ଖୋର୍ଦ୍ଧା: ପୁଣି ତେଜିଲା ପାଇକ ଆନ୍ଦୋଳନ। ଖୋର୍ଦ୍ଧା ବରୁଣେଇ ପାଦ ଦେଶରେ ଆନ୍ଦୋଳନ ଆରମ୍ଭ କଲେ ଶତାଧିକ ପାଇକ । ପାଇକ ବିଦ୍ରୋହକୁ ଦେଶର ପ୍ରଥମ ସ୍ଵାଧୀନତା ସଂଗ୍ରାମ ମାନ୍ୟତା(first war of independence) ପ୍ରଦାନ ପାଇଁ ଦାବି ଜୋର ଧରିଲା ।
ଯେଉଁ ସ୍ଥାନରୁ ଇଂରେଜଙ୍କ ବିରୁଦ୍ଧରେ ପାଇକମାନେ ବିଦ୍ରୋହ ଆରମ୍ଭ କରିଥିଲେ, ସେହି ସ୍ଥାନରୁ ପାଇକ ଦାୟାଦ ମାନେ ଏକାଠି ହୋଇ ପାଇକ ବିଦ୍ରୋହକୁ ଦେଶର ପ୍ରଥମ ସ୍ବାଧୀନତା ମାନ୍ୟତା ଦେବାକୁ ଦାବି କରିଛନ୍ତି । ଆଜିଠାରୁ(ମଙ୍ଗଳବାର) ଏହି ପାଇକ ଆନ୍ଦୋଳନ ଆରମ୍ଭ ହେଲା ବୋଲି କୁହାଯାଇଛି ।
ସେହି ସୁସଜ୍ଜିତ ବେଶ, ହାତରେ ଖଣ୍ଡା, ଲାଠି, ମୁଦ୍ଗର, ଢାଲ ଧରି ବରୁଣେଇ ପାଦ ଦେଶରେ ରଣ ହୁଙ୍କାର ଦେଲେ ପାଇକ ଦାୟାଦ। ଦଳ ମତ ନିର୍ବିଶେଷରେ ସବୁ ଦଳ ନେତା ସାମିଲ ହୋଇ ସାମୂହିକ ସ୍ବର ମିଳାଇଛନ୍ତି । ବିଧାୟକ ସୁରେଶ ରାଉତରାୟ, ରାଜେନ୍ଦ୍ର ସାହୁ, ଜିତୁ ମିତ୍ର ଏକାଠି ହୋଇ କେନ୍ଦ୍ର ବିରୁଦ୍ଧରେ ଆଉ ଏକ ଆନ୍ଦୋଳନ ଆରମ୍ଭ ହେଲା ବୋଲି ଘୋଷଣା କରିଛନ୍ତି । ପାଇକ ବିଦ୍ରୋହକୁ ପ୍ରଥମ ସ୍ବାଧୀନତା ସଂଗ୍ରାମର ମାନ୍ୟତା ତୁରନ୍ତ ଘୋଷଣା କରିବାକୁ ଦାବି ହୋଇଛି ।
କେନ୍ଦ୍ର ସରକାର ତୁରନ୍ତ ନିଜର ମତ ପ୍ରତ୍ୟାହାର କରି ପାଇକ ବିଦ୍ରୋହକୁ ଦେଶର ପ୍ରଥମ ସ୍ବାଧୀନତା ସଂଗ୍ରାମର ମାନ୍ୟତା ପ୍ରଦାନ ନ କଲେ ଆନ୍ଦୋଳନ ସାରା ରାଜ୍ୟରେ ତୀବ୍ର ହେବ। କେନ୍ଦ୍ର ସରକାରଙ୍କ ସମସ୍ତ କାର୍ଯ୍ୟାଳୟକୁ ବନ୍ଦ କରି ଦିଆଯିବ ବୋଲି କଂଗ୍ରେସ ବିଧାୟକ ସୁରେଶ ରାଉତରାୟ ଚେତାବନୀ ଦେଇଛନ୍ତି । ସେହିପରି ଆଜିର କାର୍ଯ୍ୟକ୍ରମ ନିଉ ଥିଙ୍କିଙ୍ଗ ଫୋରମର ନେତୃତ୍ବରେ ଆୟୋଜିତ ହୋଇଥିବା ଏହି ପାଇକ ସମାବେଶରେ ଯୋଗ ଦେଇଥିବା ପାଇକ ମାନଙ୍କୁ ସମ୍ବର୍ଦ୍ଧିତ କରାଯାଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
