ଭୁବନେଶ୍ବର: ଅନନ୍ତବାସୁଦେବ ମନ୍ଦିର ପାଇଁ ପ୍ରସ୍ତାବିତ ବାଇ-ଲ ଏକାମ୍ର କ୍ଷେତ୍ର ଉନ୍ନତିରେ ବାଧକ ସାଜିବ । ସେହିପରି ବ୍ରହ୍ମେଶ୍ବର ମନ୍ଦିର ପାଇଁ ପ୍ରସ୍ତାବିତ ବାଇ-ଲ ମଧ୍ୟ ବିକାଶରେ ବାଧକ ସୃଷ୍ଟି କରିବାକୁ ଥିବାରୁ ଏହାକୁ ତୁରନ୍ତ ପ୍ରତ୍ୟାହାର କରିବାକୁ କହିଛନ୍ତି ବରିଷ୍ଠ ମନ୍ତ୍ରୀ ତଥା ଏକାମ୍ର ବିଧାୟକ ଅଶୋକ ପଣ୍ଡା ।
ରାଜ୍ୟ ସରକାର ଏକାମ୍ରକ୍ଷେତ୍ର ପାଇଁ ସ୍ବତନ୍ତ୍ର ଅଧ୍ୟାଦେଶ ଆଣିଛନ୍ତି ହେଲେ କେନ୍ଦ୍ର ସରକାର ଏଥିରେ ବାଧା ସୃଷ୍ଟି କରୁଛନ୍ତି । ଯାହା ଅତ୍ୟନ୍ତ ନିନ୍ଦନୀୟ । ଲିଙ୍ଗରାଜ ମନ୍ଦିରର ପାରିପାର୍ଶ୍ବିକ ଉନ୍ନତି ପାଇଁ କେନ୍ଦ୍ର ପ୍ରତ୍ନତତ୍ତ୍ବ ବିଭାଗ ଟାଳଟୁଳ ନୀତି ଅବଲମ୍ବନ କରୁଛି । ତୁରନ୍ତ କେନ୍ଦ୍ର ସଂସ୍କୃତି ମନ୍ତ୍ରଣାଳୟ ଏଭଳି ସମ୍ବେଦନଶୀଳ ନିୟମକୁ ପ୍ରତ୍ୟାହାର କରନ୍ତୁ ନଚେତ ଆଗାମୀ ଦିନରେ ବିରୋଧ ଜୋରଦାର ହେବ ବୋଲି ଚରମ ବାଣୀ ଶୁଣାଇଛନ୍ତି ଅଶୋକ ପଣ୍ଡା ।
ସେହିପରି ଏକାମ୍ରକ୍ଷେତ୍ରର ବିକାଶ କ୍ଷେତ୍ରରେ ସ୍ଥାନୀୟ ସାଂସଦ କାହିଁକି ଚୁପ ବସିଛନ୍ତି ବୋଲି ସେ ପ୍ରଶ୍ନ କରିଛନ୍ତି । ସେପଟେ ଏହାକୁ ପ୍ରତ୍ୟାହାର ଦାବିରେ ଶୁକ୍ରବାର ଭୁବନେଶ୍ବର ଲିଙ୍ଗରାଜ ମନ୍ଦିର ସମ୍ମୁଖରେ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ,ସ୍ଥାନୀୟ ବାସିନ୍ଦା ଏବଂ ବିଭିନ୍ନ ନିଯୋଗର ପ୍ରତିନିଧି ଦୀପଦାନ କରିଥିବା ଦେଖିବାକୁ ମିଳିଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
