ଭୁବନେଶ୍ବର: ଅନ୍ତିମ ବିଦାୟ ନେଲେ ଓଡିଆ ଚଳଚ୍ଚିତ୍ର ଜଗତର ହାକିମ ବାବୁ । ଅନେକ ଫିଲ୍ମରେ ଜୀବନ୍ତ ଅଭିନୟର ଛାପ ଛାଡିଥିଲେ ମଧ୍ୟ ଜୀବନଯୁଦ୍ଧରେ ପରାଜିତ ହୋଇଗଲେ ଅଜିତ୍ । ଏହି ଭେଟେରାନ ଅଭିନେତାଙ୍କ ବିୟୋଗରେ ଓଡିଆ ଚଳଚ୍ଚିତ୍ର ଓ ନାଟ୍ୟ ଜଗତରେ ସୃଷ୍ଟି ହୋଇଛି ଏକ ଅପୂରଣୀୟ କ୍ଷତି । କୋରୋନାରେ ସଂକ୍ରମିତ ହେବା ପରେ 71 ବର୍ଷ ବୟସରେ ଶେଷ ନିଃଶ୍ବାସ ତ୍ୟାଗ କରିଛନ୍ତି ସଭିଙ୍କ ପ୍ରିୟ ଅଜିତ ଦାସ । ଅନେକ ଯୁବ କଳାକାର ନିଜ ଗୁରୁଙ୍କୁ ହରାଇ ଥିବା ବେଳେ ସାଥୀ କଳାକାର ମଧ୍ୟ ଦୁଃଖରେ ଭାଙ୍ଗି ପଡିଛନ୍ତି । ଜଣେ ନିଷ୍ଠାବାନ ଅଭିନେତା ଓ ଜଣେ ଆଦର୍ଶ ଗୁରୁ ଭାବେ ନିଜ ଭୂମିକା ବେଶ ନିଖୁଣ ଭାବେ ନିଭାଇଥିବା ଅଜିତଙ୍କୁ ଗାର୍ଡ ଅଫ ଅନର ସହ ଅନ୍ତିମ ବିଦାୟ ଦିଆଯାଇଛି । ସତ୍ୟନଗର ଶ୍ମଶାନରେ ତାଙ୍କର ଶେଷକୃତ୍ୟ କରାଯାଇଥିବାବେଳେ, ବଡ ଝିଅ ମୁଖାଗ୍ନି ଦେଇଛନ୍ତି । ନିଜ ପ୍ରିୟ ଅଭିନେତାଙ୍କୁ ହରାଇ ଶୋକକୂଳ ହୋଇ ଉଠିଛି ସମଗ୍ର ପରିବେଶ ।
1949 ଜାନୁଆରୀ 20 ତାରିଖରେ ମୟୂରଭଞ୍ଜ ଜିଲ୍ଲାର କରଞ୍ଜିଆରେ ଜନ୍ମ ହୋଇଥିଲେ ଏହି ବର୍ଷିଆନ ଅଭିନେତା । ସେ ଏକାଧାରାରେ ଥିଲେ ଜଣେ ନିର୍ଦ୍ଦେଶକ ତଥା ନାଟ୍ୟକାର । ନ୍ୟାସନାଲ ସ୍କୁଲ ଅଫ ଡ୍ରାମାରୁ ଅଭିନୟରେ ଡିପ୍ଲୋମା ହାସଲ କରିବା ପରେ 1976ରେ ପ୍ରଥମେ ସିନ୍ଦୂର ବିନ୍ଦୁ ଚଳଚ୍ଚିତ୍ରରୁ କ୍ୟାରିୟର ଆରମ୍ଭ କରିଥିଲେ । ସେ 60ରୁ ଅଧିକ ଚଳଚ୍ଚିତ୍ରରେ ଅଭିନୟ କରିଥିବାବେଳେ ତାଙ୍କ ଅଭିନୀତ ହାକିମ ବାବୁ, ଶଙ୍ଖ ମହୁରୀ, ପର ଝିଅ ଘର ଭାଙ୍ଗେନା, ବଳିଦାନ ଭଳି ଚଳଚ୍ଚିତ୍ର ସୁପର ହିଟ୍ ହୋଇଥିଲା । ସେ ଉତ୍କଳ ସଙ୍ଗୀତ ନାଟକ ମହାବିଦ୍ୟାଳୟରେ ମଧ୍ୟ ଅଧ୍ୟାପନା କରିଥିଲେ । ତାଙ୍କ ଅବର୍ତ୍ତମାନରେ ଓଡିଶା ନାଟ୍ୟ ଜଗତର ବ୍ୟକ୍ତି ବିଶେଷମାନେ ଶୋକ ବ୍ୟକ୍ତ କରିବା ସହ ତାଙ୍କର ନାଟ୍ୟ ଜଗତ ପାଇଁ କାର୍ଯ୍ୟ ସବୁବେଳେ ମନେ ରହିବ ବୋଲି କହିଛନ୍ତି ।
ଅନେକ ରଙ୍ଗମଞ୍ଚ ଓ ସିନେମାରେ ନିଜ ଅଭିନୟର ଜାଦୁ ଦେଖାଇଥିବା ଅଜିତ ଦାସ ଆଉ ନାହାନ୍ତି ସତ । ହେଲେ ଅଭିନୟରେ ତାଙ୍କର ଉତ୍କର୍ଷ ସମଗ୍ର ଓଡିଶାବାସୀଙ୍କ ହୃଦୟରେ ଜୀବିତ ରହିବ ସେଥିରେ ସନ୍ଦେହ ନାହିଁ ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
