଶ ଦିଆଯାଇଛି । ଓମିକ୍ରନ ମୁକାବିଲା ନେଇ ରାଜ୍ୟ ସରକାରଙ୍କ ସମସ୍ତ ପ୍ରସ୍ତୁତି ସମ୍ପର୍କରେ ସୂଚନା ଦେଇଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
