ଭୁବନେଶ୍ବର: 10 ଦଫା ଦାବି ନେଇ ରାସ୍ତାକୁ ଓହ୍ଲାଇଲା ଓଡ଼ିଶା ଡ୍ରାଇଭର ମହାସଂଘ । ଦାବି ପୂରଣ ନେଇ ଆଜି ଲକ୍ଷ ଲକ୍ଷ ଡ୍ରାଇଭର ବିଧାନସଭା ସମ୍ମୁଖରେ ଗର୍ଜିଛନ୍ତି । ଏହି ଆନ୍ଦୋଳନରେ ୩୦ଟି ଜିଲ୍ଲାର ୩ ଲକ୍ଷରୁ ଊର୍ଦ୍ଧ୍ବ ଡ୍ରାଇଭର ସାମିଲ ହୋଇଛନ୍ତି । ଡ୍ରାଇଭରଙ୍କ ବିଶାଳ ସମାବେଶରେ ଖାକିମୟ ହୋଇଯାଇଛି ରାଜଧାନୀ ଭୁବନେଶ୍ବର ।
ଡ୍ରାଇଭରଙ୍କ ସୁରକ୍ଷା ପାଇଁ ସ୍ବତନ୍ତ୍ର ବ୍ୟବସ୍ଥା, ୫୫ ବର୍ଷରେ ପେନସନ ଲାଗୁ, ରାସ୍ତାରେ ୩୦କିମି ଭିତରେ ଶୌଚାଳୟ, ରାସ୍ତା ଉପରେ ଡ୍ରାଇଭର ମାନଙ୍କୁ ସୁରକ୍ଷା, ଡ୍ରାଇଭରଙ୍କ ମୃତ୍ୟୁ ହେଲେ ୨୦ଲକ୍ଷ ଇନସ୍ୟୁରାନ୍ସ, ଭାରିଯାନ ଚଳାଉଥିବା ଡ୍ରାଇଭରଙ୍କୁ ମାସିକ ପାରିଶ୍ରମିକ ୨୦ ହଜାର ଓ ଛୋଟଯାନ ଚଳାଉଥିବା ଡ୍ରାଇଭରଙ୍କୁ ୧୫ ହଜାର ପ୍ରଦାନ କରିବାକୁ ଦାବି କରିଛି ଓଡିଶା ଡ୍ରାଇଭର ମହାସଂଘ । ଏଥିସହ ଦୁର୍ଘଟଣାରେ ଆହତ ହେଲେ ୫ ଲକ୍ଷ ସହାୟତା ରାଶି, ଡ୍ରାଇଭରଙ୍କ ପିଲାଙ୍କୁ ମାଗଣା ଶିକ୍ଷା ଓ ଡ୍ରାଇଭର ମାନଙ୍କୁ ଇନ୍ଦିରା ଆବାସ ଯୋଜନାରେ ସାମିଲ ନେଇ ଦାବି ରଖିଛି ସଂଘ ।
୧୦ ଦଫା ଦାବିରେ ଡ୍ରାଇଭର ମହାସଂଘ ଆଜି ପଳାଶୁଣିରୁଏକ ବିଶାଳ ପଦଯାତ୍ରା ଆରମ୍ଭ କରି ବିଧାନସଭା ସମ୍ମୁଖରେ ପହଞ୍ଚି ଆନ୍ଦୋଳନ କରିଥିଲେ । ଏହାର ପ୍ରଭାବରେ ଯାତାୟତରେ ବାଧା ସୃଷ୍ଟି ହୋଇଥିଲା । ଡ୍ରାଇଭର ମହାସଂଘର ଆନ୍ଦୋଳନକୁ ଦୃଷ୍ଟିରେ ରଖି ନବୀନ ନିବାସ, ଲୋକସେବା ଭବନ ଓ ବିଧାନସଭା ସମ୍ମୁଖରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି ।
ସୂଚନା ଥାଉକି, ପୂର୍ବରୁୁ ଡ୍ରାଇଭର ଆସୋସିଏସନ୍ 10 ଦଫା ଦାବି ନେଇ ଭୁବନେଶ୍ୱର ପଦଯାତ୍ରା କରିଥିଲା । ବୁଝାସୁଝା ପରେ ଆନ୍ଦୋଳନକୁ ସ୍ଥଗିତ ରଖିଥଲା ସଂଘ । ପଞ୍ଚାୟତ ନିର୍ବାଚନ ପରେ ସେମାନଙ୍କ ଦାବି ଉପରେ ବିଚାର କରାଯିବ ବୋଲି କୁହାଯାଇଥିଲା । ହେଲେ ନିର୍ବାଚନ ପରେ ସେମାନଙ୍କ ଦାବି ପୂରଣ ଦିଗରେ ସରକାର କୌଣସି ପଦକ୍ଷେପ ନ ନେବାରୁ ପୁଣି ଆନ୍ଦୋଳନକୁ ଓହ୍ଲାଇଛି ସଂଘ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
