ଭୁବନେଶ୍ବର: ଓଡ଼ିଶାର ବିଶିଷ୍ଟ କଣ୍ଠଶିଳ୍ପୀ ତଥା ସଙ୍ଗୀତ ନିର୍ଦ୍ଦେଶକ ପଦ୍ମଶ୍ରୀ ପ୍ରଫୁଲ୍ଲ କରଙ୍କ ସଙ୍ଗୀତରେ ଝୁମିଲେ ପ୍ରେକ୍ଷାଳୟରେ ଉପସ୍ଥିତ ଦର୍ଶକ।
ଉଭୟ ପ୍ରବୀଣ ଓ ନବୀନ କଣ୍ଠ ଶିଳ୍ପୀମାନଙ୍କ କଣ୍ଠରେ ପ୍ରଫୁଲ୍ଲ କରଙ୍କ ଦ୍ଵାରା ଗାୟନ କରାଯାଇଥିବା ଗୀତ ଉପସ୍ଥିତ ଶ୍ରୋତାମଣ୍ଡଳୀଙ୍କୁ ଖୁବ୍ ମନମୁଗ୍ଧ କରାଇଥିଲା । ପ୍ରଫୁଲ୍ଲ କରଙ୍କ ଜନ୍ମ ଜୟନ୍ତୀ ଅବସରରେ ଆୟୋଜିତ ହୋଇଥିବା କମଳ ଦେଶର ରାଜ କୁମାର ସଙ୍ଗୀତ ସନ୍ଧ୍ୟା ସ୍ଥାନୀୟ ରବୀନ୍ଦ୍ର ମଣ୍ଡପଠାରେ ଆୟୋଜିତ ହୋଇଥିଲା । ଏହି ଉତ୍ସବ ପ୍ରତିବର୍ଷ ଆୟୋଜିତ ହେଉଥିବାବେଳେ ଏଥିରେ ଓଡ଼ିଶାର ପ୍ରତିଷ୍ଠିତ ଶିଳ୍ପୀମାନେ ତାଙ୍କ ଗୀତ ପରିବେଷଣ କରିଥା’ନ୍ତି ।
2ଦିନିଆ ଏହି ଉତ୍ସବ ପାଳନ କରାଯାଉଥିବା ବେଳେ ରବିବାର ତାଙ୍କର ଜନ୍ମଦିନ ଏହିଠାରେ ପାଳନ କରାଯିବ ବୋଲି ସୂଚନା ମିଳିଛି ।
ତେବେ ଶନିବାରର ଏହି ସନ୍ଧ୍ୟାରେ ବହୁ ବିଶିଷ୍ଟ କଣ୍ଠଶିଳ୍ପୀ ଯଥା ଦୁଃଖୀଶ୍ୟାମ ତ୍ରିପାଠୀ, ମହାପ୍ରସାଦ କର, ସଞ୍ଜୟ ମିଶ୍ର, ଗିରିଜା ଦାଶ, ବିରଜା ରଥ, ଅନ୍ତରା ଚକ୍ରବର୍ତ୍ତୀ, ସହିନୀ ମିଶ୍ର, ଇପ୍ସିତା ପଣ୍ଡା ଓ ମୁମ୍ବାଇର ପ୍ରସିଦ୍ଧ କଣ୍ଠଶିଳ୍ପୀ ସାରିକା ସିଂ ପ୍ରମୁଖ ସଙ୍ଗୀତ ପରିବେଷଣ କରିଥିଲେ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
