ଭୁବନେଶ୍ବର: ଲୋକସେବା ଭବନରେ ମୁଖ୍ୟମନ୍ତ୍ରୀଙ୍କ ଦ୍ବାରା ସମ୍ବର୍ଦ୍ଧିତ ହୋଇଛନ୍ତି ଓଡିଆ ଯବାନ ସଂଗ୍ରାମ ଜେନା । ଦୁଃସାହାସିକ କ୍ରୀଡା ପ୍ରଦର୍ଶନ କରି ସେ ବିଶ୍ବ ରେକର୍ଡ ସୃଷ୍ଟି କରିଛନ୍ତି ।
ସୂଚନାନୁସାରେ, ଯାଜପୁର ବରୀ ବ୍ଲକ୍ ଅନ୍ତର୍ଗତ ବାଲିଆ ଗ୍ରାମର ଯୁବକ ତଥା ଭାରତୀୟ ସେନାରେ କାର୍ଯ୍ୟରତ ଯବାନ ସଂଗ୍ରାମ କେଶରୀ ଜେନା । ରୟାଲ ଏନଫିଲ୍ଡ ଗାଡ଼ିରେ ଲାଗିଥିବା 11 ଫୁଟ ସିଡିରେ 128 କିଲୋମିଟର ଓଲଟା ଯାଇ ବିଶ୍ବ ରେକର୍ଡ ସୃଷ୍ଟି କରିଛନ୍ତି ସେ । ବିଶ୍ବ ରେକର୍ଡ ସ୍ଥାପନ ପୂର୍ବକ ତାଙ୍କ ନାଁ ଗିନିଜ ବୁକ୍ ଅଫ୍ ୱାର୍ଲ୍ଡ ରେକର୍ଡରେ ସାମିଲ ହୋଇଛି ।
ସେନାର ସିଗ୍ନାଲ ବିଭାଗରେ କାର୍ଯ୍ୟରତ ସଂଗ୍ରାମ ଡେୟାର ଡେଭିଲ ଟିମ୍ରେ ସାମିଲ ହୋଇ ମଧ୍ୟପ୍ରଦେଶର ଜବଲପୁର ଠାରେ ଆୟୋଜିତ ଏକ ଡେୟାର ଡେଭିଲ ଶୋ'ରେ ଅଂଶଗ୍ରହଣ କରିଥିଲେ । ଚଳନ୍ତା ବୁଲେଟ୍ ଗାଡିରେ 11 ଫୁଟ ଉଚ୍ଚ ସିଡି ଉପରେ ସେ ଓଲଟା ଠିଆ ହୋଇ ୪ ଘଣ୍ଟା ୨୯ ମିନିଟ୍ ୪୫ ସେକେଣ୍ଡ୍ରେ ୧୨୮ କିଲୋମିଟର ପରିକ୍ରମା କରିଥିଲେ । ଯାହା ତାଙ୍କୁ ଆଜି ଏହି ରେକର୍ଡର ଅଧିକାରୀ କରିପାରିଛନ୍ତି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
