ଭୁବନେଶ୍ବର: କାଳିଆକୁ ନେଇ ରାଜନୀତି ଏବେ ସରଗରମ । କୃଷିମନ୍ତ୍ରୀ ଓ ବିଜେଡି ମୁଖପାତ୍ର ଦେଇଥିବା ତଥ୍ୟରେ ତାଳମେଳ ନାହିଁ । ଯେଉଁ କାଳିଆ ବିଜେଡିକୁ ନିର୍ବାଚନ ବୈତରଣୀ ପାର କରିଥିଲା ସେହି କାଳିଆ ଏବେ ସରକାର ଓ ବିଜେଡିର ତଣ୍ଟିରେ କଣ୍ଟା ହେଇ ଲାଗିଛି । ଦଳ ଏହି ପ୍ରସଙ୍ଗରୁ ଯେତେ ମୁକୁଳିବାକୁ ଚେଷ୍ଟା କରୁଛି ଆହୁରି ସେତେ ଛନ୍ଦି ହୋଇପଡୁଛି । ଯାହାକୁ ନେଇ ଏବେ ବିରୋଧୀ ଜୋରଦାର ହମଲା କରୁଛନ୍ତି ।
ବୁଧବାର ବିଜେଡି ମୁଖପାତ୍ର ପ୍ରତାପ ଦେବଙ୍କ ପରେ ଗୁରୁବାର ଅନ୍ୟତମ ମୁଖପାତ୍ର ଲେଲିନ ମହାନ୍ତି ଉଭୟ ଦଳ ଓ ସରକାରଙ୍କୁ ସୁରକ୍ଷା ଦେବାକୁ ଓକିଲାତି କରିଛନ୍ତି । କୃଷି ବିଭାଗର ବିଜ୍ଞପ୍ତିକୁ ଧରି ଭାବ ମୂର୍ତ୍ତି ସଜାଡିବାକୁ ଉଦ୍ୟମ କରିଛନ୍ତି । ଆଉ ମନ୍ତ୍ରୀ ଓ ପ୍ରତାପ ଦେବଙ୍କ ବକ୍ତବ୍ୟକୁ ଯଥା ସମ୍ଭବ ଏଡାଇ ଯାଇଛନ୍ତି।
ମାତ୍ର 40 ହଜାର ଅଯୋଗ୍ୟ ବୋଲି ଯୁକ୍ତି ବାଢିଛନ୍ତି । ଯାହା ମୋଟ କାଳିଆ ହିତାଧିକାରୀଙ୍କର 1 ପ୍ରତିଶତ। ଏହାକୁ ନେଇ ବିରୋଧୀ କାଳିଆ ଯୋଜନା ଓ ଟଙ୍କା ବଣ୍ଟନ ପ୍ରକ୍ରିୟାକୁ ସାର୍ବଜନୀନ କରାଯାଉ ଓ ନିରପେକ୍ଷ ତଦନ୍ତ କରାଯାଉ ବୋଲି ଦାବି କରିଛନ୍ତି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
