ଭୁବନେଶ୍ବର: କିମ୍ସ ହସ୍ପିଟାଲକୁ ନୋଟିସ୍ । ରୋଗୀଙ୍କୁ ଅବହେଳା ମାମଲାରେ କିମ୍ସ ହସ୍ପିଟାଲକୁ ନୋଟିସ୍ ପଠାଇଛନ୍ତି ରାଜ୍ୟ ମାନବ ଅଧିକାର କମିଶନ(ଓଏଚଆରସି) । ଆବଦେନକାରୀ ପକ୍ଷଙ୍କୁ ଅଢେଇ ଲକ୍ଷ ଟଙ୍କାର କ୍ଷତିପୂରଣ ଦେବାକୁ କିମ୍ସକୁ ନିର୍ଦ୍ଦେଶ ଦେଇଛନ୍ତି ଓଏଚଆରସି । ଆସନ୍ତା 2 ମାସ ମଧ୍ୟରେ କ୍ଷତିପୂରଣ ଦେବାକୁ ନିର୍ଦ୍ଦେଶ ଦିଆଯାଇଛି । କ୍ଷତିପୂରଣ ନଦେଲେ ହସ୍ପିଟାଲ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଡ଼ିଏମଇଟିକୁ ନିର୍ଦ୍ଦେଶ ଜାରି କରିଛନ୍ତି ଓଏଚଆରସି ।
ସୂଚନା ଅନୁଯାୟୀ, ପୁରୀ ଜିଲ୍ଲାର ଶିବ ପ୍ରସାଦ ନନ୍ଦଙ୍କ ପତ୍ନୀ ଗତ ଫେବୃଆରୀ 9, 2017 ମସିହାରେ ଆଡମିଟ ହୋଇଥିଲେ କିମ୍ସରେ । ସେଠାରେ ସେ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ । ଶିଶୁଟିର ସ୍ବାସ୍ଥବସ୍ଥା ଗୁରୁତର ଅଛି କହି ଡାକ୍ତର ଜଗନ୍ନାଥ ମିଶ୍ର ଶିଶୁଟିକୁ ଆଇସିୟୁରେ ରଖିଥିଲେ । ଦୀର୍ଘ ୭୨ ଘଣ୍ଟା ପରେ ଶିଶୁଟିର ମୃତ୍ୟୁ ଘଟିଥିବା ଖବର ଦେବା ସହ ଚିକିତ୍ସା ବାବଦରେ ସମସ୍ତ ଅର୍ଥ ଡିପୋଜିଟ କରି ଶିଶୁକୁ ନେବାକୁ କହିଥିଲେ ଡାକ୍ତର ।
ତେବେ ଶିଶୁଟି ଜନ୍ମ ସମୟରେ ହିଁ ମୃତ୍ୟୁ ଘଟିଥିବା ସନ୍ଦେହ କରି ଡାକ୍ତରଙ୍କ ନିକଟରେ ଅଭିଯୋଗ କରିଥିଲେ ଶିବପ୍ରସାଦ । ଏନେଇ ଡାକ୍ତର ଅଭିଯୋଗ ନ ଶୁଣିବାରୁ ରାଜ୍ୟ ମାନବଅଧିକାର ଆୟୋଗଙ୍କ ନିକଟରେ ସେ ଅଭିଯୋଗ କରିଥିଲେ । ଏହି ଘଟଣାକୁ ଗୁରୁତର ସହ ନେଇ କିମ୍ସ ବିରୋଧରେ କାର୍ଯ୍ୟାନୁଷ୍ଠାନ ନେଇଛନ୍ତି ଓଏଚଆରସି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
