ଭୁବନେଶ୍ବର: ଏଣିକି ବାସଗୃହ ଓ ବିଲ୍ଡିଂର ଅଗ୍ନି ନିରାପତ୍ତା ପ୍ରମାଣ ପତ୍ର ପାଇଁ ଯିବାକୁ ପଡିବନି ଅଗ୍ନିଶମ ସେବା ନିର୍ଦ୍ଦେଶାଳୟ । ବିଭାଗର କ୍ଷେତ୍ରୀୟ କର୍ମଚାରୀମାନେ ଏଥିପାଇଁ ଦେଇପାରିବେ ଆବଶ୍ୟକୀୟ ପ୍ରମାଣପତ୍ର । ବିଭିନ୍ନ ବାସଗୃହ ଓ ବିଲ୍ଡିଂରେ ଅଗ୍ନି ସୁରକ୍ଷା କ୍ଷେତ୍ରରେ ଅଧିକ ସଚେତନ ଓ ସୁରକ୍ଷିତ ବ୍ୟବସ୍ଥା ପାଇଁ ଆବଶ୍ୟକ ଅନୁମୋଦନ ଓ ପ୍ରମାଣ ପତ୍ର ପ୍ରଦାନ ଅଧିକାର କ୍ଷେତ୍ରୀୟ ଅଧିକାରୀଙ୍କୁ ଦିଆଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ଏହି ନିଷ୍ପତ୍ତି ନିଆଯାଇଛି ।
ଏହି ନିଷ୍ପତ୍ତି ପରେ ଦୈନନ୍ଦିନ ଚଳନି ଓ ବ୍ୟବସାୟରେ ସହଜତା ଆସିପାରିବ । ରାଜ୍ୟ ସରକାରଙ୍କ ୫'ଟି' ନୀତି ଅନୁସାରେ ଏହି ପ୍ରକ୍ରିୟାକୁ ସରଳ କରାଯାଇଛି । ନୂଆ ନିୟମ ଅନୁଯାୟୀ ଆବଶ୍ୟକୀୟ ପ୍ରକ୍ରିୟା ଅନୁସରଣ କରି ଆବେଦନ ଗ୍ରହଣ କରିବାର 18 ଦିନ ମଧ୍ୟରେ ପ୍ରମାଣପତ୍ର ପ୍ରଦାନ କରିପାରିବେ କ୍ଷେତ୍ରୀୟ କର୍ମଚାରୀ । ତେବେ ଏହି ପ୍ରମାଣ ପତ୍ର ଅବଧି 2 ବର୍ଷ ପର୍ଯ୍ୟନ୍ତ ରହିବ । ସେହିପରି ଆବାସିକ କୋଠାବାଡି କ୍ଷେତ୍ରରେ ଏହି ପ୍ରମାଣ ପତ୍ର ୫ ବର୍ଷ ପର୍ଯ୍ୟନ୍ତ ରହିବ । ୨୦୨୦ ଏପ୍ରିଲ ସୁଦ୍ଧା ଅଗ୍ନି ସୁରକ୍ଷା ଅନୁମୋଦନ ଓ ପ୍ରମାଣ ପତ୍ର ପ୍ରଦାନର ସମସ୍ତ ବ୍ୟବସ୍ଥା ଅନଲାଇନ ମାଧ୍ୟମରେ କରିବା ପାଇଁ ନିଷ୍ପତ୍ତି ହୋଇଛି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
