ଭୁବନେଶ୍ବର: ଆଜି(ସୋମବାର) ହେଉଛି ବିଶ୍ବ ଆଦିବାସୀ ଦିବସ । ଏହି ଦିବସ ଅବସରରେ ଆଦିବାସୀ ସମ୍ପ୍ରଦାୟର ବିଭିନ୍ନ ସମସ୍ୟାକୁ ନେଇ ଆନ୍ଦୋଳନକୁ ଓହ୍ଲାଇଛି ଝାଡ଼ଖଣ୍ଡ ମୁକ୍ତି ମୋର୍ଚ୍ଚା । ଲୋୟର ପିଏମଜି ଠାରେ ମୋର୍ଚ୍ଚା ଆନ୍ଦୋଳନ କରିଥିବା ଜଣାପଡିଛି ।
ମୋର୍ଚ୍ଚାର ସଦସ୍ୟମାନେ ବିଭିନ୍ନ ଦାବି ନେଇ ରାଜ୍ୟର ପ୍ରଥମେ ନାଗରିକ ତଥା ରାଜ୍ୟପାଳଙ୍କୁ ଭେଟିଥିଲେ । ବିଶ୍ବ ଆଦିବାସୀ ଦିବସରେ ରାଜ୍ୟପାଳଙ୍କୁ ସାକ୍ଷାତ କରି ଶୁଭେଚ୍ଛା ବାର୍ତ୍ତା ଦେବା ସହିତ ଓଡ଼ିଶାର ଆଦିବାସୀ ସମସ୍ୟା ସମ୍ପର୍କରେ ଏକ ଦାବିପତ୍ର ପ୍ରଦାନ କରିଛନ୍ତି । ଆଦିବାସୀମାନଙ୍କ ଉପରେ ସରକାର ଗୁରୁତ୍ଵ ଦେଉନାହାଁନ୍ତି ବୋଲି ସେମାନେ ଅଭିଯୋଗ କରିଛନ୍ତି ।
ଆଦିବାସୀମାନଙ୍କ ସୁରକ୍ଷା, ଭାଷା, ପରମ୍ପରା ଆଦିକୁ ବଞ୍ଚାଇ ରଖିବା ପାଇଁ ସେମାନେ ସରକାରଙ୍କୁ ଅନୁରୋଧ କରିବେ ବୋଲି କହିଛନ୍ତି । ସରନାକୋଟକୁ ଜାତି ଭାବରେ ମାନ୍ୟତା ମିଳିବା ପାଇଁ ସେମାନେ ଦାବି କରିଛନ୍ତି । ଝାଡ଼ଖଣ୍ଡରେ ଏହି ଜାତିକୁ ମାନ୍ୟତା ମିଳିସାରିଥିବା ବେଳେ ଓଡି଼ଶାରେ କଣ ପାଇଁ ମିଳିବ ନାହିଁ ବୋଲି ସେ ପ୍ରଶ୍ନ କରିଛନ୍ତି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
