ଭୁବନେଶ୍ବର: ଆପୋଲୋ ହସ୍ପିଟାଲର ଲାଇସେନ୍ସ ବାତିଲ କର । 4 ସପ୍ତାହ ମଧ୍ୟରେ କାର୍ଯ୍ୟାନୁଷ୍ଠାନ ନେବାକୁ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ଜାତୀୟ ମାନବାଧିକାର କମିଶନ । ଏଥିସହିତ ଅଭିଯୋଗକାରୀଙ୍କୁ 2 ଲକ୍ଷ ଟଙ୍କାର କ୍ଷତିପୂରଣ କାହିଁକି ଦିଆନଯିବ ସେ ନେଇ କାରଣ ଦର୍ଶାଅ ନୋଟିସର ଉତ୍ତର 2 ମାସ ଭିତରେ ରଖିବା ପାଇଁ କହିଛନ୍ତି । ଯାହାକି ଏବେ ସରକାରଙ୍କ ନିଦ ହଜାଇ ଦେଇଛି ।
ବେଆଇନ କିଡନୀ ପ୍ରତିରୋପଣ ପାଇଁ ଏଭଳି ନିର୍ଦ୍ଦେଶ ଦେଇଛନ୍ତି କମିଶନ । ପୂରା ଘଟଣା ଥିଲା ଏହିପରି । ଆପୋଲୋ ହସ୍ପିଟାଲରେ ନିଜ କିଡନୀ ପ୍ରତିରୋପଣ ପାଇଁ ଆଡ଼ମିଶନ ହୋଇଥିଲେ ରାଘବ ରାମ ଦୋରା । ତାଙ୍କୁ କିଡନୀ ଦେଇଥିଲେ ଅନୀଲ ସ୍ବାମୀ । ହେଲେ କାଗଜ ପତ୍ରରେ ଲେଖାଗଲା ଜୟରାମ ଦୋରାଙ୍କ ନାମ ।
ଯାହାକି ସେତେବେଳେ ବଡ ଆଲୋଡନ ସୃଷ୍ଟି କରିଥିଲା । ରାଜ୍ୟ ସରକାରଙ୍କ ଅଥରାଇଜେସନ କମିଟି NOC ଦେଇଥିଲା । ସଠିକ ଭାବରେ ଯାଞ୍ଚ ନକରି କମିଟି କିପରି ଅନୁମୋଦନ କରିଥିଲା ବୋଲି କମିଶନ ପ୍ରଶ୍ନ କରିଛନ୍ତି । ସେହିପରି ଆପୋଲୋ ହସ୍ପିଟାଲ କର୍ତ୍ତୃପକ୍ଷ ମଧ୍ୟ କାଗଜପତ୍ରରେ ଥିବା ବ୍ୟକ୍ତି କିଡନୀ ଦେଇଛନ୍ତି କି ନାହିଁ ତାହା କିପରି ଯାଞ୍ଚ କଲେ ନାହିଁ । ପୁରା ଘଟଣା ବେଆଇନ ବୋଲି କମିଶନ ଦର୍ଶାଇଛନ୍ତି । ତେଣୁ ମୁଖ୍ୟ ଶାସନ ସଚିବଙ୍କୁ ଏନେଇ ଚିଠି ଲେଖି ତୁରନ୍ତ କାର୍ଯ୍ୟାନୁଷ୍ଠାନ ପାଇଁ କହିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
