ଭୁବନେଶ୍ବର: ସେପ୍ଟେମ୍ବର ପହିଲାରୁ ନୂଆ ମଟରଯାନ ଆଇନ ଲାଗୁହେବା ପରେ ସାରା ଦେଶରେ ବିରୋଧଭାଷା ଆରମ୍ଭ ହୋଇଥିଲା । ଖାଲି ଏତିକି ନୁହେଁ ରାଜଧାନୀ ଭୁବନେଶ୍ବରର ରାଜମହଲରେ ପୋଲିସ-ଜନତା ମୁହାଁମୁହିଁ ହୋଇଥିଲେ । ଯାହାକୁ ନେଇ ପୋଲିସ ପଛଘୁଞ୍ଚା ଦେବାକୁ ବାଧ୍ୟ ହୋଇଥିଲା । ପରେ ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଘଟଣାରେ ହସ୍ତକ୍ଷେପ କରି 3ମାସ ପର୍ଯ୍ୟନ୍ତ ଆଇନକୁ କୋହଳ କରିବା ସହ ଆଗାମୀ 3ମାସ ମଧ୍ୟରେ ସମସ୍ତ ଗାଡି ଚାଳକ ନିଜ ନିଜ କାଗଜ ପତ୍ର ଠିକ କରିବାକୁ ପରାମର୍ଶ ଦେଇଥିଲେ।
ମୁଖ୍ୟମନ୍ତ୍ରୀଙ୍କ ଏହି ନିର୍ଦେଶ ପରେ ଜନସାଧାରଣ ସାମାନ୍ୟ ଆଶ୍ବସ୍ତି ଅନୁଭବ କରିବା ସହ ନିଜ ନିଜ କାଗଜ ପତ୍ର ଠିକ କରିବାକୁ ଲାଗିପଡିଛନ୍ତି। ଏହା ପରେ ଆଜି ଠାରୁ ବଦଳିଯାଇଛି ରାଜଧାନୀର ଚିତ୍ର । ପରିବହନ ବିଭାଗ ପକ୍ଷରୁ ରାଜରାସ୍ତାରେ ପ୍ରଦୂଷଣ ଯାଞ୍ଚ ପାଇଁ ବ୍ୟବସ୍ଥା କେବେଠୁ କରିଛନ୍ତି । ନିତିଦିନ ରାଜଧାନୀର ବିଭିନ୍ନ ସ୍ଥାନରେ ଏହି ପ୍ରଦୂଷଣ ଯାଞ୍ଚ ଭ୍ୟାନ ସେମିତି ରହିଥାଏ । ଭ୍ୟାନ ପାଖରେ କାଉ କି କୋଇଲି ମଧ୍ୟ ବୁଲନ୍ତି ନାହିଁ । ହେଲେ ନୂଆ ମଟରଯାନ ଆଇନ ଲାଗୁ ହେବା ପରେ ଏବେ ଏହି ଭ୍ୟାନ ପାଖରେ ମହୁଫେଣା ଭଳି ଲୋକ ଜମା ହେଉଛନ୍ତି ।
ତେବେ 3 ମାସ ସମୟ ମିଳିଥିବାରୁ ଲୋକେ ସତର୍କତା ହେଉ ଅବା ଜରିମାନାରୁ ମୁକ୍ତି ପାଇଁ ହେଉ ନିଜ ନିଜ ଗାଡିର କାଗଜପତ୍ର ଠିକ କରିବାରେ ଲାଗିଛନ୍ତି।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
