ଭୁବନେଶ୍ବର: ମୋ ସରକାର ଯୋଜନା ପରିପ୍ରେକ୍ଷୀରେ ରାଜ୍ୟର ତିନି ପଛୁଆ ଜିଲ୍ଲା ମାଲକାନଗିରି, ନବରଙ୍ଗପୁର ଏବଂ କୋରାପୁଟ ପାଇଁ ମୁଖ୍ୟମନ୍ତ୍ରୀଙ୍କ ସହାୟତା ଘୋଷଣା ସ୍ଥାନୀୟ ସମସ୍ୟା ସମାଧାନରେ ସହାୟକ ହେବନାହିଁ । ବରଂ ଏହା କେବଳ ଲୋକଦେଖାଣିଆ ପଦକ୍ଷେପ ବୋଲି ବିରୋଧୀ ମାନେ ଟାର୍ଗେଟ କରିଛନ୍ତି ।
ଘୋଷଣା ପରେ ମାଲକାନଗିରି ବିଧାୟକ ଆଦିତ୍ୟ ମାଢି, ନବରଙ୍ଗପୁରର ପୂର୍ବତନ ସାଂସଦ ବଳଭଦ୍ର ମାଝି ଓ କୋରାପୁଟର ପୂର୍ବତନ ସାଂସଦ ଜୟରାମ ପାଙ୍ଗି ଏକ ମିଳିତ ପ୍ରେସ୍ ବିବୃତ୍ତିରେ ଏହା କହିଛନ୍ତି । ବିଜେପିର ଏହି ତିନି ତୁଙ୍ଗ ନେତା କହିଛନ୍ତି ରାଜ୍ୟ ସ୍ବାସ୍ଥ୍ୟମନ୍ତ୍ରୀ ଗତ ବିଧାନସଭାରେ କୋରାପୁଟ ଜିଲ୍ଲାରେ ୧୧୨ , ନବରଙ୍ଗପୁରରେ ୯୯ ଏବଂ ମାଲକାନଗିରିରେ ୬୪ ଡାକ୍ତର ପଦବୀ ଖାଲିଥିବା ଲିଖିତ ଉତ୍ତର ଦେଇଥିଲେ ।
ବିନା ଡାକ୍ତରରେ ନବୀନ ବାବୁ କି ରୋଗୀସେବା କରିବେ ବୋଲି ସେମାନେ ପ୍ରଶ୍ନ କରିଛନ୍ତି । କୋରାପୁଟ ମେଡିକାଲ କଲେଜରେ ଥିବା ମୋଟ ୧୫ଟି ଆଇସିୟୁ ବେଡ ମଧ୍ୟରୁ ମେଡିସିନ, ସର୍ଜରୀ ଓ ପେଡିଆଟ୍ରିକ ବିଭାଗକୁ ମାତ୍ର ୫ଟି ଲେଖା ଦିଆଯିବା ସମୁଦ୍ରକୁ ଶଙ୍ଖେ ।
ଏହି ମେଡିକାଲ କଲେଜରେ ମେଡିସିନ ବିଭାଗର ପ୍ରଫେସର ଓ ଆସିଷ୍ଟାଣ୍ଟ ପ୍ରଫେସର ପଦବୀ ଖାଲି ଥିବା ମୁଖ୍ୟମନ୍ତ୍ରୀଙ୍କୁ ଜଣାଅଛି ନା ନାହିଁ ବୋଲି ଏହି ବିଜେପି ନେତା ମାନେ ପ୍ରଶ୍ନ କରିଛନ୍ତି ? କୋରାପୁଟ ମେଡିକାଲ କଲେଜରେ କାଜୁଆଲିଟି ଏ ପର୍ଯ୍ୟନ୍ତ କାର୍ଯ୍ୟକ୍ଷମ ହୋଇନାହିଁ ବୋଲି ମୁଖ୍ୟମନ୍ତ୍ରୀ ବୋଧହୁଏ ଅବଗତ ନାହାଁନ୍ତି ।
୩୦ଟି ଫାର୍ମାସିଷ୍ଟ ପଦବୀ ମଧ୍ୟରେ ମାତ୍ର ୪ଟି ପୂରଣ ହୋଇଛି । ଏଥିରେ କି ସ୍ବାସ୍ଥ୍ୟସେବା ଯୋଗାଇ ଦିଆଯାଉଛି ବୋଲି ଏହି ବିଜେପି ନେତା ମାନେ ପ୍ରଶ୍ନ କରିଛନ୍ତି । ଯଦି ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ରୋଗୀ କଲ୍ୟାଣ ସମିତିକୁ ଅର୍ଥ ଦେଇ ରୋଗୀ ସେବା କରିବାକୁ ଚାହୁଁଛନ୍ତି ତା ହେଲେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ଅର୍ଥ ନାହିଁ ବୋଲି ମୁଖ୍ୟମନ୍ତ୍ରୀ ସ୍ବୀକାର କରୁଛନ୍ତି କି ବୋଲି ସେମାନେ ପ୍ରଶ୍ନ କରିଛନ୍ତି ।
ଏହି ତିନୋଟି ଜିଲ୍ଲା ରାଜ୍ୟରେ ଗର୍ଭବତୀ ମାଆ ଓ ନବଜାତକ ମୃତ୍ୟୁ ହାରରେ ଖରାପ ସ୍ଥାନରେ ଅଛନ୍ତି ବୋଲି ସରକାରୀ ତଥ୍ୟ କହୁଛି । ୨୦ ବର୍ଷରେ ଏହି ଜିଲ୍ଲାର ସ୍ବାସ୍ଥ୍ୟସେବା କାହିଁକି ବିପର୍ଯ୍ୟସ୍ତ ହୋଇ ପଡିଛି ବୋଲି ରାଜ୍ୟବାସୀଙ୍କୁ କୈଫୟତ ଦରକାର ବୋଲି ବିଜେପି ନେତା ମାନେ କହିଛନ୍ତି।
ମାଲକାନଗିରି ଜିଲ୍ଲାରେ ଜାପାନୀ ଜ୍ବର ସମୟରେ ଉପାନ୍ତ ଅଞ୍ଚଳ ମାନଙ୍କରେ ଡାକ୍ତର ନଥିଲେ । ଏବେ ବି ସ୍ଥିତି ଯଥା ପୂର୍ବଂ ତଥା ପରଂ । ଏପରି ପରିସ୍ଥିତିରେ ମୁଖ୍ୟମନ୍ତ୍ରୀ ପ୍ରତିକାତ୍ମକ ଭେଳିକି ନ ଦେଖାଇ ଏହି ଜିଲ୍ଲାବାସୀଙ୍କ ପାଇଁ ସ୍ବାସ୍ଥ୍ୟସେବାର ଠୋସ ପଦକ୍ଷେପ ନେବା ପାଇଁ ଏହି ନେତାମାନେ ଦାବି କରିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
