ଭୁବନେଶ୍ବର: ନଭେମ୍ବରରେ ରଥଯାତ୍ରା କରିବା ନିଷ୍ପତ୍ତିରୁ ଓହରିଲା ଇସ୍କନ । ନିଜର ବିବାଦୀୟ ବୟାନ ସହ ନଭେମ୍ବରରେ ରଥାଯାତ୍ରା ପାଳନ କରିବା ପାଇଁ ଘୋଷଣା କରିଥିଲେ ଲୁଧିଆନା ଇସ୍କନ । ଯାହାକୁ ନେଇ ଲୁଧିଆନ ଇସ୍କନ ବିରୋଧରେ ମାମଲା ରୁଜୁ କରାଯାଇଥିଲା । ଆଉ ଏବେ ଏହି ନିଷ୍ପତ୍ତିରୁ ଓହରିଛି ଇସ୍କନ ।
ଏହାସହ ଆଷାଢ ମାସ ଶୁକ୍ଳ ପକ୍ଷ ଦ୍ବିତୀୟା ତିଥିରେ ମହାପ୍ରଭୁଙ୍କ ରଥଯାତ୍ରା ପାଳନ ହେବା ନେଇ ସ୍ପଷ୍ଟ କରିଛି ଇସ୍କନ। ଓଡିଶାବାସୀଙ୍କ ଧର୍ମୀୟ ଭାବନାକୁ ସମ୍ମାନ ଜଣାଇ ଏହି ପଦକ୍ଷେପ ନିଆଯାଇଥିବା ପ୍ରେସମିଟ୍ରେ ଜଣାଇଇଛନ୍ତି ଭୁବନେଶ୍ବର ଇସ୍କନ ମନ୍ଦିର କର୍ତ୍ତୁପକ୍ଷ ।
ତେବେ ନିକଟରେ ସାରା ବିଶ୍ବରେ ଇସ୍କନ ପାଇଁ ଜଗନ୍ନାଥ ପରିଚୟ ପାଇଥିବା ଅଜବ ଯୁକ୍ତି ବାଢି ଥିଲେ ଲୁଧିଆନାର ଇସ୍କନ କର୍ତ୍ତୃପକ୍ଷ । ଏପରକି କୋଟି କୋଟି ଭକ୍ତଙ୍କ ଭାବାବେଗ ସହ ଜଡିତ ଅଭଡାକୁ ମଧ୍ୟ ଅସ୍ବାସ୍ଥ୍ୟକର କହିଥିଲେ । ଏହାସହ ମହାପ୍ରଭୁ ଜଗନ୍ନାଥଙ୍କ ପ୍ରଥା, ପରମ୍ପରା ଓ ସଂସ୍କୃତି ତଥା ଜଗନ୍ନାଥ ଚେତନାକୁ ସାରା ବିଶ୍ବରେ ପ୍ରଚାର କରାଇବାରେ ଇସ୍କନର ଏକ ବଡ ଭୂମିକା ରହିଥିବା କହିଥିଲେ କର୍ତ୍ତୃପକ୍ଷ ।
ତେବେ ଶ୍ରୀମନ୍ଦିର ଦ୍ବାଦଶ ଶତାବ୍ଦିରେ ସ୍ଥାପନ ହୋଇଥିବା ବେଳେ 1966 ମସିହାରେ ହିନ୍ଦୁ ଗୌଡିୟ ବୈଷ୍ଣବ ପରମ୍ପରାକୁ ନେଇ ଗଠିତ ଇସ୍କନ ମନ୍ଦିର ପାଇଁ କେମିତି ଜଗନ୍ନାଥ ପରିଚିତ ହେଲେ ବୋଲି ପ୍ରଶ୍ନ ଉଠାଇଛି ଜଗନ୍ନାଥ ସଂସ୍କୃତି ସୁରକ୍ଷାମଞ୍ଚ। ଏହାକୁ ଘୋର ନିନ୍ଦା କରିବା ସହ ଲୁଧିଆନା ମନ୍ଦିର ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଜଗନ୍ନାଥ ପ୍ରେମୀ । କିନ୍ତୁ ଏହି ଘଟଣାରେ ମୁହଁ ଖୋଲି ନାହାଁନ୍ତି ଭୁବେନଶ୍ବର ଇସ୍କନ କର୍ତ୍ତୃପକ୍ଷ ।
ଏଠାରେ ସୂଚନାଯୋଗ୍ୟ, ପୂର୍ବରୁ ଆସନ୍ତା ନଭେମ୍ବର ମାସରେ ରଥଯାତ୍ରା କରିବାକୁ ଘୋଷଣା କରିଥିଲା ଲୁଧିଆନା ଇସ୍କନ ମନ୍ଦିର । ଯାହାକୁ ନେଇ ଉପୁଜିଥିଲା ବିବାଦ ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
