ଭୁବନେଶ୍ବର: ଏକ ମାତ୍ର ପୁଅକୁ ହରାଇ ମା ଆଖିରୁ ଆଜିବି ଝରୁଛି ଲୁହ। ପୁଅ ଯେ ସଉଦା ଆଣି ଫେରିବ ବୋଲି ମା ହେଉଛି ବାଉଳି ଚାଉଳି। କାରଣ ମା ଜାଣି ନଥିଲା ସାମାନ୍ଯ ୧୦୦୦ ଟଙ୍କା ଯେ ନେବ ପୁଅର ଜୀବନ। ସଉଦା ପାଇଁ ପଠାଇଥିବା ୧୪ ବର୍ଷର ପୁଅ ଆଉ ଫେରିବନି ତାହା ଭାବିନଥିଲା । ଯାହାକୁ ଭାବି ଭାବି ଖଣ୍ଡଗିରି ଭରତପୁର ସତ୍ଯନଗରରେ ରହୁଥିବା କୁନି ପାଢି ଆଜି ତାଙ୍କ ଘରେ ନିଜର ଏକମାତ୍ର ପୁଅକୁ ମନେପକାଇ ବାହୁନୁଛନ୍ତି । କିଛି ନିଶା ଖୋର ଯୁବକ ବାଟରେ ଅଟକାଇ ସଉଦା ଟଙ୍କାରେ ନିଶା ଖାଇବା ପାଇଁ ଆଶିଷ ପାଢୀକୁ କରିଥିଲେ ହତ୍ଯା।
ନିଶା ପାଇଁ ଜୀବନ ଯାଇଥିବାବେଳେ କାହିଁକି ଲୁଚାଇବାକୁ ହେଉଛି ପ୍ରୟାସ । କଣ ରହିଛି ନିଶାର କାରଣ ପୋଲିସ ପାଇଁ ହୋଇପାରେ ମହଙ୍ଗା ସାବ୍ୟସ୍ତ । ନିଶାଡିଙ୍କ ଏତେ ମାତ୍ରାରେ ଉତ୍ପାତ ବଢିଛି ଯାହାକୁ ନେଇ ନିରୀହ ଛାତ୍ର ନେଇଗଲେ ଜୀବନ । ଆଗକୁ ଏହା କେତେ ଭୟଙ୍କର ରୂପ ନେଇପାରେ ସେ ଦିଗକୁ ତର୍ଜମା କରିବାକୁ ସଭିଏଁ ନାରାଜ । ରାଜ୍ଯ ରାଜଧାନୀର ଏକ ଉତ୍କଟ ସ୍ଥିତିକୁ ଲୁଚାଇବାକୁ ପ୍ରୟାସ କରାଯାଉଛି । ଏପରିକି ଡ୍ରଗସ ରୋକିବାକୁ ପୋଲିସ କମିଶନର ଏକ ସ୍ବତନ୍ତ୍ର ଟିମ ଗଠନ କରିଥିଲେ ବି ତାହା ସତେ ଯେପରି କାମ କରୁନି।
୫ ଗ୍ରାମ ଓ ୭ ଗ୍ରାମ ବ୍ରାଉନସୁଗାର ଧରି ବାଃ ବାଃ ନେବାରେ ବ୍ଯସ୍ତ। ହେଲେ ଯେଉଁଠି ଏସଟିଏଫ କିଲୋ କିଲୋ ବ୍ରାଉନସୁଗାର ଜବତ କରିବାରେ ସଫଳ ହେଉଥିବା ପୋଲିସର ଏପରି ଜବତ ଏକ ସନ୍ଦେହ ଘେରକୁ ନେଉଛି । କେଉଁଠି ନା କେଉଁଠି ନିଶା ମାଫିଆଙ୍କ ସହ ପୋଲିସ ହାତ ମିଳାଇଥିବା ଅଭିଯୋଗ ମଧ୍ଯ ହେଉଛି, ତାହା ଏବେ ବଡ ପ୍ରଶ୍ନର ବିଷୟ ପାଲଟିଛି।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
