ଭୁବନେଶ୍ବର: ବାତ୍ୟା ଆଶ୍ରୟସ୍ଥଳୀ ହେଉଛି, ହେଲେ କିନ୍ତୁ ମରାମତି ହେଉନି । ଏପରିକି ବାତ୍ୟା ଆଶ୍ରୟସ୍ଥଳୀକୁ ସବୁଦିନିଆ ରାସ୍ତା ନାହିଁ। ଏନେଇ ଦଳମତ ନିର୍ବିଶେଷରେ ସବୁ ଦଳର ବିଧାୟକ ଅସନ୍ତୋଷ ପ୍ରକାଶ କରିଛନ୍ତି । ଆଜି ପ୍ରଶ୍ନକାଳରେ ବାତ୍ୟା ଓ ବନ୍ୟା ମୁକାବିଲା ପାଇଁ ରାଜ୍ୟ ସରକାରଙ୍କୁ ବିଶ୍ବ ପ୍ରଶଂସା କରୁଥିବା ବେଳେ ବିପଦସଙ୍କୁଳ ଅବସ୍ଥାରେ ବାତ୍ୟା ଆଶ୍ରୟସ୍ଥଳ ରହିଥିବାରୁ ବିଧାୟକ ଉଦବେଗ ପ୍ରକାଶ କରିଛନ୍ତି।
1999 ମହାବାତ୍ୟା ପରେ 6ଟି ଉପକୂଳ ଜିଲ୍ଲା ଯଥା ବାଲେଶ୍ବର, ଭଦ୍ରକ, କେନ୍ଦ୍ରାପଡ଼ା, ଖୋର୍ଦ୍ଧା, ନୟାଗଡ଼ ଓ ଗଞ୍ଜାମରେ 694ଟି ବହୁମୁଖୀ ଆଶ୍ରୟସ୍ଥଳୀ ଓଡିଶା ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ(OSDMA) ପକ୍ଷରୁ ନିର୍ମାଣ କରିଛନ୍ତି ରାଜ୍ୟ ସରକାର। ସେହିପରି 65ଟି ରେଡ କ୍ରସ ନିର୍ମାଣ କରିଛି । ସମୁଦାୟ 759ଟି ବହୁମୁଖୀ ଆଶ୍ରୟସ୍ଥଳୀ ଓଡ଼ିଶାରେ ଅଛି ବୋଲି ରାଜସ୍ବ ମନ୍ତ୍ରୀ ସୁଦାମ ମାର୍ଣ୍ଡ କହିଛନ୍ତି।
ବର୍ତ୍ତମାନ ଆଶ୍ରୟସ୍ଥଳୀର ମରାମତି ଦାୟିତ୍ବ କୌଣସି ବିଭାଗ ନେଉନାହାଁନ୍ତି। ଏପରିକି ସେଠାରେ ପାନୀୟ ଜଳ ଓ ବିଦ୍ୟୁତ ସଂଯୋଗ ନାହିଁ। ଏନେଇ ବିଧାୟକଙ୍କ ଉଦବେଗକୁ ଦୃଷ୍ଟିରେ ରଖି ବିଭାଗୀୟ ମନ୍ତ୍ରୀ କହିଥିଲେ ଯେ, ଏବେ ସବୁ ଆଶ୍ରୟସ୍ଥଳୀର ମରାମତି ପାଇଁ ଅଡିଟ ହେଉଛି। ଏହା ସହ ଆଗକୁ ମରାମତି ଦାୟିତ୍ବ ପଞ୍ଚାୟତ ଓ ବ୍ଲକକୁ ଦେବାକୁ ଆଲୋଚନା ଚାଲିଛି ବୋଲି କହିଛନ୍ତି ବିଭାଗୀୟ ମନ୍ତ୍ରୀ।
ଭୁବନେଶ୍ବରରୁ ଅଜିତ ଦାସ, ଇଟିଭି ଭାରତ
