ଭୁବନେଶ୍ବର: ରାଜଧାନୀରେ ଥିବା ଆହାରକେନ୍ଦ୍ର ପାଇଁ ଖୁବଶୀଘ୍ର ଆସିବ ଗାଇଡଲାଇନ୍ । କୋଭିଡ ସମୟରେ ମଧ୍ୟ ଆହାର କେନ୍ଦ୍ର ଖୋଲା ଥିବାରୁ ବିଭିନ୍ନ ସ୍ଥାନରୁ ଲୋକେ ଆହାର କେନ୍ଦ୍ରକୁ ଆସୁଛନ୍ତି । ଯେଉଁଥିପାଇଁ ଗହଳି ହେଉଛି, ତେଣୁ ସଂକ୍ରମଣର ଆଶଙ୍କା ରହିଛି । ଏଭଳି ସ୍ଥିତିକୁ ଏଡ଼ାଇବା ପାଇଁ ବିଏମସି ପକ୍ଷରୁ ଖୁବଶୀଘ୍ର ଆହାରକେନ୍ଦ୍ର ପାଇଁ ନୂଆ ଗାଇଡଲାଇନ ଜାରି କରାଯିବା ନେଇ ସୂଚନା ଦେଇଛନ୍ତି ବିଏମସି କର୍ତ୍ତୃପକ୍ଷ।
ରାଜ୍ୟରେ ଦୈନିକ ସଂକ୍ରମଣ ଏବେ 6 ହଜାର ଅତିକ୍ରମ କରିଥିବାବେଳେ ରାଜଧାନୀରେ ମଧ୍ୟ ଲଗାତାର କୋରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଛି । ଯାହାକୁ ଦେଖି ଭୁବନେଶ୍ୱରର ଆହାର କେନ୍ଦ୍ର ଗୁଡିକରେ କୋରୋନା ସଂକ୍ରମଣ ଯେପରି ନହେବ ସେନେଇ ବିଏମସି ପକ୍ଷରୁ ଲକ୍ଷ୍ୟ ରଖାଯାଇଛି ।
ଏନେଇ ଆହାର କେନ୍ଦ୍ର ଗୁଡିକରେ ଭିଡ ନିୟନ୍ତ୍ରଣ କରାଯିବ, ବିଭିନ୍ନ ଫେଜରେ ଲୋକଙ୍କୁ ଭିତରକୁ ଛଡ଼ାଯିବ, କୋଭିଡ ନିୟମ ମାନି ଖାଦ୍ୟ ପରିବେଷଣ କରାଯିବ। ସେପଟେ ଗୋଟିଏ ଫେଜ ବାହାରି ଆସିଲା ପରେ କେନ୍ଦ୍ରକୁ ବିଶୋଧନ କରାଯିବ । ତାପରେ ଆଉ ଗୋଟିଏ ଫେଜ ଭିତରକୁ ଯିବେ। ଖାଦ୍ୟ ପରିବେଷଣର ସମୟକୁ ବଢାଯାଇଛି , ଅପରାହ୍ନ 3 ଟା ପର୍ଯ୍ୟନ୍ତ ଖୋଲା ରହିବ। ଖାଦ୍ୟ ଆହରଣ ବେଳେ ସାମାଜିକ ଦୂରତ୍ୱ ରକ୍ଷା କରିବା ବାଧ୍ୟତାମୂଳକ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
