ଭୁବନେଶ୍ବର: ଗାଡି ନ କିଣି ବ୍ୟାଙ୍କ ଲୋନ ଆବେଦନ । ଏପରିକି ୨କୋଟି ୨ଲକ୍ଷ ୭୦ ହଜାର ଟଙ୍କା ଲୋନ ମଧ୍ୟ ମିଳିଗଲା । ହେଲେ ଶେଷରେ ଧରାପଡିଛି ଋଣଗ୍ରହୀତାର ଠକାମୀ । ଏଭଳି ଏକ ଆର୍ଥିକ ଅପରାଧର ଶିକାର ପିପିଲି ଗ୍ରାମବ୍ୟାଙ୍କ ହୋଇଛି । ଘଟଣା ସମ୍ପର୍କରେ ତଦନ୍ତ ପରେ ମୁଖ୍ୟ ଅଭିଯୁକ୍ତ ବିଜୟ ପ୍ରଧାନ ଗିରଫ ହୋଇଛନ୍ତି । ସେ ପୁରୀ ଜିଲ୍ଲା କୋଣାର୍କ ଥାନା ବାହାଗୋରଡି ଗାଁର ବୋଲି ଜଣାପଡିଛି ।
ବିଜୟ ନିଜ ଭାଇ ବିକ୍ରମ ପ୍ରଧାନ, ତାଙ୍କ ପତ୍ନୀ ରାଜଲକ୍ଷ୍ମୀ ପ୍ରଧାନ ଓ ଶଳା ମଦନ ମୋହନ ପ୍ରଧାନ ସହ ମିଶି ନକଲୀ ଡକ୍ୟୁମେଣ୍ଟ ପ୍ରସ୍ତୁତ କରିଥିଲେ । ଏହାପରେ ବ୍ରାଞ୍ଚ ମ୍ୟାନେଜର ପ୍ରଶାନ୍ତ ଜେନାଙ୍କୁ ହାତ କରି ଗ୍ରାମ୍ୟବ୍ୟାଙ୍କରୁ ଗାଡି ଲୋନ ପାସ କରାଇଥିଲେ ।
ତେବେ ପରେ ଏ ନେଇ ଖୋଳତାଡ ପରେ ଜଣାପଡିଥିଲା ଯେ, 2ଟି ହାଇୱା ଗାଡି କିଣିବା ପାଇଁ ଲୋନ କରିଥିବା ଟଙ୍କାକୁ ଅଲଗା ଦିଗରେ ହେରଫେର କରାଯାଇଛି । ଏ ନେଇ ସମ୍ପୃକ୍ତ ଅଭିଯୁକ୍ତଙ୍କ ନାଁରେ କ୍ରାଇମବ୍ରାଞ୍ଚର ଦ୍ବାରସ୍ଥ ହୋଇଥିଲେ ପିପିଲି ଓଡିଶା ବ୍ୟାଙ୍କ ବ୍ରାଞ୍ଚ ମାନେଜର ଦେବଦତ୍ତ ନନ୍ଦ। ତେବେ ତଦନ୍ତ ପରେ ଜଣା ପଡିଥିଲା ମାଷ୍ଟରମାଇଣ୍ଡ ବିଜୟ ପ୍ରଧାନ ଙ୍କ ନେତୃତ୍ବରେ ମିଳିମିଶି ଟଙ୍କା ହଡପ କରିଥିଲେ।
ପୁର୍ବରୁ ଏହି ମାମଲାରେ ବ୍ରାଞ୍ଚ ମାନେଜର ପ୍ରଶାନ୍ତ ଜେନା, ବିକ୍ରମକେଶରୀ ପ୍ରଧାନ, ପତ୍ନୀ ରାଜଲକ୍ଷ୍ମୀ ପ୍ରଧାନ ଓ ତାଙ୍କ ଭାଇ ମଦନମୋହନ ପ୍ରଧାନଙ୍କୁ ଗତ ବର୍ଷ ନଭେମ୍ବର ୧୦ରେ ଗିରଫକରି କୋର୍ଟ ଚାଲାଣ କରାଯାଇଥିଲା । ପରେ ମୁଖ୍ୟ ଅଭିଯୁକ୍ତ ବିଜୟ ପ୍ରଧାନକୁ ଗିରଫ କରି ଆପିସିର ଧାରା ୪୨୦/୪୦୬/୪୬୭/୪୭୧/୧୨୦(B)ରେ ମାମଲା ରୁଜୁ କରି କୋର୍ଟ ଚାଲାଣ କରିଛି କ୍ରାଇମବ୍ରାଞ୍ଚ ଅର୍ଥନୈତିକ ଅପରାଧା ଶାଖା ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
