ଭୁବନେଶ୍ବର: ଜଗନ୍ନାଥଙ୍କ ଜମିରେ ବେଆଇନ ଖଣି ଖନନ ମାମଲା। ଖଣି ମାଫିଆ ଲିଙ୍କରେ ସରକାରୀ କର୍ମଚାରୀ। ଖୋର୍ଦ୍ଧା ତାପଙ୍ଗ ଅଞ୍ଚଳରେ ବେଆଇନ ପଥର ଖଣି ମାମଲାରେ ଗିରଫ ହେଲେ ଜୁନିୟର କ୍ଲର୍କ ଜୟଦେବ ସାହୁ । ଖୋର୍ଦ୍ଧା ପ୍ଲାନିଂ ବୋର୍ଡର ଜୁନିୟର କ୍ଲର୍କ ଜୟଦେବ ସାହୁଙ୍କ ଇସାରାରେ ଚାଲିଥିଲା ବେଆଇନ ପଥର ଖନନ। ଯାହାର ସୁରାକ ପାଇ ଖଣ୍ଡଗିରି ଜାଗମରା ଘରୁ ତାଙ୍କୁ ପ୍ଲଟ ନମ୍ବର ୭୪୦ରୁ ଗିରଫ କରିଛି ଏସଟିଏଫ ଟିମ ।
ତେବେ ଶୁକ୍ରବାର ପିପିଲିର ଖଣି ମାଫିଆ ଶେଖ ମହମ୍ମଦ ଅଖତର ଗିରଫ ପରେ ଖୋଲିଥିଲା ସରକାରୀ ଲିଙ୍କ । ଯେ କି ସରକାରଙ୍କ ନିର୍ଦ୍ଦେଶନାମା କହି ନୂତନ ଷ୍ଟ୍ରକଚର ନିର୍ମାଣ ଆଳରେ ଚଲାଇଥିଲେ ପଥର ଖଣି ଖନନ । ଏଥିପାଇଁ ସରକାରୀସ୍ତରରେ କୌଣସି ନିର୍ଦ୍ଦେଶନାମା କି କୌଣସି ଟେଣ୍ଡର ନ ହୋଇଥିଲେ ବି କ୍ଲର୍କ ବାବୁ ଜଣକ ଦେଉଥିଲେ ବେଆଇନ ପଥର ଖଣି ଖନନ ପାଇଁ ଅନୁମତି ।
ତେବେ ପୂର୍ବରୁ ସମ୍ପୃକ୍ତ କ୍ଲର୍କଙ୍କୁ ଗିରଫ କରିଥିଲା ଭିଜିଲାନ୍ସ ଟିମ । ଯେ କି ଭିଜିଲାନ୍ସ କେସରେ ଏବେ ବି ସ୍କାନରରେ ରହିଛି । ତେବେ କ୍ଲର୍କଙ୍କ ଗିରଫ ପରେ ଖୋଲିପାରେ ବଡ ବାବୁଙ୍କ ଖଣି ମାଫିଆ ଲିଙ୍କ୍ । ଯାହାକୁ ନେଇ ଖୋର୍ଦ୍ଧାର କିଛି ପଥର ଖଣିରେ କାମ କରୁଥିବା କର୍ମଚାରୀଙ୍କୁ ପଚରାଉଚରା ଜାରି ରଖିଛି ଏସଟିଏଫ ଟିମ । ତେବେ ଜୟଦେବ ସାହୁକୁ କେସ ନମ୍ବର ୦୭/୨୦୧୯ ଆଧାରରେ ଆଇପିସିର ଧାରା ୩୭୯, ୪୧୧, ୪୬୭, ୪୬୮, ୪୭୧,୧୨୦ବି, ୩୪, ଆର୍ମସ ଆକ୍ଟର ୨୫/୨୭ରେ ଏକ୍ସପ୍ଲୋସିଭ ଆକ୍ଟ ୩,୪,୫ ଓ ଓଏମଏମସି ୨୦୧୬ରେ ଗିରଫ କରି କୋର୍ଟ ଚାଲାଣ କରିଛି ଏସଟିଏଫ ଟିମ।
ଭୁବନେଶ୍ବରରୁ ତାପସ କୁମାର ପରିଡା, ଇଟିଭି ଭାରତ
