ଭୁବନେଶ୍ବର: ପୂର୍ବତନ କେନ୍ଦ୍ର ଅର୍ଥମନ୍ତ୍ରୀ ଅରୁଣ ଜେଟଲୀଙ୍କ ବିୟୋଗ କାରଣରୁ ଅଗଷ୍ଟ 25 ତାରିଖରେ ହେବାକୁ ଥିବା ରାଜ୍ୟ ବିଜେପିର କର୍ମଶାଳାକୁ ସ୍ଥଗିତ ରଖାଯାଇଛି । ଦଳୀୟ କାର୍ଯ୍ୟାଳୟରେ ସାଙ୍ଗଠନିକ ନିର୍ବାଚନ ପାଇଁ ଅନୁଷ୍ଠିତ ହେବାକୁ ଥିବା ରାଜ୍ୟସ୍ତରୀୟ କର୍ମଶାଳାକୁ ରାଜ୍ୟ ସଭାପତି ବସନ୍ତ ପଣ୍ଡାଙ୍କ ନିର୍ଦ୍ଦେଶକ୍ରମେ ସ୍ଥଗିତ ରଖାଯାଇଛି ।
ଅରୁଣ ଜେଟଲୀ ବାଜପେୟୀ ଏବଂ ମୋଦିଙ୍କ ସରକାରରେ କେନ୍ଦ୍ର ମନ୍ତ୍ରୀ ଭାବେ ଦାୟିତ୍ବ ନିର୍ବାହ କରିଥିଲେ । ଅର୍ଥ, ପ୍ରତିରକ୍ଷା, ଆଇନ ପରି ସର୍ବୋଚ୍ଚ ବିଭାଗର ଦାୟିତ୍ବରେ ଥିଲେ ଅରୁଣ । ବିଜେପିର ଏହି ବରିଷ୍ଠ ନେତାଙ୍କ ବିୟୋଗ ସମସ୍ତଙ୍କୁ ମର୍ମାହତ କରିଛି । ତେଣୁ ରବିବାର ଅନୁଷ୍ଠିତ ହେବାକୁ ଥିବା ରାଜ୍ୟ ବିଜେପିର କର୍ମଶାଳାକୁ ସ୍ଥଗିତ ରଖାଯାଇଛି ।
କାର୍ଯ୍ୟକ୍ରମ କେଉଁ ତାରିଖରେ ହେବ ତାହା ଧାର୍ଯ୍ୟ ହୋଇନଥିବା ବେଳେ ଆଗାମୀ ସମୟରେ ଜଣାଇ ଦିଆଯିବ ବୋଲି ରାଜ୍ୟ ବିଜେପି ସହ ନିର୍ବାଚନ ଅଧିକାରୀ ଓ ମୁଖପାତ୍ର ସୁଦୀପ୍ତ ରାୟ ସୂଚନା ଦେଇଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
