ଭୁବନେଶ୍ବର: ଓଡିଶା-ଆନ୍ଧ୍ର ସୀମା ବିବାଦକୁ ନେଇ ପ୍ରତିକ୍ରିୟା ରଖିଲେ ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି । ସରକାର ସବୁବେଳେ ଲୋକଙ୍କ ସହିତ ରହିଛନ୍ତି । ସୀମା ବିବାଦ ସମ୍ପର୍କରେ ଚାଲିଛି ପ୍ରଶାସନିକ ଆଲୋଚନା । ଆନ୍ଧ୍ରପ୍ରଦେଶର ସ୍ଥାନୀୟ ଜିଲ୍ଲାପାଳ ଓ ଅନ୍ୟ ଅଧିକାରୀଙ୍କ ମଧ୍ଯରେ ଆଲୋଚନା ହେଉଛି । ଖୁବଶୀଘ୍ର ସମାଧାନ ହୋଇଯିବ । ସ୍ଥାନୀୟ ଲୋକଙ୍କ ସହ ଆଲୋଚନା ପରେ ଖୁଣ୍ଟି ଉଠିଛି, ଶାନ୍ତି ପୂର୍ଣ୍ଣ ଆଲୋଚନା ମାଧ୍ୟମରେ ସମାଧାନ ହେବ ।
ସୂଚନାଯୋଗ୍ୟ, କୋରାପୁଟ ଜିଲ୍ଲା ପଟ୍ଟାଙ୍ଗି ବ୍ଲକରେ ଆନ୍ଧ୍ର ଓଡ଼ିଶା ସୀମା ବିବାଦ ଦେଖାଦେଇଛି। ପଟ୍ଟାଙ୍ଗି ବ୍ଲକ ଅନ୍ତର୍ଗତ ସମ୍ବାଇ ପଞ୍ଚାୟତର ସୁନାବେଡା ଗ୍ରାମ ନିକଟସ୍ଥ ଜାଗାକୁ ନେଇ ଦୁଇ ରାଜ୍ୟ ମଧ୍ୟରେ ବିବାଦ ଆରମ୍ଭ ହୋଇଛି । କିଛି ଦିନ ତଳେ ଆନ୍ଧ୍ର ପ୍ରଦେଶର କିଛି ସରକାରୀ ଅଧିକାରୀମାନେ ଏହି ସ୍ଥାନକୁ ଆନ୍ଧ୍ରପ୍ରଦେଶ ବୋଲି ଦର୍ଶାଇ ଏଠାରେ ଏକ ଫଳକ(ବୋର୍ଡ) ପୋତିଥିଲେ । ଏନେଇ କୋରାପୁଟ ଜିଲ୍ଲା ପ୍ରଶାସନ ଜାଣିବା ପରେ ଏହି ଫଳକକୁ ଭାଙ୍ଗି ସେଠାରେ ପୁନଃ ଓଡ଼ିଶା ଫଳକ ଲଗାଇଥିଲେ । ଯାହାକୁ ନେଇ ଉଭୟ ରାଜ୍ୟ ମଧ୍ୟରେ ବିବାଦ ଲାଗି ରହିଛି ।
ଦୀର୍ଘ ଦିନ ଧରି ଓଡିଶା ସହ ପଡୋଶୀ ରାଜ୍ୟ ଆନ୍ଧ୍ରପ୍ରଦେଶ, ପଶ୍ଚିମବଙ୍ଗ, ଛତିଶଗଡ, ଝାଡଖଣ୍ଡ ଲାଗି ରହିଛି ସୀମା ବିବାଦ । ନିକଟରେ ଏହାର ସମାଧାନ ଓ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ଆପୋଷ ବୁଝାମଣା କରିବାକୁ କେନ୍ଦ୍ର ସରକାରଙ୍କ ସହାୟତା ନେବା ଏବଂ ଅନ୍ୟାନ୍ୟ ପଦକ୍ଷେପ ଗ୍ରହଣ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି ଅନୁରୋଧ କରିଥିଲେ ଧର୍ମେନ୍ଦ୍ର ପ୍ରଧାନ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
